Bo Osman ni bakubona, hamohocwalo ni mwanaa bona wamusizana, nebaezeza bupaki bwa fa nyangela ka kuitusisa kakalani ka lihatiso kwande a matutaeti kwa Chile. Kiha kutaha baana ni basali bane basweli kuliza lipina, ili bane baya kwa matutaeti. Babañwi kwa batu bao nebanahana kuli bo Osman ki bo pasita mwa keleke yabona ya evangelical; kacwalo, babaatumela ni kubakumbata. Mi bali ku bona: “Luitumezi bo Pasita, mutile ka nako yeswanela luli, nelu milibelezi!”

 Bo Osman balika kutaluseza batu bao kuli nesi bona bo pasita. Kono bakeñisa kuli nekunani lilata leliñata hahulu, batu bao nebasika utwa zene babulezi bo Osman. Hamulaho wa mizuzu isikai kuzwa fobayela batu bao kwa mabita, babañwi ku bona bakuta ni kuto bulelela bo Osman kuli: “Bo Pasita lumilibelezi kwa mabita.”

 Hase kukuzize, bo Osman baitibahaza kwa batu bao, mi batalusa libaka hane bali kwa sibaka seo. Batu bao bahalifa hahulu kuli pasita wabona naasika taha, mi cwale babulelela bo Osman kuli: “Lwakupa kuli mukene mwahali muto lutaluseza kwateñi manzwinyana a mwa Bibele.” Bo Osman balumela.

 Hane banze baya kwa mabita, bo Osman babuza lipuzo lisikai ka za mufu, mi bakalisa kunahana za mañolo ane bakaitusisa. Hase bafitile kwa mabita, baitibahaza kwa sicaba, mi batalusa kuli ka kuba babañwi ba Lipaki za Jehova, baezanga musebezi wa kushaela taba yende kwa batu.

 Kihona cwale babala liñolo la Sinulo 21:3, 4 ni Joani 5:28, 29, mi batalusa kuli nesi mulelo wa Mulimu kuli batu bashwange. Batalusa kuli mane hona cwale-cwale fa, Mulimu ukazusa batu babashwile, mi bakapila kuya kuile fa lifasi. Bo Osman habafeza kubulela, batu babañata bataha ku bona ni kubakumbata ka tabo, mi baitumela ku bona “kabakala taba yende yezwa ku Jehova yene babataluselize.” Hasamulaho, bo Osman bakutela kwa kakalani ka lihatiso.

 Hamulaho wa kepelo, babañwi mwa sikwata sa batu bataha kwa kakalani ka lihatiso, mi bato buza bo Osman ni lubasi lwabona lipuzo ka za Bibele. Baambola ka nako yetelele, mi ka nako yebafunduka, bashimba ibato ba lihatiso kaufela zeneli teñi fa kakalani ka lihatiso.