Luitusisanga linubu kuli lituse mwa misebezi ya bulapeli bwaluna ni kutusa batu babañwi. Lueza misebezi yeo ka libaka la kuli lubata kutusa batu kuba balutiwa ba Kreste Jesu.—Mateu 28:19, 20.

 Haluitusisangi linubu kuli lufumise mutu ufi kamba ufi. Baana-bahulu kamba batu babañwi mwa puteho haba lifiwangi masheleñi, mi Lipaki za Jehova habalifiwangi masheleñi kuli bakutaze fa ndu ni ndu. Babasebeleza fa liofisi za mitai, kwa ofisi yetuna yezamaisa musebezi waluna mwa lifasi kaufela, hamohocwalo ni ba Sitopa Sesietelela, habafiwangi lituwelo.

•   Kuhatisa: Lueza musebezi wa kutoloka, kuhatisa, kuluma lihatiso, ni kuhasanya Libibele ni lihatiso zetomile fa Bibele zeñata-ñata silimo ni silimo, mi batu habalifisiwangi sesiñwi kuli babe ni lihatiso zeo. Mi batu bakona kufumana lihatiso zaluna fa webusaiti yaluna ya jw.org ni fa progilamu ya JW Library kusina kulifa sesiñwi, mi halubatangi kulizibahaza ka mulelo wa kubata kufumana masheleñi.

•   Kuyaha ni Kubabalela Miyaho: Lueza musebezi wa kuyaha ni kubabalela libaka zaluna za kulapelela mwa lifasi kaufela ilikuli liputeho zaluna likopanele mwa libaka zeswanela ni kulumbeka Mulimu. Luezanga nto yeswana ni haluyaha liofisi za mutai ni liofisi za toloko. Buñata bwa musebezi wa kuyaha ni kubabalela miyaho ueziwanga ki baitateli, mi taba yeo itusa kuli lusike lwaba ni lisinyehelo zeñata.

•   Kuzamaisa Musebezi: Musebezi oezwa kwa ofisi yetuna yezamaisa musebezi waluna mwa lifasi kaufela, liofisi za mutai, liofisi za toloko, hamohocwalo ni musebezi obaeza baokameli ba mupotoloho, ulifelwa ka linubu zefiwa mwa musebezi wa mwa lifasi kaufela.

•   Kukutaza: Lipaki za Jehova habalifiwangi masheleñi kuli bakutaze taba yende kamba kuluta batu “linzwi la Mulimu.” (2 Makorinte 2:17) Kono sina Bakreste ba mwa linako za baapositola, Bakreste babañwi babafilwe lituto, ili babaitusisa nako yabona yeñata kwa musebezi wa kukutaza, batusiwanga kulifela mandu mobapila ni kufumana lika zeñwi zebatokwa.—Mafilipi 4:16, 17; 1 Timotea 5:17, 18.

•   Kuluta Batu: Lisinyehelo zebanga teñi fa mikopano ya mupotoloho ni mikopano yemituna lilifelwanga ka linubu. Kutuha fo, lulukisanga litaba za kuteeleza ni mavidio atomile fa Bibele. Hape lubanga ni likolo zetusa baana-bahulu ni Bakreste babañwi baba mwa sebelezo ya nako kaufela kupeta hande musebezi obafilwe.

•   Kutusa Babawezwi ki Likozi: Lutusanga batu babawezwi ki likozi za ka taho kamba likozi zeñwi ka kubafa lico, mezi, ni kubatusa kuyaha mandu abona. Halutusangi feela “banabahabo luna mwa tumelo” kono hape lutusanga ni batu babasi Lipaki za Jehova.—Magalata 6:10.