ເຈົ້າຮູ້ບໍ?
ການຄົ້ນພົບກ້ອນດິນຈີ່ໃນເມືອງບາບີໂລນບູຮານແລະວິທີເຮັດກ້ອນດິນຈີ່ໃນສະໄໝນັ້ນສະໜັບສະໜູນບັນທຶກໃນຄຳພີໄບເບິນແນວໃດ?
ນັກບູຮານຄະດີໄດ້ຄົ້ນພົບກ້ອນດິນຈີ່ຫຼາຍລ້ານກ້ອນທີ່ຖືກໃຊ້ໃນການສ້າງເມືອງບາບີໂລນບູຮານ. ນັກບູຮານຄະດີທີ່ຊື່ໂຣເບີດ ໂຄເດວີບອກວ່າມີການເຜົາກ້ອນດິນຈີ່ເຫຼົ່ານີ້ໃນເຕົາເຜົາ “ຢູ່ນອກເມືອງເຊິ່ງມີດິນທີ່ເໝາະກັບການເຮັດດິນຈີ່ແລະມີຕົ້ນໄມ້ຫຼາຍທີ່ເອົາມາໃຊ້ເປັນເຊື້ອໄຟໄດ້.”
ນັກບູຮານຄະດີໄດ້ຄົ້ນພົບຫຼັກຖານທີ່ສະແດງວ່າຂ້າລາຊະການຂອງບາບີໂລນໄດ້ໃຊ້ເຕົາເຜົາໄປເຮັດສິ່ງອື່ນທີ່ໂຫດຮ້າຍນຳ. ພໍອາເລນ ໂບຣຽວ ສາດສະດາຈານດ້ານປະຫວັດສາດແລະພາສາຂອງອັດຊີເຣຍບູຮານຈາກມະຫາວິທະຍາໄລໂຕຣອນໂຕບອກວ່າ: “ຂໍ້ຂຽນຂອງບາບີໂລນຫຼາຍຂໍ້ສະແດງໃຫ້ເຫັນວ່າກະສັດໄດ້ສັ່ງໃຫ້ເຜົາຄົນທີ່ກະບົດ ບໍ່ເຊື່ອຟັງຫຼືບໍ່ເຄົາລົບນັບຖືສິ່ງສັກສິດ.” ຂໍ້ຂຽນໜຶ່ງຈາກສະໄໝກະສັດເນບູກາດເນັດຊາບອກວ່າ: “ທຳລາຍພວກມັນ ເຜົາພວກມັນ ຈູດພວກມັນໃນເຕົາ ໃຫ້ຄວັນລອຍຂຶ້ນມາ. ເຜົາພວກມັນໃນເຕົາໄຟທີ່ຮ້ອນໆບໍ່ໃຫ້ມັນເຫຼືອຊາກ.”
ນີ້ເຮັດໃຫ້ຄົນທີ່ອ່ານຄຳພີໄບເບິນຄິດເຖິງເລື່ອງທີ່ຢູ່ໃນດານີເອນບົດ 3 ເຊິ່ງເວົ້າເຖິງກະສັດເນບູກາດເນັດຊາໄດ້ສ້າງຮູບປັ້ນຄຳທີ່ໃຫຍ່ສູງໄວ້ຢູ່ທົ່ງພຽງດູຣາທີ່ຢູ່ນອກເມືອງບາບີໂລນ. ຄົນເຮັບເຣີ 3 ຄົນນັ້ນກໍຄືຊາດຣາກ ເມຊາກ ແລະອາເບດເນໂກບໍ່ຍອມໝູບໜ້າລົງກາບຮູບປັ້ນນັ້ນ ກະສັດເນບູກາດເນັດຊາກໍໃຈຮ້າຍຫຼາຍແລະ “ສັ່ງໃຫ້ເພີ່ມຄວາມຮ້ອນໃນເຕົາໄຟຂຶ້ນເປັນ 7 ເທົ່າ” ແລະເອົາ 3 ຄົນນີ້ໂຍນເຂົ້າ “ໃນເຕົາໄຟທີ່ຮ້ອນໆ.” ແຕ່ທູດສະຫວັນກໍມາຊ່ວຍເຂົາເຈົ້າເອົາໄວ້.—ດນອ. 3:1-6, 19-28
© The Trustees of the British Museum. Licensed under CC BY-NC-SA 4.0. Source
ກ້ອນດິນຈີ່ທີ່ມີຊື່ເນບູກາດເນັດຊາ
ກ້ອນດິນຈີ່ທີ່ຄົ້ນພົບໃນເມືອງບາບີໂລນຍັງເຮັດໃຫ້ເຫັນວ່າບັນທຶກໃນຄຳພີໄບເບິນຖືກຕ້ອງ. ກ້ອນດິນຈີ່ຫຼາຍກ້ອນເຫຼົ່ານີ້ມີຂໍ້ຄວາມທີ່ຍົກຍ້ອງກະສັດ. ມີຂໍ້ຄວາມໜຶ່ງບອກວ່າ: “ເນບູກາດເນັດຊາກະສັດບາບີໂລນ . . . ວັງທີ່ເຮົາເຊິ່ງເປັນກະສັດຜູ້ຍິ່ງໃຫຍ່ໄດ້ສ້າງໄວ້ . . . ຂໍໃຫ້ລູກຫຼານຂອງເຮົາໄດ້ປົກຄອງຢູ່ທີ່ນີ້ຕະຫຼອດໄປ.” ຂໍ້ຄວາມນີ້ຄ້າຍຄືກັນຫຼາຍກັບຂໍ້ຄວາມທີ່ຢູ່ໃນດານີເອນ 4:30 ທີ່ເນບູກາດເນັດຊາໂອ້ອວດວ່າ: “ຂ້ອຍນິແຫຼະເປັນຜູ້ສ້າງເມືອງບາບີໂລນທີ່ຍິ່ງໃຫຍ່ໃຫ້ເປັນວັງຂອງຂ້ອຍ. ຂ້ອຍສ້າງມັນດ້ວຍກຳລັງແລະອຳນາດຂອງຂ້ອຍເພື່ອຂ້ອຍຈະໄດ້ຮັບກຽດທີ່ຍິ່ງໃຫຍ່.”
