ຮຸນດາເຮັດຕາມເປົ້າໝາຍໄດ້ສຳເລັດ
ໃນຫຼາຍປີກ່ອນ ຖ້າເຈົ້າເຄີຍໄປເກາະນ້ອຍໆຊື່ຊັງກີເບຊາຢູ່ອິນໂດເນເຊຍ ເຈົ້າອາດເຈິພີ່ນ້ອງຍິງ 3 ຄົນຢູ່ແຄມທະເລ. ຄົນໃນເກາະຮູ້ຈັກເຂົາເຈົ້າວ່າເປັນພະຍານພະເຢໂຫວາ ຍ້ອນເຂົາເຈົ້າຊ່ວຍຫຼາຍຄົນໃຫ້ຮູ້ຈັກຄຳພີໄບເບິນ. ແຕ່ຕອນທີ່ເຈົ້າເຫັນ 3 ຄົນນີ້ຢູ່ແຄມທະເລ ເຂົາເຈົ້າກຳລັງເຮັດບາງຢ່າງທີ່ບໍ່ແມ່ນວຽກປະກາດ.
ເກາະຊັງກີເບຊາທີ່ຢູ່ທາງພາກເໜືອຂອງອິນໂດເນເຊຍ
ເຂົາເຈົ້າເຮັດຫຍັງ? ເຂົາເຈົ້າຍ່າງລົງໄປໃນທະເລແລະເອົາກ້ອນຫີນຂຶ້ນມາເທິງຝັ່ງ. ຫີນບາງກ້ອນໃຫຍ່ສ່ຳກັບໝາກບານເຕະ. ຈາກນັ້ນ ເຂົາເຈົ້າກໍນັ່ງຕັ່ງນ້ອຍໆແລະເອົາຄ້ອນຕີທຸບຫີນເປັນກ້ອນນ້ອຍໆສ່ຳໄຂ່ໄກ່ ແລ້ວເຂົາເຈົ້າກໍເອົາກ້ອນຫີນໃສ່ຄຸພຣາດສະຕິກແລະຫິ້ວເມືອເຮືອນ. ເມື່ອຮອດເຮືອນ ເຂົາເຈົ້າກໍເອົາກ້ອນຫີນທີ່ເກັບມານັ້ນໃສ່ຖົງໃຫຍ່ ແລ້ວຊ່ວຍກັນຍົກຂຶ້ນໃສ່ຫຼັງລົດບັນທຸກເພື່ອເອົາກ້ອນຫີນເຫຼົ່ານັ້ນໄປໃຊ້ເຮັດຫົນທາງ.
ຮຸນດາກຳລັງເກັບກ້ອນຫີນຢູ່ແຄມທະເລ
ໜຶ່ງໃນພີ່ນ້ອງຍິງ 3 ຄົນນັ້ນແມ່ນຮຸນດາ. ລາວມີເວລາທີ່ຈະເຮັດວຽກນີ້ຫຼາຍກວ່າຄົນອື່ນ. ປົກກະຕິແລ້ວ ລາວຈະເອົາເງິນທີ່ໄດ້ຈາກການເຮັດວຽກນີ້ມາໃຊ້ຈ່າຍໃນຄອບຄົວ ແຕ່ຕອນນີ້ລາວຢາກທ້ອນເງິນໄວ້ບາງສ່ວນເພື່ອຊື້ບາງຢ່າງ. ລາວຢາກໄດ້ແທັບເລັດເພາະມັນຈະຊ່ວຍລາວໃຫ້ເຂົ້າແອັບ JW Library® ໄດ້. ຮຸນດາຮູ້ວ່າວິດີໂອແລະສິ່ງອື່ນໆທີ່ຢູ່ໃນແອັບນີ້ຈະຊ່ວຍລາວໃນວຽກປະກາດແລະຊ່ວຍລາວໃຫ້ເຂົ້າໃຈຄຳພີໄບເບິນຫຼາຍຂຶ້ນ.
ຮຸນດາເຮັດວຽກຕອນເຊົ້າມື້ລະ 2 ຊົ່ວໂມງປະມານເດືອນເຄິ່ງ ເພື່ອລາວຈະໄດ້ກ້ອນຫີນເຕັມລົດບັນທຸກນ້ອຍໆຄັນໜຶ່ງ. ໃນທີ່ສຸດ ລາວກໍມີເງິນພໍທີ່ຈະຊື້ແທັບເລັດ.
ຮຸນດາກັບແທັບເລັດຂອງລາວ
ຮຸນດາເວົ້າວ່າ: “ເຖິງວ່າຂ້ອຍຈະເມື່ອຍແລະປວດຕົນໂຕຍ້ອນເຮັດວຽກນີ້ ແຕ່ຂ້ອຍກໍບໍ່ໄດ້ຄິດເຖິງມັນເລີຍເມື່ອໄດ້ໃຊ້ແທັບເລັດໃໝ່ເພື່ອຊ່ວຍຂ້ອຍໃຫ້ປະກາດໄດ້ດີຂຶ້ນແລະເພື່ອກຽມການປະຊຸມໄດ້ງ່າຍຂຶ້ນ.” ຮຸນດາຍັງເວົ້າວ່າ ຕອນທີ່ພະຍາດໂຄວິດເລີ່ມລະບາດໃໝ່ໆແທັບເລັດຊ່ວຍລາວໃຫ້ເຂົ້າຮ່ວມການປະຊຸມແລະການປະກາດກັບພີ່ນ້ອງໄດ້. ເຮົາດີໃຈຫຼາຍທີ່ຮຸນດາເຮັດຕາມເປົ້າໝາຍໄດ້ສຳເລັດ.
