ຂ້ອຍຈະເປັນໝູ່ກັບພະເຈົ້າໄດ້ແນວໃດ?
ບົດທີ 35
ຂ້ອຍຈະເປັນໝູ່ກັບພະເຈົ້າໄດ້ແນວໃດ?
ຫຼັງຈາກທີ່ເຈເຣມີເຈິເຫດການທີ່ເຮັດໃຫ້ທຸກໃຈ ລາວຮູ້ສຶກວ່າການເປັນໝູ່ກັບພະເຈົ້າມີຄ່າຫຼາຍ. ລາວເລົ່າວ່າ “ຕອນຂ້ອຍອາຍຸ 12 ປີ ພໍ່ຖິ້ມຄອບຄົວເຮົາໄປ. ມີຄືນໜຶ່ງຂ້ອຍອ້ອນວອນຂໍພະເຢໂຫວາບັງຄັບໃຫ້ພໍ່ກັບມາ.”
ເມື່ອເຈເຣມີຈົມຢູ່ໃນຄວາມທຸກ ລາວເລີ່ມອ່ານຄຳພີໄບເບິນ. ລາວເປີດໄປເຈິຄຳເພງ 10:14 ເຮັດໃຫ້ລາວຕື້ນຕັນໃຈຫຼາຍ. ຂໍ້ນັ້ນໃນສະບັບແປໂລກໃໝ່ເວົ້າເຖິງພະເຢໂຫວາວ່າ: “ຄົນທີ່ຕົກເປັນເຫຍື່ອກໍຫັນມາເພິ່ງພະອົງ ພະອົງເປັນຜູ້ຊ່ວຍເຫຼືອລູກກຳພ້າພໍ່.” ເຈເຣມີບອກວ່າ: “ຂ້ອຍຮູ້ສຶກວ່າພະເຢໂຫວາກຳລັງເວົ້າກັບຂ້ອຍ ເພິ່ນບອກຂ້ອຍວ່າຈະຄອຍຊ່ວຍເຫຼືອຂ້ອຍ ເພິ່ນເປັນພໍ່ຂອງຂ້ອຍ. ຂ້ອຍຈະຫາພໍ່ທີ່ດີກວ່ານີ້ໄດ້ແນວໃດ?”
ບໍ່ວ່າສະພາບການຂອງເຈົ້າຈະຄືກັບເຈເຣມີຫຼືບໍ່ ຄຳພີໄບເບິນບອກໃຫ້ຮູ້ວ່າພະເຢໂຫວາຢາກເປັນໝູ່ກັບເຈົ້າ ໂດຍບອກວ່າ: “ໃຫ້ເຂົ້າໄປໃກ້ຊິດກັບພະເຈົ້າ ແລ້ວພະອົງຈະເຂົ້າມາໃກ້ຊິດກັບພວກເຈົ້າ.” (ຢາໂກໂບ 4:8) ລອງຄິດເບິ່ງວ່າ: ເຖິງວ່າເຈົ້າຈະເບິ່ງບໍ່ເຫັນເພິ່ນແລະບໍ່ມີທາງທຽບກັບເພິ່ນໄດ້ ແຕ່ພະເຢໂຫວາພະເຈົ້າຍັງເຊີນເຈົ້າໃຫ້ເປັນໝູ່ກັບເພິ່ນ!
ແຕ່ການເປັນໝູ່ກັບພະເຢໂຫວາເຈົ້າເອງກໍຕ້ອງເຮັດຫຍັງບາງຢ່າງນຳ. ຕົວຢ່າງເຊັ່ນ: ຖ້າເຈົ້າມີຕົ້ນໄມ້ກະຖາງໜຶ່ງ ມັນຄືຊິໃຫຍ່ເອງບໍ່ໄດ້. ເຈົ້າຕ້ອງຮູ້ວ່າມັນມັກອາກາດແບບໃດແລະຕ້ອງຄອຍຫົດນ້ຳເປັນປະຈຳ. ການເປັນໝູ່ກັບພະເຈົ້າກໍຄືກັນ. ເຈົ້າຈະເຮັດໃຫ້ມິດຕະພາບນັ້ນງອກງາມໄດ້ແນວໃດ?
ຕ້ອງສຶກສາສ່ວນຕົວ
ຄົນເຮົາຈະເປັນໝູ່ກັນໄດ້ຕ້ອງມີການເວົ້າລົມກັນ. ໃນການລົມກັນນັ້ນຕ້ອງມີທັງຝ່າຍທີ່ເວົ້າແລະຝ່າຍທີ່ຟັງ. ການເປັນໝູ່ກັບພະເຈົ້າກໍຄືກັນ ເມື່ອເຮົາອ່ານແລະສຶກສາຄຳພີໄບເບິນກໍສ່ຳກັບເຮົາກຳລັງຟັງພະເຈົ້າເວົ້າ.—ຄຳເພງ 1:2, 3
ເຈົ້າອາດຈະເປັນຄົນບໍ່ມັກອ່ານໜັງສື. ໜຸ່ມສາວສ່ວນຫຼາຍມັກເບິ່ງໂທລະທັດ ຫຼິ້ນເກມ ຫຼືໄປທ່ຽວກັບໝູ່ຄູ່. ແຕ່ຖ້າເຈົ້າຢາກເປັນໝູ່ກັບພະເຈົ້າ ກໍບໍ່ມີວິທີອື່ນ. ເຈົ້າຕ້ອງຟັງເພິ່ນໂດຍອ່ານແລະສຶກສາຖ້ອຍຄຳຂອງເພິ່ນ.
ເຈົ້າບໍ່ມັກອ່ານບໍ່ມັກສຶກສາແມ່ນບໍ? ຄັນຊັ້ນ ການສຶກສາຄຳພີໄບເບິນອາດເບິ່ງເປັນເລື່ອງໜ້າເບື່ອ. ແຕ່ຖ້າພະຍາຍາມຈັກໜ້ອຍໜຶ່ງ ເຈົ້າຈະມັກເອງ. ສິ່ງທຳອິດທີ່ເຈົ້າຕ້ອງເຮັດຄືຈັດເວລາ. ໄລອິດສ໌ບອກວ່າ “ເມື່ອຕື່ນຂຶ້ນມາ ຂ້ອຍຈະອ່ານຄຳພີໄບເບິນໜຶ່ງບົດທຸກເຊົ້າ.” ມາເຣຍ ອາຍຸ 15 ປີ ຈັດເວລາອີກແບບໜຶ່ງ. ລາວບອກວ່າ “ຂ້ອຍຈະອ່ານຄຳພີໄບເບິນກ່ອນນອນທຸກຄືນ.”
ຖ້າເຈົ້າບໍ່ຮູ້ຈະເລີ່ມສຶກສາຄຳພີໄບເບິນແນວໃດ ໃຫ້ເບິ່ງຢູ່ ໜ້າ 292. ເຈົ້າຄິດວ່າຈະໃຊ້ເວລາຊ່ວງໃດສຶກສາຄຳພີໄບເບິນຈັກ 30 ນາທີ?
․․․․․
ການຈັດເວລາເປັນພຽງການເລີ່ມຕົ້ນ. ເມື່ອເຈົ້າເລີ່ມສຶກສາແທ້ໆເຈົ້າກໍຈະເຫັນວ່າການອ່ານຄຳພີໄບເບິນບໍ່ງ່າຍເລີຍ. ເຈົ້າຄືຊິເຫັນດີກັບເຈດຊ໌ຣຽວ ອາຍຸ 11 ປີທີ່ເວົ້າກົງໄປກົງມາວ່າ “ຄຳພີໄບເບິນບາງຕອນອ່ານຍາກບໍ່ມ່ວນເລີຍ.” ຖ້າເຈົ້າຮູ້ສຶກແບບນັ້ນ ຢ່າຟ້າວທໍ້ໃຈ. ພະຍາຍາມຄິດວ່າການອ່ານຄຳພີໄບເບິນເປັນການຟັງພະເຢໂຫວາພະເຈົ້າໝູ່ຂອງເຈົ້າ. ແລ້ວການອ່ານຄຳພີໄບເບິນກໍຈະກາຍເປັນເລື່ອງມ່ວນ!
ຕ້ອງອະທິດຖານ
ການອະທິດຖານເປັນການລົມກັບພະເຈົ້າ. ລອງຄິດເບິ່ງແມ້ ນັ້ນເປັນຂອງຂວັນທີ່ວິເສດສ່ຳໃດ! ເຈົ້າຈະລົມກັບພະເຈົ້າຕອນໃດກໍໄດ້ ບໍ່ວ່າຈະເປັນຕອນກາງເວັນຫຼືກາງຄືນ. ເພິ່ນພ້ອມຈະຟັງເຈົ້າສະເໝີ. ຫຼາຍກວ່ານັ້ນ ເພິ່ນຢາກຟັງເຈົ້າ. ຍ້ອນແນວນີ້ ຄຳພີໄບເບິນຈຶ່ງເຊີນຊວນເຈົ້າວ່າ: “ໃຫ້ຂໍທຸກສິ່ງຈາກພະເຈົ້າດ້ວຍການອະທິດຖານແລະການອ້ອນວອນ ແລະໃຫ້ຂອບໃຈພະອົງນຳ.”—ຟີລິບປອຍ 4:6
ຕາມທີ່ຄຳພີໄບເບິນຂໍ້ນີ້ບອກ ມີຫຼາຍສິ່ງທີ່ເຈົ້າລົມກັບພະເຢໂຫວາໄດ້ ບໍ່ວ່າຈະເປັນບັນຫາທີ່ເກີດຂຶ້ນຫຼືເລື່ອງທີ່ເຈົ້າກັງວົນ. ແລະເມື່ອຄິດເຖິງສິ່ງດີໆເຈົ້າຄືຊິຢາກຂອບໃຈພະເຈົ້າ. ຖ້າໝູ່ເຮັດແນວດີໆໃຫ້ ເຈົ້າຄືຊິຢາກຂອບໃຈລາວແມ່ນບໍ? ຄ້າຍຄືກັນ ເຈົ້າຄວນຂອບໃຈພະເຢໂຫວາຍ້ອນເພິ່ນໃຫ້ແນວດີໆກັບເຈົ້າຫຼາຍຢ່າງເກີນກວ່າທີ່ໝູ່ຄົນໃດຈະໃຫ້ໄດ້.—ຄຳເພງ 106:1
ມີຫຍັງແດ່ທີ່ເຈົ້າຢາກຂອບໃຈພະເຢໂຫວາ?
․․․․․
ບາງເທື່ອເຈົ້າຄືຊິຮູ້ສຶກຢ້ານແລະກັງວົນ. ຄຳເພງ 55:22 (ສະບັບແປໂລກໃໝ່) ບອກວ່າ: “ມອບພາລະຂອງເຈົ້າໄວ້ກັບພະເຢໂຫວາເຖີ້ນ ແລ້ວເພິ່ນຈະຊ່ວຍເຈົ້າ. ເພິ່ນຈະບໍ່ມີວັນຍອມໃຫ້ຄົນດີລົ້ມລົງ.”
ມີເລື່ອງຫຍັງແດ່ທີ່ເຈົ້າກັງວົນແລະຢາກບອກເພິ່ນ?
․․․․․
ປະສົບການສ່ວນຕົວ
ການເປັນໝູ່ກັບພະເຈົ້າຍັງມີອີກແງ່ມຸມໜຶ່ງທີ່ບໍ່ຄວນເບິ່ງຂ້າມ. ດາວິດຜູ້ຂຽນຄຳເພງຂຽນວ່າ: “ລອງຊີມເບິ່ງ ແລ້ວຈະຮູ້ວ່າພະເຢໂຫວາດີສ່ຳໃດ.” (ຄຳເພງ 34:8, ລ.ມ.) ຕອນທີ່ດາວິດຂຽນຄຳເພງບົດ 34 ລາວຫາກໍຜ່ານເຫດການທີ່ເປັນຕາຢ້ານມາ. ນອກຈາກຈະຖືກກະສັດຊາອູນໄລ່ຂ້າແລ້ວ ລາວຍັງຕ້ອງໜີໄປລີ້ໃນເມືອງຂອງສັດຕູຄືຄົນຟີລິດສະຕິນ. ຕອນນັ້ນລາວຕ້ອງປະເຊີນໜ້າກັບຄວາມຕາຍຈຶ່ງທຳທ່າເປັນບ້າເພື່ອເອົາໂຕລອດ.—1 ຊາເມືອນ 21:10-15
ຫຼັງຈາກດາວິດລອດຕາຍມາໄດ້ ລາວບໍ່ໄດ້ຄິດວ່າໂຕເອງສະຫຼາດ ແຕ່ບອກວ່າຍ້ອນພະເຢໂຫວາຊ່ວຍລາວ. ລາວບອກໄວ້ໃນຄຳເພງວ່າ: “ເມື່ອຂ້ອຍຖາມພະເຢໂຫວາ ເພິ່ນກໍຕອບ ເພິ່ນຊ່ວຍຂ້ອຍບໍ່ໃຫ້ຢ້ານຫຍັງອີກແລ້ວ.” (ຄຳເພງ 34:4, ລ.ມ.) ເມື່ອດາວິດປະສົບດ້ວຍໂຕເອງ ລາວຈຶ່ງເຊີນຊວນຄົນອື່ນໃຫ້ “ລອງຊີມເບິ່ງ ແລ້ວຈະຮູ້ວ່າພະເຢໂຫວາດີສ່ຳໃດ.” *
ເຈົ້າເຫັນຫຼັກຖານຫຍັງບໍທີ່ສະແດງວ່າພະເຢໂຫວາຮັກແລະເອົາໃຈໃສ່ເຈົ້າ? ໃຫ້ຂຽນລົງໄປ. ບໍ່ຕ້ອງເປັນປະສົບການທີ່ໜ້າຕື່ນເຕັ້ນຫຼາຍກໍໄດ້. ລອງຄິດເຖິງສິ່ງດີໆທີ່ເຈົ້າໄດ້ຮັບໃນແຕ່ລະມື້ ບາງເທື່ອເຈົ້າອາດຈະເບິ່ງຂ້າມໄປ.
․․․․․
ພໍ່ແມ່ຄືຊິສອນຄວາມຈິງໃນຄຳພີໄບເບິນໃຫ້ເຈົ້າ. ແຕ່ເຈົ້າຕ້ອງສ້າງສາຍສຳພັນກັບພະເຈົ້າດ້ວຍໂຕເອງ. ຖ້າຍັງບໍ່ໄດ້ເຮັດ ຄຳແນະນຳໃນບົດນີ້ຈະຊ່ວຍເຈົ້າໄດ້. ພະເຢໂຫວາຈະຊ່ວຍເຈົ້າໃຫ້ເຮັດສຳເລັດ. ຄຳພີໄບເບິນບອກວ່າ: “ຂໍຕໍ່ໄປເລື້ອຍໆແລ້ວພວກເຈົ້າຈະໄດ້ຮັບ ຊອກຫາຕໍ່ໄປເລື້ອຍໆແລ້ວພວກເຈົ້າຈະພົບ.”—ມັດທາຍ 7:7
ເຊີນອ່ານເລື່ອງນີ້ເພີ່ມເຕີມໄດ້ໃນເຫຼັ້ມທີ 1 ບົດທີ 38 ແລະ 39
ເຈົ້າຄິດວ່າການລົມກັບຄົນອື່ນເລື່ອງພະເຈົ້າເປັນເລື່ອງຍາກບໍ? ເຈົ້າຈະປົກປ້ອງຄວາມເຊື່ອຂອງເຈົ້າໄດ້ແນວໃດ?
[ຂໍ້ຄວາມໄຂເງື່ອນ]
^ ຂໍ້ 24 ຄຳພີໄບເບິນບາງສະບັບແປວະລີ “ຊີມເບິ່ງແລ້ວຈະຮູ້” ໄວ້ວ່າ “ຄົ້ນພົບດ້ວຍໂຕເອງ” “ຊອກຫາດ້ວຍໂຕເອງ” ແລະ “ຮູ້ຈາກປະສົບການ.”—ສະບັບຄອນເທມໂພຣາຣີອິງລິດຊ໌ ສະບັບທູເດສ໌ອິງລິດຊ໌ ແລະສະບັບເດິໄບເບິນອິນເບສິກອິງລິດຊ໌
ຂໍ້ພະຄຳພີຫຼັກ
“ຄົນທີ່ຮູ້ຕົວວ່າຈຳເປັນຕ້ອງເພິ່ງພະເຈົ້າກໍມີຄວາມສຸກ.”—ມັດທາຍ 5:3
ຄຳແນະນຳ
ໃຫ້ອ່ານຄຳພີໄບເບິນມື້ລະຫ້າເຖິງຫົກໜ້າ ແລ້ວເຈົ້າຈະອ່ານຈົບຫົວພາຍໃນ 1 ປີ.
ເຈົ້າຮູ້ບໍ . . . ?
ການທີ່ເຈົ້າໄດ້ອ່ານປຶ້ມຫົວນີ້ແລະເອົາຄຳແນະນຳໄປໃຊ້ສະແດງວ່າພະເຢໂຫວາສົນໃຈເຈົ້າແທ້ໆ.—ໂຢຮັນ 6:44
ແຜນພາກປະຕິບັດ!
ເພື່ອຈະໄດ້ຮັບປະໂຫຍດຫຼາຍຂຶ້ນຈາກການສຶກສາສ່ວນຕົວ ຂ້ອຍຈະ ․․․․․
ເພື່ອຈະອະທິດຖານໃຫ້ເປັນປະຈຳຫຼາຍຂຶ້ນ ຂ້ອຍຈະ ․․․․․
ສິ່ງທີ່ຂ້ອຍຢາກຖາມພໍ່ແມ່ກ່ຽວກັບເລື່ອງນີ້ຄື ․․․․․
ເຈົ້າຄິດວ່າແນວໃດ?
● ເຈົ້າຈະເຮັດໃຫ້ການສຶກສາຄຳພີໄບເບິນມ່ວນຂຶ້ນໄດ້ແນວໃດ?
● ເປັນຫຍັງພະເຢໂຫວາຢາກຟັງຄຳອະທິດຖານຂອງມະນຸດທີ່ບໍ່ສົມບູນແບບ?
● ເຈົ້າຈະປັບປຸງຄຳອະທິດຖານຂອງເຈົ້າໄດ້ແນວໃດ?
[ຈຸດເດັ່ນໜ້າ 291]
“ຕອນເປັນເດັກນ້ອຍ ຂ້ອຍຈະອະທິດຖານຊ້ຳໆແບບເກົ່າ. ແຕ່ຕອນນີ້ຂ້ອຍຈະເວົ້າທັງເລື່ອງທີ່ດີແລະບໍ່ດີທີ່ເກີດຂຶ້ນໃນແຕ່ລະມື້ ບໍ່ໄດ້ເວົ້າຄືກັນທຸກມື້ຍ້ອນເປັນໄປບໍ່ໄດ້ທີ່ທຸກມື້ຈະຄືກັນ.”—ອີບຟ໌
[ຂອບ/ຮູບພາບໜ້າ 292]
ວິທີຄົ້ນຄວ້າຄຳພີໄບເບິນ
1. ເລືອກຈັກເລື່ອງໜຶ່ງໃນຄຳພີໄບເບິນທີ່ເຈົ້າຢາກອ່ານ. ອະທິດຖານຂໍພະເຢໂຫວາຊ່ວຍເຈົ້າໃຫ້ເຂົ້າໃຈເລື່ອງນັ້ນ.
2. ອ່ານໄປນຶກພາບໄປ. ບໍ່ຕ້ອງຟ້າວ. ຂະນະທີ່ອ່ານໃຫ້ນຶກພາບໄປນຳ. ໃຫ້ໃຊ້ປະສາດສຳຜັດຕ່າງໆເຊັ່ນ: ໄດ້ຍິນສຽງຄົນເວົ້າ ຮັບຮູ້ລົດຊາດຂອງອາຫານ ໄດ້ກິ່ນແລະເຫັນພາບເຫດການທີ່ເກີດຂຶ້ນ. ໃຫ້ເຮັດຄືກັບວ່າເຈົ້າຢູ່ໃນເຫດການນັ້ນແທ້ໆ!
3. ຄິດເຖິງເລື່ອງທີ່ຫາກໍອ່ານ. ລອງຕອບຄຳຖາມຕໍ່ໄປນີ້:
● ເປັນຫຍັງພະເຢໂຫວາໃຫ້ບັນທຶກເລື່ອງນີ້ໄວ້ໃນຄຳພີໄບເບິນ?
● ຕົວຢ່າງໃດທີ່ໜ້າຮຽນແບບ ແລະຕົວຢ່າງໃດທີ່ຄວນຫຼີກລ່ຽງ?
● ມີບົດຮຽນຫຍັງແດ່ທີ່ຂ້ອຍຈະເອົາໄປໃຊ້ໄດ້?
● ຂ້ອຍຮູ້ຫຍັງແດ່ກ່ຽວກັບພະເຢໂຫວາແລະເຫດຜົນທີ່ເພິ່ນເຮັດແບບນັ້ນ?
4. ອະທິດຖານເຖິງພະເຢໂຫວາສັ້ນໆ. ບອກເພິ່ນວ່າເຈົ້າໄດ້ຮຽນຮູ້ຫຍັງແດ່ຈາກເລື່ອງທີ່ອ່ານແລະຈະເອົາໄປໃຊ້ແນວໃດ. ໃຫ້ຂອບໃຈພະເຢໂຫວາສະເໝີສຳລັບຄຳພີໄບເບິນຖ້ອຍຄຳຂອງເພິ່ນເຊິ່ງເປັນຂອງຂວັນທີ່ລ້ຳຄ່າ!
[ຮູບພາບ]
“ຄຳຂອງພະອົງເປັນຕະກຽງສ່ອງທາງໃຫ້ຂ້ອຍກ້າວຍ່າງຕໍ່ໄປ ແລະເປັນແສງສະຫວ່າງຕາມທາງຂອງຂ້ອຍ.”—ຄຳເພງ 119:105, ລ.ມ.
[ຂອບ/ຮູບພາບໜ້າ 294]
ສິ່ງສຳຄັນຕ້ອງມາກ່ອນ
ເຈົ້າບໍ່ມີເວລາອະທິດຖານຫຼືສຶກສາຄຳພີໄບເບິນບໍ? ສ່ວນຫຼາຍຂຶ້ນຢູ່ກັບວ່າເຈົ້າຈະໃຫ້ຄວາມສຳຄັນກັບຫຍັງ.
ລອງເຮັດແບບນີ້: ໃຫ້ເອົາຄຸໜ່ວຍໜຶ່ງແລ້ວໃສ່ຫີນກ້ອນໃຫຍ່ໆລົງໄປ. ຈາກນັ້ນ ຖອກຊາຍໃສ່ໃຫ້ເຕັມຄຸ. ຕອນນີ້ໃນຄຸກໍຈະມີທັງຫີນແລະຊາຍ.
ຕອນນີ້ໃຫ້ຖອກຫີນແລະຊາຍອອກມາຈາກຄຸໃຫ້ໝົດ. ເທື່ອນີ້ເຮັດປີ້ນກັນ ໃຫ້ໃສ່ຊາຍລົງໄປກ່ອນ ແລ້ວຈຶ່ງໃສ່ຫີນລົງໄປ. ໃສ່ຫີນບໍ່ໝົດແມ່ນບໍ? ນັ້ນເປັນຍ້ອນເຈົ້າໃສ່ຊາຍລົງໄປກ່ອນ.
ບົດຮຽນແມ່ນຫຍັງ? ຄຳພີໄບເບິນບອກວ່າ: “ເບິ່ງໃຫ້ອອກວ່າສິ່ງໃດສຳຄັນກວ່າ.” (ຟີລິບປອຍ 1:10) ຖ້າເຈົ້າເຮັດສິ່ງທີ່ບໍ່ສຳຄັນກ່ອນ ເຊັ່ນ ການພັກຜ່ອນຢ່ອນໃຈ ເຈົ້າຈະບໍ່ມີເວລາພໍສຳລັບສິ່ງທີ່ສຳຄັນໃນຊີວິດຄືກິດຈະກຳຄລິດສະຕຽນ. ແຕ່ຖ້າເຈົ້າເຮັດຕາມຄຳແນະນຳໃນຄຳພີໄບເບິນ ເຈົ້າຈະມີເວລາສຳລັບທັງສອງສິ່ງຄືຮັບໃຊ້ພະເຈົ້າແລະມີການພັກຜ່ອນຢ່ອນໃຈແບບເໝາະສົມ. ນີ້ຂຶ້ນຢູ່ກັບວ່າເຈົ້າຈະເຮັດຫຍັງກ່ອນ!
[ຮູບພາບໜ້າ 290]
ສາຍສຳພັນຂອງເຈົ້າກັບພະເຈົ້າກໍຄືກັບຕົ້ນໄມ້ ຕ້ອງຄອຍເບິ່ງແຍງຈຶ່ງຈະເຕີບໃຫຍ່
ເລື່ອງທີ່ເຈົ້າອາດຈະມັກ
ໄວລຸ້ນແລະໜຸ່ມສາວ
ໜຸ່ມສາວຖາມວ່າ
ຄຳຖາມທີ່ໜຸ່ມສາວມັກຖາມກ່ຽວກັບເລື່ອງເພດ ໝູ່ເພື່ອນ ພໍ່ແມ່ ໂຮງຮຽນ ແລະອື່ນໆ.
