ຈົດໝາຍສະບັບທີສອງເຖິງຕີໂມທຽວ 2:1-26
2 ລູກຮັກຂອງຂ້ອຍ+ ຂໍໃຫ້ເຈົ້າໄດ້ຮັບກຳລັງຫຼາຍຂຶ້ນເລື້ອຍໆຈາກຄວາມກະລຸນາທີ່ຍິ່ງໃຫຍ່ທີ່ພະເຈົ້າສະແດງຜ່ານທາງພະຄລິດເຢຊູ.
2 ສິ່ງຕ່າງໆທີ່ເຈົ້າໄດ້ຍິນຈາກຂ້ອຍເຊິ່ງມີຫຼາຍຄົນເປັນພະຍານຢືນຢັນນັ້ນ+ ໃຫ້ເຈົ້າມອບໄວ້ນຳຄົນທີ່ສັດຊື່ເຊິ່ງມີຄວາມສາມາດພໍທີ່ຈະສອນຄົນອື່ນໄດ້.
3 ເຈົ້າເປັນທະຫານທີ່ດີ+ຂອງພະຄລິດເຢຊູ ຂໍໃຫ້ເຈົ້າຍອມອົດທົນຮ່ວມກັບຂ້ອຍ.+
4 ທະຫານປະຈຳການທີ່ຢາກໃຫ້ຜູ້ທີ່ເກນລາວພໍໃຈຄືຊິບໍ່ຫຍຸ້ງຢູ່ກັບການຄ້າຂາຍຫາລ້ຽງຊີບດອກ.*
5 ນັກກິລາກໍຄືກັນ ລາວຕ້ອງແຂ່ງຂັນຕາມກົດ. ຄັນບໍ່ຊັ້ນ ລາວກໍບໍ່ມີທາງໄດ້ໃສ່ມົງກຸດ.+
6 ຊາວໄຮ່ຊາວນາທີ່ເຮັດວຽກໜັກກໍຄວນຈະເປັນຄົນທຳອິດທີ່ໄດ້ຮັບສ່ວນແບ່ງຜົນລະປູກ.
7 ໃຫ້ເຈົ້າຄິດເຖິງເລື່ອງທີ່ຂ້ອຍເວົ້າສະເໝີ ແລະຜູ້ເປັນນາຍຈະຊ່ວຍເຈົ້າໃຫ້ເຂົ້າໃຈທຸກສິ່ງ.
8 ຢ່າລືມວ່າພະເຢຊູຄລິດຖືກປຸກໃຫ້ຄືນມາຈາກຕາຍ+ ແລະເພິ່ນເປັນລູກຫຼານຂອງດາວິດ+ຕາມທີ່ບອກໄວ້ໃນຂ່າວດີທີ່ຂ້ອຍປະກາດ.+
9 ຂ້ອຍທົນທຸກທໍລະມານແລະຖືກຂັງຄືກັບຄົນທີ່ຂ້າຄົນຍ້ອນຂ່າວດີນີ້ແຫຼະ.+ ແຕ່ເຖິງຈະເປັນແນວນັ້ນ ຄຳສອນຂອງພະເຈົ້າກໍບໍ່ມີທາງຖືກຂັງໄວ້.+
10 ຍ້ອນແນວນີ້ ຂ້ອຍຈຶ່ງອົດທົນກັບທຸກສິ່ງຕໍ່ໆໄປໄດ້ເພື່ອເຫັນແກ່ຄົນທີ່ພະເຈົ້າເລືອກໄວ້+ ເພື່ອເຂົາເຈົ້າຈະໄດ້ຮັບຄວາມລອດທີ່ມາທາງພະຄລິດເຢຊູແລະໄດ້ຮັບກຽດຕະຫຼອດໄປ.
11 ຄຳເວົ້ານີ້ເປັນຄວາມຈິງທີ່ວ່າ ຖ້າພວກເຮົາຕາຍນຳກັນ ພວກເຮົາກໍຈະມີຊີວິດນຳກັນແນ່ນອນ.+
12 ຖ້າພວກເຮົາອົດທົນຕໍ່ໄປ ພວກເຮົາຈະໄດ້ປົກຄອງເປັນກະສັດນຳກັນ.+ ແຕ່ຖ້າພວກເຮົາປະຕິເສດພະເຈົ້າ ເພິ່ນກໍຈະປະຕິເສດພວກເຮົາຄືກັນ.+
13 ເຖິງວ່າພວກເຮົາບໍ່ສັດຊື່ ເພິ່ນກໍຍັງສັດຊື່ຢູ່ ຍ້ອນເພິ່ນຈະປະຕິເສດໂຕເອງບໍ່ໄດ້.
14 ຂໍໃຫ້ເຕືອນເຂົາເຈົ້າໃນເລື່ອງເຫຼົ່ານີ້ສະເໝີ. ສັ່ງເຂົາເຈົ້າຕໍ່ໜ້າພະເຈົ້າວ່າຢ່າຖຽງກັນເລື່ອງຄຳເວົ້າຍ້ອນມັນບໍ່ມີປະໂຫຍດຫຍັງ ມີແຕ່ຈະເຮັດໃຫ້ຄົນທີ່ຟັງໄດ້ຮັບຄວາມເສຍຫາຍ.
15 ໃຫ້ເຈົ້າພະຍາຍາມສຸດຄວາມສາມາດເພື່ອເປັນຄົນທີ່ພະເຈົ້າພໍໃຈ ເປັນຄົນງານທີ່ບໍ່ມີຫຍັງຕ້ອງອາຍ ແລະໃຊ້ຖ້ອຍຄຳຂອງເພິ່ນທີ່ເປັນຄວາມຈິງຢ່າງຖືກຕ້ອງ.+
16 ໃຫ້ຫຼີກລ່ຽງຄຳເວົ້າທີ່ບໍ່ມີປະໂຫຍດທີ່ໝິ່ນປະໝາດພະເຈົ້າ+ ຍ້ອນຄຳເວົ້າແບບນັ້ນຈະເຮັດໃຫ້ຄົນຖອຍຫ່າງອອກຈາກພະເຈົ້າຫຼາຍຂຶ້ນເລື້ອຍໆ.
17 ຄຳເວົ້າແບບນັ້ນຈະແພ່ລາມໄປຄືກັບບາດທີ່ເນົ່າເປື່ອຍ. ຮີເມນາໂອແລະຟີເລໂຕກໍລວມຢູ່ໃນພວກທີ່ແພ່ຄຳເວົ້າແບບນັ້ນຄືກັນ.+
18 ສອງຄົນນີ້ອອກໄປຈາກຄວາມຈິງແລ້ວ. ເຂົາເຈົ້າບອກວ່າການຄືນມາຈາກຕາຍເກີດຂຶ້ນແລ້ວ+ ແລະເຂົາເຈົ້າກຳລັງທຳລາຍຄວາມເຊື່ອຂອງບາງຄົນ.
19 ແຕ່ເຖິງຢ່າງນັ້ນ ຮາກຖານທີ່ແໜ້ນໜາທີ່ພະເຈົ້າວາງໄວ້ນັ້ນກໍຍັງຕັ້ງໝັ້ນຄົງຢູ່ ແລະມີຂໍ້ຄວາມທີ່ເປັນຄືກັບກາຈ້ຳຮັບຮອງຂຽນໄວ້ວ່າ: “ພະເຢໂຫວາ*ຮູ້ວ່າຜູ້ໃດເປັນຄົນຂອງເພິ່ນ”+ ແລະ “ໃຫ້ທຸກຄົນທີ່ອ້ອນວອນໂດຍອອກຊື່ຂອງພະເຢໂຫວາ*+ເຊົາເຮັດຊົ່ວ.”
20 ໃນເຮືອນຫຼັງໃຫຍ່ບໍ່ໄດ້ມີເຄື່ອງໃຊ້ທີ່ເປັນຄຳແລະເປັນເງິນເທົ່ານັ້ນ ແຕ່ຍັງມີເຄື່ອງໃຊ້ທີ່ເປັນໄມ້ແລະເປັນດິນເຜົານຳ. ເຄື່ອງໃຊ້ບາງຢ່າງເອົາໄວ້ໃຊ້ສຳລັບແນວທີ່ສຳຄັນ* ແຕ່ບາງຢ່າງກໍເອົາໄວ້ໃຊ້ສຳລັບແນວທີ່ບໍ່ສຳຄັນ.*
21 ດັ່ງນັ້ນ ຖ້າຜູ້ໃດຢູ່ໄກໆຈາກເຄື່ອງໃຊ້ສຳລັບແນວທີ່ບໍ່ສຳຄັນ ລາວຈະເປັນຄືກັບເຄື່ອງໃຊ້ສຳລັບແນວທີ່ສຳຄັນ ຖືກເຮັດໃຫ້ສະອາດແລ້ວ* ເປັນປະໂຫຍດຕໍ່ເຈົ້າຂອງ ແລະພ້ອມສຳລັບວຽກທີ່ດີທຸກຢ່າງ.
22 ດັ່ງນັ້ນ ໃຫ້ໜີໄປໄກໆຈາກຄວາມຕ້ອງການທີ່ມີໃນໄວໜຸ່ມສາວ ແຕ່ໃຫ້ພະຍາຍາມເຮັດສິ່ງທີ່ຖືກຕ້ອງ ມີຄວາມເຊື່ອ ມີຄວາມຮັກ ແລະມີສັນຕິສຸກນຳກັນກັບຄົນທີ່ຮ້ອງຫາຜູ້ເປັນນາຍດ້ວຍຄວາມບໍລິສຸດໃຈ.
23 ນອກຈາກນັ້ນ ຢ່າສົນໃຈການຖຽງກັນໃນເລື່ອງທີ່ບໍ່ເປັນປະໂຫຍດ+ ຍ້ອນເຈົ້າຮູ້ວ່າການຖຽງກັນແບບນັ້ນເຮັດໃຫ້ເກີດການຜິດຖຽງກັນ.
24 ທາດຂອງຜູ້ເປັນນາຍບໍ່ຄວນຜິດຖຽງກັບຜູ້ໃດ ແຕ່ຄວນສຸພາບອ່ອນໂຍນ*ຕໍ່ທຸກຄົນ+ ມີຄວາມສາມາດທີ່ຈະສອນ ຮູ້ຈັກຄວບຄຸມໂຕເອງເມື່ອມີຄົນເຮັດບໍ່ດີໃສ່+
25 ແລະສັ່ງສອນຄົນທີ່ບໍ່ເຊື່ອຟັງດ້ວຍຄວາມອ່ອນໂຍນ.+ ລາວຄວນເຮັດແນວນີ້ ຍ້ອນພະເຈົ້າອາດໃຫ້ໂອກາດເຂົາເຈົ້າກັບໃຈ*ແລ້ວຮັບເອົາຄວາມຮູ້ທີ່ຖືກຕ້ອງເລື່ອງຄວາມຈິງ.+
26 ເຂົາເຈົ້າອາດໄດ້ສະຕິແລະຫຼຸດພົ້ນຈາກກັບດັກຂອງມານຮ້າຍ ຍ້ອນມັນຈັບເຂົາເຈົ້າໄວ້ທັງໆທີ່ມີຊີວິດຢູ່ເພື່ອໃຫ້ເຮັດຕາມໃຈມັນ.+
ຂໍ
^ ຫຼືອາດແປວ່າ “ກິດຈະກຳໃນຊີວິດປະຈຳວັນ”
^ ເບິ່ງພາກຜະໜວກ ກ5
^ ເບິ່ງພາກຜະໜວກ ກ5
^ ຫຼື “ແນວທີ່ມີກຽດ”
^ ຫຼື “ແນວທີ່ບໍ່ມີກຽດ”
^ ຫຼື “ຖືກແຍກໄວ້ໃຫ້ເປັນຂອງພະເຈົ້າ”
^ ຫຼື “ຜ່ອນໜັກຜ່ອນເບົາ”
^ ຫຼື “ປ່ຽນໃຈ”
