Mungu adaru ri O’ba afa dria eyi ni. Eri ma e’doza yo dika asiza ni vini yo. (Zaburi 90:2) E’yo ba Biblia ma alea ’di Engaki eri vu. (1 Timoteo 1:11) Mungu ni idri fezu amani niri si, le ama ma inziki lu eri i a’dule.—Mi la E’yo Eceza 4:11.

’Ba ada azi alu ni neni nga Mungu ni ku a’dusikuni eri orindini, ifini eri uru tu aga afa o’baza dria nyaku dria ’diyi ra. (Yohana 1:18; 4:24) Te, Mungu ma egata azini trumu ama ecoki va afa erini o’ba ’diyi kisi ra. Ecetasi, patiefi azini mawua esele be ndundu ’diyi e’daki amani eri ma leta azini ondua. Wudrikuru ’di ma ambo ngopi’ari amani eri ma okpo e’da.—Mi la ’Ba Rumia ’Diyi 1:20.

Ama ecoki vini e’yo oni angiri Mungu ma dria Biblia ma laza si. Ecetasi, eri amani afa Munguni le ra ’diyi ki olu afa erini ngu onzi ’diyi pie, geri erini o’azu ’ba ada be ri pie, azini eri ma egata e’yo ndundu ma dria ’diyi pie.—Mi la Zaburi 103:7-10.

Yesu ’yo ’dini: ‘Ata amani ovupi ’buari, ru mini ma ovu inzizaru.’ (Matayo 6:9) Geri ’bani Mungu ni omvezu ’diyi ni tro ovuzu kakau ra ti, ru erini ri lu alu toko. Ti alu alu vusi, ’ba eri omve ndu ndu. Lugbara ti si ’ba eri omve “Yehova” i.—Mi la Zaburi 83:18.

Ru Munguniri ’ba nzeki Biblia kakau ma alea risi te pari nia ’baki Opi kaniku Mungu i. Te ’bani ndra Biblia sizu risi, ru Munguniri ndra alenia ogogo pale 7,000. Yesu fe ndra ru Munguniri ni ovuzu nizaru erini ’ba ki imbazu drinia risi.—Mi la Yohana 17:26.

Ocoko ’ba kakau ni isu ’di e’da di kini Yehova asi di amasi ku ’dini ya? ’Ba azi ’diyi ki ’yo kini Mungu ku ama ocoko nyazu ama o’bizu, te ’di ovuni e’yo ada ni ku.—Mi la Yakobo 1:13.

Mungu ni ’ba alu alu ruzu tu risi fe amani driwala peta pezu ri. Adaru ama o’akini ayikosi driwala peta pezu Munguni inzizu ’disi ku ya? (Yosua 24:15) Te ’ba kakau peki yini e’yo onzi ’diyi ki ’yezu ’ba azi ’diyi pi ma rua, ani ocoko fezu ’ba kakau yini. ’Ba ni ocoko nyazu ’dile ri candi fe Yehova ma asia tu.—Mi la E’doza 6:5, 6.

Yehova ni Mungu asipi amasi ra ri i. Le ama ma nyaki ayiko idri ma alea. Ace were eri nga ocoko dria de ra ’ba ocoko fepi amani ’diyi pie. Te sawa ’di ma alea ria, ku ocoko ni muzu drile asisile azi kilili ’dinile nisi. Imbata 8 ma alea, mi nga asisile ’dari ngoni’ari oni ra.—Mi la 2 Petero 2:9;3:7, 13.

Yehova ni ama a’i esizoru i vu enyia ogogo geri amani e’yo nzezu eri be izita ma alea risi. Eri ma asi ama alu alu ma dria. (Zaburi 65:2; 145:18) Eri ama otru ezata amani ma aleasi asi driasi. Sawa driasi eri okpo amani ’ba lezu eri inzizu ri ne, akaki tro e’de ra ti. Ani amani tro ovuzu eza’ba ni ra ti, ama ecoki ovu Mungu ma agyi kilili ni ru ra.—Mi la Zaburi 103:12-14; Yakobo 4:8.

Yehovani amani idri fezu niri si, le ama ma leki eri aga ’ba dria ra. (Marako 12:30) Mini di muzu drile leta mini Mungu ni lezu ri e’dazu mini e’yo onizu eri ma dria angiri risi azini mini e’yo erini lele mi ma ’ye ’diyi ki ’yezu risi, mi di nga sawa driasi ovu erivu enyia ogogo.—Mi la 1 Timoteo 2:4; 1 Yohana 5:3.