Mu ntangu yi ya technologie, mfumu’eto ya tisalu, mpwana’eto ya tisalu, peleko clients bazolo ti balenda mu lu tâka mbila ntangu ni ntangu, ku telefone.Tala ti ni buna wena mu bungu dia nge, dieka bo musamu wa mpasi wena kwe nge mu bâ na mabanza ma delakana mu tisalu na misamu mia nzo, mu zaba swasikisa mio miyôkele mfunu mu luzingu ntiana makwela maku.

•  Mio mi fweti zaba

•  Mabanza madelakana mu tisalu na luzingu lwaku

•  Mio mita tâ bantu ba kwelana

•  Ntwarisi ya timoko

• Technologie yilendi sa ti wayôkesa ntangu yayingi mu tisalu kani wayôkesa yo na muntu wu lwe ba kwelana. Buna, wamana baka appel, e-mail, peleko message bu lembolo ku tisalu, fweti sa keba.

  “Musamu wutariri kota ku nzo ha manima ma tisalu na mu yôkesa ntangu na kanda diaku wayika mwa mpasi bwawu bu, mu bungu ti e-mails na appel mbo bilulandaka tii ku nzo. Buna longo lweno ka luta vutu lwa kipa ko.”—Jeanette.

• Mu bâ na mabanza ma delakana mu tisalu na luzingu lwa kanda diaku, fweti tikambirilaka misamu. Tala ti kubêla na programe ko, tisalu tieno mbo tibonga tibuka tia longo lweno.

  “Vula-vula, ni muntu wutwe bakwelana tuvutu lembo kipaka wa ntete mu bungu ti mbo tutâka ti: ‘Oh, mbo kabakula kwa. Mbo kakundemvokela kwa. Mbo niyôkesa ntangu na yandi ha manima.’”—Holly.

• Tûla longo lwaku ha mbuka ya ntete. Bibila ditêle ti: ‘Bia vukasa Nzambi, muntu ka hambasandi.’ (Matie 19:6) Tala ti ka lubikila muntu nzila ko “wahambasa” longo lweno, mu bungu dia nti luta bikila tisalu nzila tialuhambasa?

  “Clients zakaka zibanzaka ti mu bungu ti mbongo batuhanaka, balendi tutâ mbila ntangu ni ntangu yi babâ neto nsatu. Mu bungu ti longo lwani ni tima tia ntete mu luzingu lwani, mbo nibatêlaka ti bilumbu bi nilembo salaka ka bakuntâkandi mbila, kâ mbo nikulu bamonekena.”—Mark.

  Tiyula: ‘Ngano mu nsalulu zani mbo nisongela ti longo lwani ni tima tiyôkele mfunu kwe meno ntete tisalu?’

• Kalakeno tisalu tala ti bulendi wufwanakane. Bibila ditêle ti: “Ndwenga kwe bô bazabaka ndilu zawu zena.” (Bingana 11:2) Tala ti ndilu zaku zazebi, mbo bakula ti ntangu zakaka fweti kalaka tisalu peleko fweti tia hana kwe muntu wakaka.

  “Meno plombier yena, buna tala ti muntu we kô we na nsatu lubakusu lwani mu ntinu ntinu, lwaka luvutu bâka nandi. Dieka bo tala ti ka ndiena na ntangu ko, kwe plombier yakaka nimuhungaka.”—Christopher.

  Tiyula: ‘Ngano ndendi kala tisalu tiatingi tisa ti namana tia tambula mbo tisongela kwe muntu wutwe wakwelana ti ka nita mu kipa ko? Ngano mbo kasingasa mvutu’ani?’

• Yôkesakeno ntangu mu tintwari. Bibila ditêle ti: “Ntangu ye kô mu misamu miamiansoni.” (Ekleziaste 3:1) Ni mu ntangu tisalu tieno tibâka tiatingi, lufweti yirikaka programe ya yôkesaka ntangu na munketo’eno peleko na bakala dieno.

  “Vula-vula, bu tubâka na tisalu tiatingi, mbo tuwisana mu yôkesa ntangu mu mbuka yi balembo tu sila vwandi, ni bu sa ti zeba tukwe zeba peleko mwa tima kwa tukwe dia.”—Deborah.

  Tiyula: ‘Ngano programe nikubikaka mu yôkesaka ntangu na mukento’ani peleko bakala diani mu mbuka yi balembo tu sila vwandi? Ngano mukento’ani peleko bakala diani mbo kasingasa mvutu yo?’

• Hondeno telefone zeno. Bibila ditêle ti: ‘Bakuleno bima biyôkele mfunu.’ (Bisi-Filipe 1:10, NWT) Ngano ntangu zakaka lulendi hondaka telefone zeno ngatu lwalembo baka message peleko mbila za tisalu tieno?

  “Nkatika ngolo nisarilaka mu manisa tisalu mu ntangu yifwanane. Ha manima ma ntangu yo, lwaza lwa telefone’ani nihondaka.”—Jeremy.

  Tiyula: ‘Ngano mutima’ani mbo wukuntumaka mu sisa telefone’ani ya namu ngatu mfumu’ani peleko client yibâ na nsatu ya meno? Ngano mukento’ani peleko bakala diani mbo kasingasa mvutu yo?’

•  Bêno na mabanza ma delakana. Bibila ditêle ti: “Bika tifu tieno tia bâka na mabanza ma delakana tiazabakana.” (Bisi-Filipe 4:5) Ntangu zakaka, tisalu tilendi kota mu longo lweno. Mu tifwani, tisalu tia mukento’eno peleko tia bakala dieno tilendi sa ti telefone’andi yabâ ya zibuka ni bu sa ti kata sala ko. Ka lulombandi kwe mukento’eno peleko kwe bakala dieno kabâ na mabanza ma delekana ma yôka.

  “Bakala diani compagnie katwarisaka, mpe ntangu zakaka fweti tambulaka mbila za ntinu-ntinu. Mbo nifwemaka ntangu zakaka, kâ ntono misamu mio mbo tuyôkesaka ntangu ha timosi.”—Beverly.

  Tiyula: ‘Ngano mbo nisongelaka kwe mukento’ani peleko kwe bakala diani ti yandi nita bakula mu tisalu tie nandi mpe ka nimusaka tiya ko ti kayôkesa ntangu na meno? Ngano mukento’ani peleko bakala diani mbo kasingasa mvutu yo?’

Ntete, muna muntu lendi dimbitila mu biyuvu ebi ku lweka lwandi. Ha manima, lulendi zonzela mvutu zi heni muna muntu.

• Ngano mukento’aku peleko bakala diaku, yandi weka nionga mu bungu dia tisalu ti lunataka ku nzo? Tala ti yee, ngano mpemba yabâ nandi?

• Mu ntia misamu lufweti sila ngolo, ngatu lwabâ na mabanza ma delakana mu tisalu na luzingu lwaku?

• Ngano mu nge musamu wa mpasi wena kwe mukento’aku peleko bakala diaku mu bika tisalu “ku tisalu”? Tala ti ni buna, ngano tifwani ta bambukila?

• Tala ti bulendi ba, ntia nsobolo ta zolo ti mukento’aku peleko bakala diaku kasa ngatu longo lweno lwabâ na mabanza ma delakana mu tisalu na luzingu lweno?