Bakristo mbo bakwikila ti Yezu wafwa mu bungu dia masumu ma bantu. (1 Piere 3:18) Kâ, mu vûka, ka wufweni’â ko kwa mu kwikila ti ni mvukisi’eto. Bademo bazebi ti Yezu ni “Mwana wa Nzambi,” kâ ka bavûka ko, fwa bafwa.​—Like 4:41; Yude 6.

•  Nti mfweti sa mu vûka?

•  Bwe tulendi tâ mu “lusambulu lwa nkwa masumu”?

•  Ngano “lusambulu lwa nkwa masumu” kwe lwatûka?

•   Fweti kwikila ti Yezu wahana luzingu lwandi mu bungu dia masumu meto. (Bisalu 16:30, 31; 1 Za 2:2) Fweti kwikila mpe ti Yezu muntu wa matieleka weri mpe misamu miamiansoni mi tâka Bibila mu yandi mia matieleka miena.

•   Longa mio mi longesaka Bibila mu matieleka. (2 Timote 3:15) Bibila ditêle ti ntumwa Paulo na Silase batêla muntu weri ba kengerelaka ku boloko ti: ‘Kwikila Mfumu Yezu, mbo vûka.’ Ha manima ni babatika mu longesa “Zu dia Yehova” a kwe muntu wûna. (Bisalu 16:31, 32) Wusongele ti muntu wûna weri kengerelaka boloko ka keti’â kwikila mu Yezu ko tala ti ka toko’â bakula ndongosolo ya Zu dia Nzambi ko. Wafweti bâ na luzabu lwa matieleka lwa Zu dia Nzambi.​—1 Timote 2:3, 4.

•   Soba mabanza. (Bisalu 3:19) Fweti soba mpe mabanza, peleko fweti bâ na tiari tiatingi mu misamu mia mbi mi weri banzaka na mi weri yirikaka mu ntama. Nsobolo’aku ya mabanza mbo yimoneka ha meso ma bantu bakaka bu bika mu yirika misamu mi lembo zoloko Nzambi mpe bu bâ na “ndiatulu yidelakane na nsobolo ya mabanza.”​—Bisalu 26:20.

•   Batusu. (Matie 28:19) Yezu watâ ti bô bakwizi bâ milongoki miandi bafweti batusu. Muntu weri kengerelaka bokolo wu tuzonzele ku mbatukulu wayizi batusu. (Bisalu 16:33) Mpila mosi mpe, ntumwa Piere bu kamana longesa matieleka matariri Yezu kwe bantu babingi, “bô batambula zu diandi na nsayi yayansoni bayizi batusu.”​—Bisalu 2:40, 41.

•   Tumamana mitieno mia Yezu. (Bahebre 5:9) Bô ‘bakêlaka misamu miamiansoni’ mia tuma Yezu mbo basongelaka mu mbelo’awu ti milongoki miandi miena. (Matie 28:20) “Bantu basarilaka Zu” bakwizi bâka.​—Zaki 1:22, NWT.

•   Korela tii ku nsuka. (Marke 13:13) Milongoki mia Yezu “mifweti korela” ngatu bavûka. (Bahebre 10:36) Mu tifwani, bu kayizi bâ Mukristo, ntumwa Paulo watatamana mu tumamana mu ndongosolo za Yezu mpe watatamana mu bâ wa kwikima kwe Nzambi. Ntono mpasi, wakorela tii ku lufwa.​—1 Bisi-Korente 9:27.

 Mu mabundu makaka, bantu bisambu ntiana “lusambulu lwa nkwa masumu” na “lusambulu lwa mvukulu” basaka. Mu bisambu biango mbo batambulaka ti, ba nkwa masumu bêna mpe mbo batâka ti Yezu wafwa mu bungu dia masumu mawu. Kwe Yezu mpe balombaka ti kakota mu mitima miawu na mu luzingu lwawu. Kâ Bibila ka dizonzelaka ko mpe ka ditumaka ko tasa “lusambulu lwa nkwa masumu.”

 Bantu babingi babanzaka ti bu bamana sa “lusambulu lwa nkwa masumu,” lukwikulu lwe nawu mu vûka mankululu. Kâ, ka kwena lusambulu ko luvukisaka. Bu twena bantu basumu, masumu tutatamanaka mu sa. (1 Za 1:8) Ntiangu Yezu kalongesa kwe milongoki miandi mu vulu sambilaka mu lomba mulemvo wa masumu meto. (Like 11:2, 4) Musamu wakaka, Bakristo bakaka baketi vûka mankululu ka bavutu’â vûka ko mu bungu ti babika mu tumamana Nzambi.​—Bahebre 6:4-6; 2 Piere 2:20, 21.

 Bantu batsonekaka misamu mia ntama ka bahanaka mvutu yimosi ko mu tiyuvu tio. Bakaka banzaka ti tifu tia tâka “lusambulu lwa nkwa masumu” tia batika mu ntangu dimbundu dia Misioni diabutuka. Bakaka bakwikilaka ti bantu ba mambundu ma 1700 na 1800 babatika mu saka “lusambulu lwa nkwa masumu”. Ni bu sa ti ni buna wena, Bibila ka ditâka ko ti tasa “lusambulu lwa nkwa masumu.” Ka ditâka ko mpe ti takarilaka bisambu bi batitsonekena.