Lusambulu lwa Tata’eto beto lusongerelaka bwe tulendi sambila mpe nti tulendi lomba mu tusambulu tweto. Yezu wahana mvutu kwe milongoki miandi bu miamuyûla: “Mfumu, tu longesa mu sambila.” (Like 11:1) Kâ Nzambi ka tambulaka ko kwa lusambulu lwa Tata’eto. a Yezu wahana tusambulu to ntiana tifwani tia tusambulu tuwâka Nzambi.

Mu timoko ti

•  Ngano lusambulu lwa Tata’eto bwe lutâka?

•  Ngano lusambulu lwa Tata’eto bwe luzolo tâka?

•  Ngano mpila ya yimosi ya sambila, ni mu kârila lusambulu lwa Tata’eto?

•  Bwe tufweti sambila?

•  Tusambulu twakaka twe mu Bibila

 Lusambulu lwa Tata’eto lwe mu Matie 6:9-13, mu mpila ya swaswana ba tâka lo mu mbangululu zazingi za Bibila. Tabongeno bifwani biole.

 Traduction du monde nouveau: “Tata’eto we ku mazulu, bika nkumbu’aku yabâ ya santu. Bika Timfumu tiaku tizi. Bika luzolo lwaku lwasalama ha mutoto ntiana kwa ku zulu. Tuhana bwawu bu bidia beto bia lumbu ti; mpe tulemvokela masumu meto, ntiana beto mpe tulemvokelaka bantu batusaka bubi. Mpe kutukotesandi mu ntontolo, kâ tu kûla mu nkwa-mbi.”

 BÎBILA KIA KINTUÂDI: ‘Tata’eto wê ku zulu sa nkumbu’aku yatumbu. Sa timfumu tiaku tizi, kanso bu zololo bwabe ha nsi mpila mosi bu bwe ku zulu. Tuhana bwawu bu bidia bieto bia lumbu ti. Yambula masumu meto, mpila mosi bu tuyambulaka mfuna kwe bô batusafuri. Kutukotesandi mu ntontolo, kâ tu kakula mu mbi.’ b

 Mu bungu ti misamu mia longesa Yezu miakwelana na Matsonoko makaka ma Santu, buna tulendi tâ ti mabuku makaka ma Bibila malendi bakisa mu bakula lusamulu lwa Tata’eto.

“Tata’eto we ku mazulu”

 Wudelakane mu tâ mbila Nzambi mu “Tata’eto” mu bungu ti ni Yandi watusala mpe ni Yandi watuhana luzingu.—Izaya 64:8.

“Bika nkumbu’aku yabâ ya santu”

 Nkumbu ya Nzambi, Yehova, bafweti ya zitisa mpe bafweti ya bongela ntiana ya santu peleko ya longo. Bantu mbo basaka ti nkumbu ya Nzambi yabâ ya santu bu bazonzelaka bifu bia Nzambi na bu bazabikisaka makani mandi.—Mikunga 83:18; Izaya 6:3.

“Bika Timfumu tiaku tizi”

 Timfumu tia Nzambi guvernema yena ye ku zulu, mpe Yezu ni Mutinu wa Timfumu tio. Yezu watulongesa mu sambila ngatu Timfumu tio tiayâla mutoto wawansoni.—Daniele 2:44; Nzabukusu 11:15.

“Bika luzolo lwaku lwasalama ha mutoto ntiana kwa ku zulu”

 Ntiana kwa ku zulu ku lembolo mbi na lufwa, Nzambi zololo ti bantu babâ ha mutoto mankululu mu tidzunu na kondo kwa bunkuta.—Mikunga 37:11, 29.

“Tuhana bwawu bu bidia beto bia lumbu ti”

 Mu ntangu ya Yezu, dimpa nkatika mfunu diabâ. Ka tuzimbakanandi ti tufweti sikirila Mvangi’eto, mu bungu ti ni Yandi tuhanaka bio bie neto nsatu mu zinga.—Bisalu 17:24, 25.

“Tulemvokela masumu meto, ntiana beto mpe tulemvokelaka bantu batusaka bubi”

 Ntêlo ya Greke yibabanguri mu “masumu” mu verse yi yizololo tâ “mfuka”. (Matie 6:12, note; Like 11:4) Bantu babansoni masumu basaka mpe nsatu ye nawu babalemvokela. Kâ, tala ti tuzololo ti Nzambi katulemvokela, beto mpe tufweti bâ ba kubama mu lumvokela masumu ma bantu bakaka.—Matie 6:14, 15.

“Kutukotesandi mu ntontolo, kâ tu kûla mu nkwa-mbi”

 Kani kabwe Yehova kalendi’â katutonta ko ngatu tayirika mbi. (Zaki 1:13) Kâ wo tu tontaka ni “munkwa-mbi,” Satana, Diabulu—wo wubatâka mpe “Wo tontaka.” (1 Za 5:19; Matie 4:1-4) Kwe Yehova tulombaka katubakisa mu mu tumama bu tubwabanaka na ntontolo ya sa tima tia mbi.

 Lusambulu lwa Tata’eto, tifwani tiena tia hana Yezu. Ka wena ko ti takârilaka ntêlo zo. Ntete katâ lusambu lwa Tata’eto, Yezu wahana ndwengosolo eyi: “Bu lusambilaka, ka lukârilakandi misamu mimosi ntangu zazansoni.” (Matie 6:7) Bu kavutu hana tifwani tia lusambulu mu mbala yakaka, yandi wasarila ntêlo za swaswana.—Like 11:2-4.

 Mpila yi yôkele bubote mu sambila ni mu tâ kwe Nzambi na bunsungu mio mi tubanzaka na mio mi tumonaka ku mutima.—Mikunga 62:8.

 Lusambulu lwa Tata’eto tifwani tia mbote lutuhanaka mu mpila yi tufweti sambila ngatu Nzambi katuwâ. Tala bwe luta delakana na mio mi tâka verse zakaka za Bibila mu lusambulu.

•   Nzambi kwa tufweti sambila

   Verse: “Kâ mu misamu miamiansoni, mu lusambulu na mu ndiyawululu, mpe na lusambulu lwa matondo, zabikiseno ndombolo zeno kwe Nzambi.”—Bisi-Filipe 4:6.

   Nsasa: Kwe Nzambi tufweti tâ tusambulu tweto—ka kwe Yezu’â ko, kwe Mariya, ko, peleko kwe basantu. Mu bungu ti lusambulu lwa Tata’eto mu, “Tata’eto,” lubatikilaka, wutusongele ti ni Yehova kwa tufweti sambila.

•   Sambila mu bungu dia bima bie tintwari na luzolo lwa Yehova

   Verse: “Tala ti tumulombele tima mu luzolo lwandi, beto kawâka.”—1 Za 5:14.

   Nsasa: Tulendi sambila mu bungu dia tima ni tima tie mu luzolo lwa Nzambi. Yezu walongesa mfunu ya luzolo lwa Nzambi bu katûla ntêlo ya “bika luzolo lwaku lwasalama ha mutoto.” Tulendi zaba luzolo lwa Nzambi mu bungu dia mutoto na bantu bu tukwe longoke Bibila.

•   Sambila mu bungu dia nsatu zeto

   Verse: “Losa dema diaku kwe Yehova, mpe Yandi mbo kakubakisa.”—Mikunga 55:22.

   Nsasa: Nzambi nsatu zeto kabelokelaka lwaka. Ntiana kwa Yezu kazonzela nsatu zeto zazingi mu lusambulu lwa “Tata’eto”, tulendi sambila Nzambi mu kipa nsatu zeto za tinsuni za bilumbu biabiansoni, katutwarisa bu tubongaka nzengolo za mfunu, katubakisa mu ntangu za mpasi, mpe kalemvokela masumu meto. c