Madián na Marcela bima biabiansoni bia tinsuni bieri nawu nsatu mu luzingu, biabâ nawu ku Medellín, hata dimosi dia ku Colombie. Tisalu tia Madián mbongo zazingi keri tia bakilaka, mpe tiasa ti kabêla mu nzo ya toma. Kâ, tima tie kô tiayizi sa ti bavutu taluzula misamu miyôkele mfunu kwe bawu mu bungu ti bisari bia Yehova biena. Bawu batêle ti: “Mu 2006 tayenda ku lukutakanu lwa tizunga lweri na mutu-diambu “Gardez l’œil simple.” Binzonzi biabingi biatutindisa mu bâ na luzingu lulembolo nkaka ngatu tatomo sarila Nzambi. Ha manima ma lukutakanu, tayizi bakula ti ka tweri diatilaka mu mpila yo ko. Tifu tieri neto tia vulu sumbaka bima ntangu zazansoni; bu tweri lembo bâka na mbongo zifwanakane mu sumba bio, mfuka tweri kotaka.”

Binzonzi bia lukutakanu lwa tizunga biasa ti, Madián na Marcela batambula ti wafwanakana basa nsobolo, ntiangu babatika mu katula bima bieri saka nkaka mu luzingu lwawu. Bawu batêle ti: “Tabatika mu lembo vutu dukisaka mbongo zazingi, taye bâ mu nzo ya fioti, tayizi teka kaminio’eto, mpe tayizi sumba moto.” Kâ mpe, bawu bayizi bika mu kwendaka mu magazin ngatu balembo baka nsatu ya sumba bima. Bawu bayizi batika mu yôkesaka ntangu yayingi mu zonzelaka Bibila kwe bampwana’awu. Mpe, bayizi sa tindiku na mpangi zeri mipasusi-nzila mia minene mie na luhemo. *

Ka ntama ko, Madián na Marcela babongele nzengolo ya kurisa tisalu tiawu tia samuna mu kwe bakisa timvuka tia fioti tita dingana bisamuni tie ku hata dimosi. Buna, baye bâ kûna. Madián wayizi bika tisalu tiandi. Mfumu’andi ya ku tisalu yayizi banza ti bulawuki bweri mu tumaka kakatuka ku tisalu. Ntiangu Madián kayindula nandi, mpe wamuyula: “Mbongo zazingi bakaka, ngano mu nsayi wena?” Watâ ti keri’â na nsayi ko, mu bungu ti misamu miamingi mieri nandi mi keri lembo lendaka mu yirika. Ha manima wamutêla ti: “Buna musamu wuyôkele mfunu mu luzingu ka mbongo’â ko zazingi zi bakaka. Musamu wuyôkele mfunu ni mu zaba mio mitomo ku tâ nsayi. Bu tukwe longese bantu misamu mitariri Nzambi, meno na mukento’ani nsayi yibâka neto, mpe tuzololo tasarila ntangu yayingi mu sala tisalu tio mu bâ na nsayi yayingi.”

Madián na Marcela bayizi baka nsayi ya matieleka mu bungu ti makani ma timpeve bakwe landi. Mu mvula 13 ziyôkele, bayizi sala mu bimvuka bia binene bieri dinganaka bisamuni ku nord-est ya Colombie. Mpe bwawu bu bweso bwe nawu bwa bâ mipasuri-nzila mia minene.