Ngindu zabendomoka: Wau vo Mbangi za Yave ke Akristu ko i kuma ke bekembelelanga Nduta ko.

 Ludi: Tukwikilanga vo Yesu Kristu i Mvuluzi eto, tuvanganga wawonso muna “landa muna ntambi zandi.”—1 Petelo 2:21; Luka 2:11.

 Ngindu zabendomoka: Ke nukwikilanga ko vo Yesu wafulwa muna mafwa.

 Ludi: Tukwikilanga muna lufuluku lwa Yesu; tuzeye wo vo i mbut’a diambu muna lukwikilu lwa Akristu ye tutoma lo vovelanga muna salu kieto kia umbangi.—1 Korinto 15:3, 4, 12-15.

 Ngindu zabendomoka: O wan’eno bevidisanga e lau dia mona e kiese kikalanga muna nkinzi a Nduta, ke dikunutokanesanga ko.

 Ludi: Tutoma zolanga wan’eto ye tuvanganga mawonso muna kubalonga yo kubasadisa kimana bakala ye kiese.—Tito 2:4.

•   O nkinzi a Nduta ukembelelwanga o unu ke uyikwanga muna Nkand’a Nzambi ko.

•   Yesu wakanikina vo twayindulanga lufwa lwandi, ke lufuluku ko. Konso mvu tuyindulanga lufwa lwandi mun’owu wa manaka ma Nkand’a Nzambi.—Luka 22:19, 20.

•   Oyeto tukwikilanga vo e Nduta ikembelwanga mu lumbu yeto mu nkinzi miankulu mia mawuta yatuka, o Nzambi ke tondanga yo ko. Nzambi ovavanga vo ‘twasambila kaka yandi.’ Otoma kendalalanga mu kuma kia nsambila zisadilanga mavangu mana kemenganga.—Luvaiku 20:5; 1 Ntinu 18:21.

 Tukwikilanga vo e nzengo zeto za lembi kembelela e Nduta za mu Nkand’a Nzambi ukutukasakesanga vo twasadila “ngangu zavimpi ye ndwenga,” ke mu landa tusansu twa wantu ko. (Ngana 3:21; Matai 15:3) Ekolo tusamunanga kw’akaka oma tukwikilanga mu kuma kia Nduta, tuzitisanga mpe o nswa wa konso muntu wa sola dina kevanga.—1 Petelo 3:15.