Akwa ngangu bavwidi kuma kiasikila mu kwikila vo Yesu wazinga kikilu ova nza. Mu kuma kia dina bavova asoneki a lusansu muna tandu kiantete ye kiazole mu kuma kia Yesu y’Akristu a tandu kiantete, o nkanda Encyclopaedia Britannica wa mvu a 2002 uvovanga vo: “Tusansu twatu twa wantu akaka tusonganga vo, kuna nz’ankulu kana nkutu atantu a Kikristu ke bafidisa lusansu lwa Yesu mpaka ko. O lusansu lwa Yesu lwayantika fidiswa mpaka kuna mfoko a tandu kia 18, muna tandu kia 19 ye kuna lubantiku lwa tandu kia 20.”

 Muna mvu a 2006, o nkanda Jesus and Archaeology (Yesu ye Asatuludi) wavova vo: “O unu, ke vena nkwa ngangu ko on’otoma zitiswanga lenda katikisa vo Nyuda una ye nkumbu a Yesu wa mwan’a Yosefe wazinga kikilu. Ndonga bekwikilanga vo owau mayingi tuzeye mu kuma kia mavangu ye malongi ma Yesu.”

 Nkand’a Nzambi usonganga vo Yesu muntu a kieleka. Uyikanga e nkumbu z’akulu ye yitu yandi. (Matai 1:1; 13:55) Uyikanga mpe nkumbu z’ayadi bakala muna lumbu ya Yesu. (Luka 3:1, 2) Nsangu zazi zisadisanga afimpi a mambu mu bakula e ziku kia lusansu lwa Nkand’a Nzambi.