Vava Bibila kisadilanga o mvovo “katula vumu,” ke kisadilanga mvovo wau ko mu yika vangu dia katula vumu kuna lukanu. Kansi, sono yayingi ya Bibila isonganga e ngindu za Nzambi mu diambu ditadidi moyo a muntu, kumosi yo moyo a mwana una muna vumu kia ngudi andi.

 O moyo lukau lwa Nzambi. (Tuku 9:6; Nkunga 36:9) Nzambi obadikilanga e mioyo miawonso vo miantalu, kumosi yo moyo a mwana una muna vumu kia ngudi andi. Ozevo, o katula e vumu kuna lukanu, diau dimosi kwandi yo vonda muntu.

 O Nsiku Nzambi kavana kwa Aneyisaele wavovanga vo: “Avo wantu benuananga, balumbamene nkento una ye vumu, o mwan’andi kavaika lembi lungila ngonde, kansi ke vabwidi sumbula kia lufwa ko, ndiona owandamene o nkento kafwete futa vana meso ma afundisi konso kina kelombwa kwa yakala divuidi o nkento. Kansi avo vabwidi sumbula kia lufwa, kafwete vana moyo mu moyo.”—Luvaiku 21:22, 23. a

•  Nkia ntangwa o moyo a muntu uyantikanga?

•  Nga Nzambi ololoka muntu wakatula kala e vumu?

•  Nga diambi mu katula e vumu avo moyo a ngudi yovo wa mwana mu vonza wina?

 Kuna kwa Nzambi, o moyo a muntu uyantikanga vava o ngudi keyimitanga. Muna Bibila, nkumbu miayingi Nzambi oyikilanga mwana una muna vumu kia ngudi andi vo muntu kieleka. Yambula twabadika yaka nona isonganga vo Nzambi mpila mosi kebadikilanga o moyo a mwana una muna vumu kia ngudi andi yo moyo a mwana owutukidi kala.

•   Muna lusadisu lwa mwand’avelela, Davidi wa Ntinu wavova kwa Nzambi vo: “Meso maku mambona vava yakala muna vumu.” (Nkunga 139:16) Nzambi wabadikilanga Davidi vo muntu kieleka vitila nkutu kawutuka.

•   Vitila Yeremiya wa ngunza kawutuka, Nzambi wakubika kala kiyekwa kiamfunu kadi kumvana. Nzambi wavova kwa Yeremiya vo: “Una kiavangidi ko muna vumu kia ngudi aku yazaya, una kwawutukidi ko yavaula. Yakitula se ngunza kuna kwa zula.”—Yeremiya 1:5.

•   Luka, mosi muna awana basoneka e Bibila ye ngang’a mawuku, wasadila mvovo wau mosi wa Kingerekia mu yika mwana una muna vumu kia ngudi andi yo mwana owutukidi kala.—Luka 1:41; 2:12, 16.

 Awana bakatula kala e vumu balenda lolokwa kwa Nzambi. Avo muntu okwikidi muna ngindu za Nzambi mu diambu ditatididi moyo, ke dina diaka mfunu ko mu kuyitumba mu kuma kia diambu kavanga. Bibila kivovanga vo: “Yave nkwa nkenda ye ngemba . . . Wauna wavavukila e fulu kivaikilanga e ntangwa ye fulu kidimukinanga e ntangwa, i una kasididi o masumu meto kwandá.” b (Nkunga 103:8-12) Yave ololokanga awonso bevilukanga kieleka ntima kumosi y’awana bakatula vumu.—Nkunga 86:5.

 Landila mana Bibila kivovanga mu kuma kia moyo a mwana una muna vumu, diambi mu katula vumu kana nkutu vo moyo a ngundi yovo wa mwana mu vonza wina.

 Adieyi tuvova, avo moyo a ngudi ye wa mwana mu vonza wina ye madotolo bayuvuidi kana moyo a nani bevuluza? Awana babwidilu diambu diadi yau kibeni bafwete baka e nzengo.