Nsiku 18:1-22
18 “Angang’a Anelevi, kana nkutu i kanda diawonso dia Levi, ke dikala ye kunku ko yovo vua kumosi ye Isaele. Oyau bedia tukau tutambikwa kwa Yave vana tiya, tuna vo i vua diau.+
2 Ozevo, ke bafwete kala ye vua ko vana vena e mpangi zau. O Yave i vua diau, wauna kabavovesa.
3 “Anganga bekala yo nswa wa tambula lekwa eyi kwa nkangu: Konso muntu okela kimenga, kiakala kia ngombe yovo meme, kafwete vana kwa nganga: tó kia koko, matokolo yo lukutu.
4 Eyi yantete muna mbwaza zaku, muna vinyu aku yampa, muna mazi maku ye mika miantete misakwa muna kambi diaku, ofwete mio vana kwa yandi.+
5 Yave wa Nzambi aku unsolele yo wan’andi amakala vana vena makanda maku mawonso mu sadila muna nkumbu a Yave yakwele mvu.+
6 “Kansi avo Nlevi okatukidi mu mbanza imosi muna mbanza zaku muna Isaele muna kazingidinge+ ye ozolele* kwenda kuna fulu kina Yave kesola,*+
7 olenda sadila kwakuna muna nkumbu a Yave wa Nzambi andi wauna e mpangi zandi zawonso bevanganga, Anelevi, ana besadilanga vana ndose a Yave.+
8 Otambula kunku kia madia kiafwanana ye kia mpangi zandi,+ vana ntandu a ina ketambula vava keteka e vua dia akulu andi.
9 “Vava okota muna nsi ina Yave wa Nzambi aku kekuvana, kuvavi tanginina ko mavangu mangemi ma zula yoyo.+
10 Ke vafwete soloka muntu ko vovo wina oyoka* mwan’andi ayakala yovo mwan’andi ankento vana tiya,+ otá ngombo,+ vanga mavangu ma nkisi,+ sasila sinsu,+ ndoki,+
11 yovo muntu ovandila nkwandi nkisi yovo vava ngang’a matombola+ yovo ngang’a ngombo+ yovo muntu ovavanga mokena yo mafwa.+
12 Kadi, konso ona ovanganga mambu mama wangemi kuna kwa Yave, mu kuma kia mambu mama mangemi, o Yave wa Nzambi aku i kayingila e zula yoyo ova ntadisi aku.
13 Ofwete kondwa lusembo vana ntadisi a Yave wa Nzambi aku.+
14 “Kadi e zula ina oyinga, nganga za nkisi+ ye nganga za ngombo+ bawilanga, kansi o Yave wa Nzambi aku kayambwidi ko wavanga konso diambu dia mpila yayi.
15 Yave wa Nzambi aku okuvaikisila ngunza nze mono vana vena e mpangi zaku. Nufwete kunwila.+
16 Kadi i diambu diadi walomba kwa Yave wa Nzambi aku kuna Korebe muna lumbu kina nuakutakana,*+ vava wavova vo: ‘Kungiambula ko yawá e nding’a Yave wa Nzambi ame ngatu mona diaka tiya twatu twampwena, kimana yalembi fwa.’+
17 I bosi, Yave wampovesa vo: ‘Dina bavovele diambote.
18 Ikubavaikisila ngunza nze ngeye vana vena e mpangi zau,+ isia e mvovo miame muna nu’andi,+ oyandi okubazayisa mawonso mana ikunkanikina.+
19 Kieleka, ifundisa o muntu olembi wila mvovo miame mina kevova muna nkumbu ame.+
20 “‘Avo ngunza ovovele diambu ye lulendo muna nkumbu ame dina kinkanikini ko yovo kavovela mu nkumbu a nzambi zankaka, o ngunza ndioyo kafwete fwa.+
21 Kansi, nanga olenda kiyuvula muna ntim’aku vo: “Aweyi tuzayila vo ke Yave ko ovovele mvovo miami?”
22 Avo ngunza ovovele muna nkumbu a Yave, e diambu ke divangamene ko yovo ke dilunganene ko, ozevo ke Yave ko ovovele diambu diodio. O ngunza ndioyo ku lulendo kavovele dio. Ke numweni wonga ko.’
Mvovo vana yand'a lukaya
^ Yovo “o moyo andi uzolele.”
^ I sia vo, e fulu kina Yave kesola kiakala se fulu kiasambila.
^ Mvovo wa sina: “oviokesela.”
^ Yovo “kia lukutakanu.”