Kuna kwa Esi Ngalatia 3:1-29
3 E mazowa ma esi Ngalatia! Nani unuvukumwini muna diambu diadi diambi,+ oyeno nuatoma sasilwa oma ma Yesu Kristu wakomwa vana nti?+
2 Diambu dimosi nzolele kunuyuvula:* Nga mu mavangu ma nsiku nuatambulwila mwanda yovo muna lukwikilu lwa mana nuawa?+
3 Nga nu mazowa kikilu e? Wau vo muna mwanda nuayantikila, nga nuzolele manisina muna kinitu e?+
4 Nga mu nkatu kwandi nuamwena e mpasi zayingi e? Ngina ye ziku vo ke mu nkatu ko nuamwena zo.
5 Dianu vo, ndiona okunuvananga mwanda yo vanga mavangu mankuma+ vovo nuina, nga mu kuma kia mavangu meno ma nsiku kevangilanga wo yovo muna lukwikilu lweno muna mana nuawa?
6 Wauna Abarayama “kakwikidila muna Yave,* i dianu kabadikilwa vo muntu ansongi.”+
7 Nutomene dio zaya vo awana bena ye lukwikilu i wan’a Abarayama.+
8 E sono kiateka songa vo muna lukwikilu o Nzambi i kelungisila esi zula, e nsangu zambote zateka samunua mpe kwa Abarayama, oku vo: “Omu ngeye i musambulwilwa e zula yawonso.”+
9 I dianu vo, awana bena ye lukwikilu besambulwanga kumosi yo Abarayama ona wakala ye lukwikilu.+
10 Awonso ana besiang’e vuvu muna mavangu ma nsiku, basibwa, kadi diasonama vo: “Wasibwa konso ona olembi sikila muna mawonso masonama muna nkand’a Nsiku muna lembi mo vanga.”+
11 Kansi, kuna kwa Nzambi ke mosi ko olungisilwa muna nsiku,+ kadi “o nsongi muna lukwikilu i kekadila o moyo.”+
12 O Nsiku ke watuka muna lukwikilu ko. Kansi, “konso ona ovanganga mambu mama, i mûna kekadila o moyo.”+
13 Kristu watusumba,+ watukatula+ muna sibu kia Nsiku wau kakituka se muntu wasibwa vana fulu kieto, e kuma kadi diasonama vo: “Wasibwa konso ona omanikinu vana nti.”+
14 Ediadi diavangama kimana esi zula batambula e nsambu za Abarayama muna Kristu Yesu,+ oyeto twatambula nsilu a mwanda+ muna lukwikilu lweto.
15 Ampangi, nsadidi nona ya mambu ma wantu muna vovana yeno: Avo e kangu dikangilu, kana nkutu kwa muntu mosi kaka, kavena muntu ko olenda dio fwasa yovo kudikila mo diambu.
16 Kuna kwa Abarayama kwasilwa e nsilu ye mbongo andi.+ Ke uvovanga ko vo, “kwa mbongo zaku,” vika sia vo zayingi. Kansi uvovanga vo, “kwa mbongo aku,” ina vo muntu mosi, i Kristu.+
17 Edi mpovele: Entete, Nzambi wakanga e kangu, vava kiavioka mvu 430,+ wasikidisa Nsiku, kansi o Nsiku ke wafwasa e kangu diadi ko ye nsilu.
18 Kadi avo e vua muna nsiku diasikidisilwa, o nsilu ke una diaka mfunu ko; kansi o Nzambi muna nsilu kavanina dio kwa Abarayama.+
19 Ozevo, ekuma kiasilwa Nsiku? Wakudikilwa muna senzeka masumu+ yavana kikwiza e mbongo+ ina yasilwa nsilu; ambasi batambula nsiku+ yo zayisa wo kwa nkambami.*+
20 Kavena nkambami* ko muna diambu dia muntu mosi, kansi Nzambi mosi kaka.
21 Ozevo, nga Nsiku nsilu mia Nzambi utelamenanga? Ke wau ko! Kadi avo nsiku wasiwa kimana wavana moyo, o wantu muna nsiku belungisilwanga.
22 Kansi e Sono kiayekola wantu awonso muna wisa kia sumu, kimana o nsilu una muna lukwikilu muna Yesu Kristu wavewa kw’awana bekwikilanga.
23 Kansi, vava lukwikilu ke lwayiza ko, o nsiku watutanina, wau twakala muna wisa kiandi, twavingilanga lukwikilu luna lwadi sengomonua.+
24 Dianu vo, o Nsiku wakituka se nlongi* eto ona watufila kwa Kristu,+ kimana twalungisilwa muna lukwikilu.+
25 Kansi, wau lukwikilu lwizidi,+ ke tuna diaka muna wisa kia nlongi* ko.+
26 Dianu vo, yeno awonso nu wan’a Nzambi+ muna kuma kia lukwikilu lweno muna Kristu Yesu.+
27 Kadi yeno awonso nuavubilwa muna Kristu, nuavuata Kristu.+
28 Ke vena Nyuda ko ngatu Mungerekia,+ ke vena ntaudi ko ngatu mvevoki,+ ke vena yakala ko ngatu nkento,+ kadi yeno awonso nu mosi muna Kristu Yesu.+
29 Ozevo, avo kwa Kristu nuvuilu, nu mbongo a Abarayama kikilu,+ nutambula e vua+ mun’owu wa nsilu.+
Mvovo vana yand'a lukaya
^ Mvovo wa sina: “zaya kwa yeno.”
^ Muna Kingerekia, mvovo wau uyikanga muntu owizanesanga buka yole.
^ Muna Kingerekia, mvovo wau uyikanga muntu owizanesanga buka yole.
^ Yovo “nkengi.”
^ Yovo “nkengi.”
