Luvaiku 6:1-30
6 Muna kuma kiaki, Yave ovovese Mose vo: “Owau omona dina ivanga kwa Faro.+ O koko kwame kwankuma kukunkomekena kabasindika, o koko kwame kwa nkuma kukunkomekena kabayinga mu nsi andi.”+
2 Nzambi ovovese Mose vo: “Mono i Yave.
3 Yamonekanga kwa Abarayama, Isaki yo Yakobo se Nzambi a Mpungu-ngolo,+ kansi muna diambu dia nkumbu ame, Yave,+ kiakizayisa kwa yau ko.+
4 Yasikidisa mpe e kangu diame yo yau dia kubavana e nsi ya Kenani, e nsi ina bazingila se anzenza.+
5 Mono kibeni ngwidi e bumu kia nkangu a Isaele, ana bebundunuanga kwa esi Engipito ye nsungamen’e kangu diame.+
6 “Muna diadi, vovesa Aneyisaele vo: ‘Mono i Yave; ikunukatula muna salu yangolo ya esi Engipito yo kunuvevola muna ubundu,+ ikunukûla yo koko kwalambuka* yo vana esi Engipito e tumbu kianene.+
7 Ikunubonga se nkangu ame, ikala se Nzambi eno,+ nuzaya kieleka vo mono i Yave wa Nzambi eno, ona unukatwidi kuna nsi a mazitu ma esi Engipito.
8 Ikunufila kuna nsi yadila e ndofi* vo ivana yo kwa Abarayama, Isaki yo Yakobo, ikunuvana yo se vua dieno.+ Mono i Yave.’”+
9 I bosi, Mose ozayisi e nsangu zazi kwa Aneyisaele, kansi ke bawididi Mose ko mu kuma kia lukendalalu ye mbundunua babundunuanga.+
10 Yave ovovese Mose vo:
11 “Wenda kota kwa Faro, wa ntinu a Engipito, unzayisa kavaikisa Aneyisaele mu nsi andi.”
12 Kansi, Mose ovutwidi kwa Yave vo: “Tala, Aneyisaele nkutu ke bangwididi ko;+ aweyi o Faro kekungwila wau vo kizeye toma vova ko?”*+
13 Kansi, Yave ozayisi diaka Mose yo Arone e nkanikinu bevana kwa Aneyisaele ye kwa Faro wa ntinu a Engipito, mu vaikisa Aneyisaele mu nsi ya Engipito.
14 Awaya i bavitanga o ntu muna nzo za mase mau: O wan’a Rubeni, wa mwan’antete a Isaele:+ Kanoke, Palu, Keserone yo Kami.+ Awaya i batuka muna vumu kia Rubeni.
15 O wan’a Simeone: Yemwele, Yamini, Oade, Yakini, Soka yo Saulu, ona kawuta yo nkento a musi Kenani.+ Awaya i batuka muna vumu kia Simeone.
16 Ezazi i nkumbu za wan’a Levi+ mun’owu wa ngutuka zau: Ngeresone, Koate yo Merare.+ O Levi mvu 137 kazinga.
17 O wan’a Ngeresone: Libene yo Simei, mun’owu wa vumu yau.+
18 O wan’a Koate: Amerame, Yisa, Keberone yo Uziele.+ O Koate mvu 133 kazinga.
19 O wan’a Merare: Makele yo Musi.
Awaya i batuka muna vumu ya Anelevi, mun’owu wa ngutuka zau.+
20 O Amerame obongele Yokebede, wa nsang’a se diandi, se nkaz’andi.+ Yokebede unwutìdi Arone yo Mose.+ Amerame mvu 137 kazinga.
21 O wan’a Yisa: Kora,+ Nefenge yo Zikere.
22 O wan’a Uziele: Misaele, Elisafane+ yo Sitere.
23 Arone obongele Eliseba, wa mwan’ankento a Aminadabi, wa nsang’a Nakesone,+ se nkaz’andi. Eliseba unwutìdi Nadabi, Abiu, Elaza yo Itama.+
24 O wan’a Kora: Asire, Elekana yo Abiasafi.+ Awaya i batuka muna vumu ya Anekora.+
25 O Elaza+ wa mwan’a Arone, obongele mosi muna wan’amakento a Putiele se nkaz’andi. Unwutìdi Finekase.+
Awaya i ntu mia nzo za mase ma Anelevi, mun’owu wa vumu yau.+
26 Lwalu i luvila lwa Arone yo Mose, ana o Yave kavovesa vo: “Nuvaikisa o nkangu a Isaele mu nsi a Engipito, mu buka-buka.”*+
27 O Mose yo Arone yau bamokena yo Faro wa ntinu a Engipito, kavaikisa o nkangu a Isaele muna Engipito.+
28 Muna lumbu kina Yave kamokena yo Mose muna nsi ya Engipito,
29 Yave wavovesa Mose vo: “Mono i Yave. Vovesa kwa Faro wa ntinu a Engipito o mambu mawonso ivovese.”
30 I bosi, Mose ovovese Yave vo: “Tala, kizeye toma vova ko,* ozevo aweyi Faro kekungwila?”+
Mvovo vana yand'a lukaya
^ Yovo “koko kwankuma.”
^ Mvovo wa sina: “yazangulwila o koko kwame.”
^ Mvovo wa sina: “wau vo i nkwa befo yalembi zengwa.”
^ Mvovo wa sina: “mun’owu wa vu yau.”
^ Mvovo wa sina: “i nkwa befo yalembi zengwa.”
