Levitiku 20:1-27
20 Yave ovovese Mose vo:
2 “Vovesa Aneyisaele vo: ‘Konso Nyisaele ye konso nzenza ozingilanga muna Isaele ovana* mwan’andi kwa Moleke, kafwete vondwa kikilu.+ O nkangu a nsi ukuntuba matadi yavana kefwa.
3 Omono ibembola muntu ndioyo, vonda ikumvonda vana vena nkangu andi, kadi mosi muna wan’andi kavene kwa Moleke, ofunzwidi e fulu kiame kiavauka+ yo safula e nkumbu ame yavauka.
4 Avo nkangu a nsi ufukidi meso mau muna lukanu mu kuma kia vangu dia muntu ndioyo, wau kavene mwan’andi kwa Moleke ye ke bamvondele ko,+
5 mono kibeni ibembola muntu ndioyo ye kanda diandi.+ Vonda ivonda muntu ndioyo vana vena nkangu andi kumosi ye awonso banyikamene muna zumba batele kia sambila Moleke.
6 “‘Avo muntu wele kwa nganga za matombola+ yovo kwa nganga za ngombo+ muna tá yau e zumba kia mwanda, bembola ibembola muntu ndioyo yo kumvonda vana vena nkangu andi.+
7 “‘Nufwete kala nuavelela yo kituka nuavauka,+ kadi mono i Yave wa Nzambi eno.
8 Nufwete lundanga e nkanikinu miame yo lemvokela mio.+ Mono i Yave, ona okunuvaulanga.+
9 “‘Konso muntu osiba se diandi yovo ngudi andi, kafwete vondwa kikilu.+ Wau vo se diandi yovo ngudi andi kasibidi, o menga mandi vana ntu andi mena.
10 “‘Muna diambu dia yakala otele zumba yo nkento angani: Ndiona otele zumba yo nkento a nkwandi kafwete vondwa kikilu, o yakala otele zumba yo nkento otele zumba bafwete vondwa.+
11 O yakala ovukane yo nkento a se diandi, se diandi kafusulwisi e nsoni.*+ Yau awole bafwete vondwa kikilu. O menga mau vana ntu miau mena.
12 Avo yakala ovukane yo mwan’andi a nzitu, yau awole bafwete vondwa kikilu. Diambu diangemi bavangidi. O menga mau vana ntu miau mena.+
13 “‘Avo yakala ovukane yo nkwandi yakala, wauna o yakala kevukanenanga yo nkento, yau awole diambu diangemi bavangidi.+ Bafwete vondwa kikilu. O menga mau vana ntu miau mena.
14 “‘Avo yakala obongele nkento, i bosi ovukane diaka yo ngudi a nkento, ediadi vangu diansoni.+ O yakala yo nkento yo ngudi a nkento bafwete kubayoka vana tiya,+ kimana e vangu diodio diansoni dialembi kwamanana vovo nuina.
15 “‘Avo yakala ovukane ye bulu, kafwete vondwa kikilu, nufwete mpe vonda e bulu.+
16 Avo nkento ofinamene bulu kavukana kiau,+ nufwete vonda o nkento ye bulu. O yakala yo nkento ndioyo bafwete vondwa kikilu. O menga mau vana ntu miau mena.
17 “‘Avo yakala ovukane yo nsang’andi, i sia vo, mwan’ankento a se diandi yovo mwan’ankento a ngudi andi, o yakala kamona kimpene kia nsang’andi, oyandi mpe kamona kimpene kia yakala, ediadi diambu diansoni.+ Bafwete vondwa vana meso ma nkangu au. Nsang’andi kafusulwisi e nsoni.* Otumbwa mu kuma kia bi wandi.
18 “‘Avo yakala ovukane yo nkento ekolo kena ku ngonde, yau awole ke bazitisi nto a menga ma nkento ko.+ Yau awole bafwete vondwa vana vena nkangu au.
19 “‘Kufwete vukana yo mpangi a nkento a ngudi aku ko yovo nsang’a se diaku, kadi yitu kiaku kia menga ofusulwisa e nsoni.+ Bafwete tumbwa mu kuma kia bi wau.
20 O yakala ovukane yo nkento a ngudi andi ankazi, ngudi andi ankazi kafusulwisi e nsoni.*+ Bafwete tumbwa mu kuma kia sumu diau. Bafwete vondwa lembi wuta wana.
21 Avo yakala obongele nkento a mpangi andi, ediadi diambu diangemi.+ Mpangi andi kafusulwisi e nsoni.* Ke bewuta wana ko.
22 “‘Nufwete lunda e nkanikinu miame miawonso ye nzengo zame zawonso za mfundisa+ yo lemvokela zo,+ kimana e nsi ina ikunukotesa mu zingila mo yalembi kunuluka.+
23 Ke nufwete landa mavangu ma zula ko eyi iyinganga ova ndose eno;+ kadi o mambu mama mawonso i mau bavanga, i diau ikubamwenang’e nkele.+
24 Kiaki i kuma inuvovesele vo: “Oyeno nubaka e nsi au, ikunuvana yo se vua dieno, e nsi ifwamfumukanga kimvumina yo wiki.+ Mono i Yave wa Nzambi eno, ona unuvambwidi vana vena nkangu miankaka.”+
25 Nufwete sia nswaswani vana vena bulu kiavelela ye kiafunzuka, vana vena nuni yafunzuka ye yavelela;+ ke nufwete kuyikitula* se angemi ko muna dia konso bulu yovo nuni yovo konso ma kizanzalanga ova ntoto, kina mvambwidi kimana nuabadikila kio se kiafunzuka.+
26 Nufwete kala nuavauka kwa mono, kadi omono Yave yavauka,+ inuvambwidi vana vena nkangu miankaka kimana nuakituka se nkangu ame.+
27 “‘Konso yakala yovo nkento osalanga e salu kia kingang’a matombola yovo salu kia kingang’a ngombo,* kafwete vondwa.+ O nkangu ufwete kubatuba matadi yavana befwa. O menga mau vana ntu miau mena.’”
Mvovo vana yand'a lukaya
^ Dilenda kala vo tambika mwana se kimenga.
^ Mvovo wa sina: “kimpene kia se diandi kafukwidi.”
^ Mvovo wa sina: “Kimpene kia nsang’andi kafukwidi.”
^ Mvovo wa sina: “kimpene kia ngudi andi ankazi kafukwidi.”
^ Mvovo wa sina: “Kimpene kia mpangi andi kafukwidi.”
^ Yovo “ke nukitula moyo eno.”
^ Yovo “una yo mwanda wa zayisa mambu mevangama.”
