Vava yawutuka, mase mame bakala ye mpatu yakete kuna vata dia Galícia kuna node ya Espanha. I mwana wa 4 muna wana 8 twawutuka. Twakala ye zingu kia nzo kiakiese. Muna ntangwa yayina, wantu kuna Espanha bakala ye fu kia twika kana nkutu mwana mosi kuna sikola ya dibundu dia Katolika (convento). Wantu tatu muna nzo eto twakota mu sikola yayi.

Vava yalungisa mvu 13, yalanda mpangi ame kuna convento ya Madrid. Muna sikola yayina, wantu ke bakala ye ngwizani ambote ko, ke basonganga nkenda ko, twasambanga ye mwakala ye nsiku miampasi. Muna nsiuka, twayendanga ku nzo a nzambi muna badika, kansi nkumbu miayingi kiakala ye diambu ngindula ko. I bosi, twayimbilanga yo wá malongi, mawonso mama mu ndinga Latim mavangilwanga. Kiabakulanga kana diambu dimosi ko, yamonanga vo Nzambi wamvambuka. Lumbu yayingi yaviokesanga lembi vova diambu. Vava yawanananga yo mpangi ame twakikayisanga kaka muna vova vo “Sanisina Maria wa mveledi.” Madre batuvananga kaka miniti 30 muna mokena vava twamanisanga dia. Ekwe nswaswani ye zingu kiakiese twakala kiau kuna nzo eto! Nkumbu miayingi yamonanga kinsona yo dila.

Kana una vo kiakala ye ngwizani ambote ko yo Nzambi, yakituka se madre vava yalungisa mvu 17. Kana una vo yalungisa mana yakanikinwa, kuna kwalanda yayantika katikisa kana vo Nzambi wansola kikilu muna salu kiaki. Madre bavovanga vo awana bekatikisanga ku bilungi betubwa. Kansi, lukatikisu lwame lwakwamanana. Yazaya wo vo Yesu Kristu kakivaulanga ko, kansi wakivananga muna salu kia longa yo sadisa akaka. (Matai 4:23-25) Vava yalungisa mvu 20, kiakala diaka ye luzolo lwakwamanana madre ko. Yasivika kikilu vava madre ona watufilanga kanzayisa vo avo kina ye ziku ko kia kwamanana madre, diambote yavaika vana vau. Nanga wonga kakala wau wa sia vo ndenda vukumuna wantu akaka. Ozevo, vana vau yavaika muna convento.

 Vava yavutuka kuna nzo, mase mame ke bamfundisa ko muna nzengo yabaka. Kansi, wau vo kiasolola salu ko, yayaluka yo kwenda kuna Alemanha kuna kwazingilanga mpangi ame ayakala. Mpangi ame mu buka kia Comunista kia wantu batuka kuna Espanha kakala. Yamona kiese kiakala kumosi yo wantu awaya banwananga mu kuma kia zitu w’asadi ye mfwanani vana vena akento ye ayakala. Yakota muna buka kiaki yo kazala yo mosi muna yau. Yamona vo salu kiamfunu yavanganga vava yakayanga nkanda mia buka kia Comunista yo kuyisia muna ntantani za mambu ma luyalu.

Kansi, ke kolo ko yayantika kendalala diaka. Yamona vo wantu bakala muna buka kiaki nkumbu miayingi ke balemvokelanga mana balonganga ko. E ziku kia diambu diadi kiatoma moneka muna mvu a 1971 vava matoko ma buka kiaki bayoka e nzo yasunzulanga luyalu lwa Espanha kuna Frankfurt. Bavanga diambu diadi mu kuma kia nsiku miabala mia luyalu lwa Espanha. Kansi, yamona vo dina bavanga ke diambote ko.

Vava mwan’ame antete kawutuka, yavovesa kwa nkaz’ame vo kikwenda diaka ku tukutakanu twa buka kia Comunista ko. Yamona kinsona wau vo ke mosi ko muna yau wankingula kumosi yo mwana ame. Yayantika vava zaya e nsas’a zingu. Nga mfunu kikilu diakala mu vava singika e nza?

Muna mvu wa 1976, Mbangi zole za Yave za nsi a Espanha badodela kielo kieto yo kutukayila nkanda misasilanga e Bibila. Muna nkingula a zole yayantika vanga yuvu yayingi mu kuma kia mpasi tumonanga, fu kia sia mpambula yo nsoki. Yasivika kikilu vava basadila Bibila muna vana mvutu za yuvu yame yawonso. Vana vau, yayantika longoka e Bibila.

Kuna lubantiku, kani dia zaya kaka mvutu za yuvu yame yakala diau. Kansi, yayantika soba ngindu zame vava yayantika kwenda muna tukutakanu mun’eseka dia Kintinu dia Mbangi za Yave kumosi yo yakala diame. Kuna kwalanda, yawuta diaka wana wole. Kuna ngemba zawonso, Mbangi za Yave bayizanga kutubaka yo kwenda yeto muna tukutakanu yo lunga-lunga wana eto vava lukutakanu lwaviokanga. Ediadi diamfila mu zola Mbangi za Yave.

Kana una vo i wau, yakwamanana katikisa diambu ditadidi mabundu. Yabaka nzengo za kwenda kingula yitu yame kuna Espanha. Se diame dia nleke ona wakala padre wansima kimana yayambula longoka Bibila. Kansi, Mbangi za Yave bansadisa kikilu. Basadila Bibila muna vana mvutu za yuvu yame nze una bavanga Mbangi za Yave kuna Alemanha. Ediadi diansadisa mu baka nzengo zavutuka longoka e Bibila vava yadi vutuka kuna Alemanha. Kana una vo nkaz’ame wayambula longoka Bibila, mono yavutukila longi diame. Muna mvu wa 1978, yavubwa.

O zayi waludi wa Bibila wamvana nsasa yo fila zingu kiame. Muna bonga e nona, e sono kia 1 Petelo 3:1-4 kikasakesanga akento vo ‘basakalela’ akazi au yo “vumi” yo songa “ntim’anleka, yo lembama, wina vo, muna meso ma Nzambi, wantalu kikilu.” E nkanikinu miami miansadisa mu kituka se nkento ye ngudi ambote.

Se mvu 35 miviokele kala tuka yakitukila Mbangi a Yave. Ngina ye kiese kiakala muna kintwadi kia wana angudi mu nz’amvimba. Ngina mpe ye kiese wau vo yá muna wan’ame tanu Yave besadilanga.