O loloka disongele vo vilakana e diambu diambi dikendelekele dina o muntu kavovele yovo vanga yo lembi kunlundila makasi. Kansi ke disongele ko vo vunikisa vika sia vo kevavangamene diambu ko yovo dina o muntu kavangidi ke diambi kwandi ko.

DINA BIBILA KIVOVANGA: “Nuvezananga mambu yo loloka muntu yo nkwandi kuna mvevo, kana nkutu vo muntu obakidi nkwandi diambu.”—Kolosai 3:13.

“Vava ozolanga o muntu, kusianga sungididi ko muna vilwa wandi, kansi osianga e sungididi muna ngolo kena vanga za tomesa e fu yandi.”—Aaron.

O lunda makasi, dilenda twasa vonza muna vimpi waku, kiakala muna nitu ye muna ngindu. Dilenda mpe fwasa o longo lwaku.

“Lumbu kimosi, yakala diame wandomba e ndoloki muna diambu dimosi kavanga edi diankendeleka kwayingi. Diampasi diakala muna kunloloka, i bosi yanloloka. Kansi, ikuyibanzanga wau yalembi kunloloka vana vau. Twafungaziana makasi e nkatu-nkatu.”—Júlia.

UKIYUVULA

Vava o nkaz’aku kekukendeleka diaka ukiyuvula:

• ‘Nga tezo iviokesanga vava ifunganga makasi mu nzaki?’

• ‘E diambu divangamene nga diambi kikilu? Nga mfwete kikulu lombwa e ndoloki yovo ndenda kwame vilakana e diambu diadi?’

MOKENA YO NKAZ’AKU

• Nkumbu miayingi, kolo kwa kiviokanga muna loloka muntu yo nkwandi?

• Adieyi tufwete vanga muna lolokanga vana vau?

LUSADISU

• Avo okendalele, kuyindula ko vo o nkaz’aku kani dia kukendeleka kakele diau.

• Teza kunloloka. Sungamenanga vo “yeto awonso nkumbu miayingi tutanga e sakuba.”—Yakobo 3:2.

“Diasazu dikalanga muna loloka avo yeto awole vilwa tuvangidi. Kansi diampasi dikalanga vava dimonekanga vo mosi kaka ovangidi o vilwa. Muna diadi muna loloka yo lomba e ndoloki, divava vo wasonga kikilu o lulembamu.”—Kimberly.

DINA BIBILA KIVOVANGA: “Singika-singika o mambu.”—Matai 5:25.