Dina Tulenda Longoka mu Kuma kia Nzambi Muna Ngunza Zandi
Kuna nz’ankulu, Nzambi wazayisa kwa ngunza zandi e nsangu zamfunu mu kuma kia wantu. Nga e nsangu zazi zilenda kutusonga dina tulenda vanga muna vua e nsambu za Nzambi? Elo. Yambula twazaya dina tulenda longoka muna ngunza tatu zakwikizi.
ABARAYAMA
Nzambi ke sianga mpambula ko, ozolele sambula wantu awonso.
Nzambi wasia o nsilu kwa Abarayama wa ngunza vo: “O makanda mawonso ova ntoto omo ngeye mesambulwilwa.”—Tuku 12:3.
Adieyi tulongokele? Nzambi zola ketoma kutuzolanga ye ozolele sambula wantu awonso ana bekunlemvokelanga, i sia vo, akala, akento yo wana.
MOSE
Nzambi nkwa nkenda, osambulanga awana bevanganga e ngolo muna kunzaya.
O Mpungu-ngolo wavana kwa Mose wa ngunza o nkuma wa vanga masivi manene. Kana una vo i wau, Mose wasamba vo: “Unzayisa e nzila zaku, kimana yazaya yo kwamanana vua e dienga vana meso maku.” (Luvaiku 33:13) Nzambi wayangalela dina Mose kalomba yo kunsambula muna kumvana zayi ye umbakuzi wayingi mu kuma kia nzila zandi ye fu yandi. Kasikil’owu, Mose walongoka vo o Mvangi i “Nzambi a nkenda ye ngemba.”—Luvaiku 34:6, 7.
Adieyi tulongokele? Nzambi ozolele sambula awonso ana besianga e ngolo muna toma kunzaya, i sia vo, akala, akento yo wana. Muna Sono Yavauka, okutuzayisanga e mpila tufwete kunsambila. Una ye luzolo lwakala nkundi eto yo kutusambula.
YESU
E nkenda zafilanga Yesu mu wuka yimbevo ya mpila zawonso
Tulenda vua e nsambu zakwele mvu avo tulongokele mana Yesu kavanga yo longa.
Mayingi tulenda longoka muna Sono Yavauka mu kuma kia zingu kia Yesu ye malongi mandi. Nzambi wavana Yesu o nkuma wavanga masivi mayingi, nze wuka ampofo, afwa matu ye avanguki. Yesu wafutumuna mpe wantu afwa. Muna masivi mama, Yesu wasonga e nsambu ketwasa o Nzambi kuna sentu mu kuma kia wantu. Wasasila dina konso muntu mu yeto kalenda vanga muna vua e nsambu zazi. Wavova vo: “Muna vua moyo a mvu ya mvu, divavanga vo batoma kuzaya, ngeye Nzambi mosi kaka aludi yo Yesu Kristu ona watuma.”—Yoane 17:3.
Yesu nkwa ngemba ye nkenda kakala. Akala ye akento, aleke ye ambuta, bayendanga kwa Yesu muna tambulwila e mboka kabavana: ‘Nulongwa kwa mono, kadi i nlembami yo ntim’anleka, nusolola vundu kia mioyo mieno.’ (Matai 11:29) Nswaswani ye wantu ankaka a tandu kiandi ana babangikanga akento, Yesu wafwilanga akento e nkenda yo kubazitisa.
Adieyi tulongokele? Yesu wasonga muna mavangu mandi vo wantu kazolanga yo sisa mbandu ambote muna mpila ina tufwete kadilanga ye akaka.
YESU KE NZAMBI KO
E Sono Yavauka ilonganga vo “oku kwa yeto, Nzambi mosi kaka” tuna yandi. O Yesu Kristu i nati a nsangu za Nzambi. (1 Korinto 8:6) Yesu watoma dio kiesesa vo Nzambi unsundidi ye yandi wantuma ova ntoto.—Yoane 11:41, 42; 14:28. *
^ tini. 17 Muna zaya mayingi mu kuma kia Yesu Kristu, tala kunku kia 8 ye kia 9 muna finkanda: Verdadeira Fé—O Segredo de uma Vida Feliz, muna nzil’eto ya www.pr418.com.
Nanga Oyangalela Mpe Malongi Mama
MVUTU ZA YUVU YA BIBILA
Nga Yesu i Nzambi a Mpungu-ngolo?
Adieyi kavova Yesu mu kuma kia fulu kiandi vana ndose a Nzambi?
