“Mbangi za Yave, ke basonganga kaka ngemba kwa wantu ko, kansi basonganga mpe e ngemba kwa wan’a mbwa yakala yau. Lumbu kimosi, Elaine ona wakala vana ndambu a tandabala, wavana e sikiti kwa wan’a mbwa wole yakala yau. I bosi, konso ntangwa yaviokelanga vana ndambu a tandabala, o wan’a mbwa bayendanga kwa Mbangi za Yave mu tambula diaka sikiti.

“Ekolo e ngonde zaviokanga, o wan’a mbwa bayangalelanga e sikiti, omono mpe yayangalelanga mokena ye Mbangi za Yave. Kansi, kiazolanga mokena yau kwayingi ko. Muna kolo kiakina, mvu 70 yakala miau, kansi kiazaya ko mana Mbangi za Yave bekwikilanga. Wau vo yatoma kendalala yakala mu kuma kia mabundu ma protestante, yabaka e nzengo za longoka e Bibila mono mosi.

“Muna kolo kiakina, yamona diaka Mbangi za Yave zankakaka mu fulu yayingi muna mbanza ye tandabala yau. Yau mpe akwa ngemba bakala. Ntangwa zawonso basadilanga e Bibila muna vana e mvutu za yuvu yame, muna kuma kiaki yayantika toma kubabunda e vuvu.

“Lumbu kimosi, Elaine wangiuvula: ‘Nga okwikilanga vo e bulu i lukau lwatuka kwa Nzambi?’ Yamvutula vo: ‘Ingeta ikwikilanga dio.’ I bosi, Elaine wantangila e sono kia Yesaya 11:6-9. Muna kolo kiakina, yazola longoka yau e Bibila, kansi yakala ye lukatikisu muna tambula nkanda miau.

“Muna lumbu yalanda, twakalanga ye moko yankufi ye yambote yo Elaine kumosi yo nkaz’andi Brent. Bampovesa vo yatanga nkand’a Matai yakuna Mavangu kimana yabakula mana mevavuanga muna kala Nkristu akieleka. I diau mpe yavanga. Ke vavioka kolo ko, yayantika longoka e Bibila yo Brent kumosi yo nkaz’andi Elaine. Ediadi diavangama muna mvu wa 2016.

“Yayangalelanga e longi dia Bibila yo kwenda muna tukutakanu konso lumingu. Kiese kiayingi yamonanga muna zaya dina kieleka e Bibila kilonganga. Muna mvu walanda, yavubwa se Mbangi a Yave. Owau se mvu 79 ngina miau, ivutulanga matondo kwa Yave wau yasolola e nsambil’a ludi. Kieleka, Yave wansambula muna yambula vo yakala mosi muna selo yandi.”