Bantu mingi na yinza kekukimonaka ti bakele kaka bau mosi mpe bakemonaka lokola balenda kuma ve bankundi ya bantu yankaka. Bantu yankaka ya mayele na mambu metadila mavimpi kendimaka ti kusadisa bantu yankaka kele mosi ya mutindu ya kununga banguilu ya mutindu yina.

•   “Kusadisa bantu yina kele na nsatu ya lusadusu lenda sala ti luzingu na beto vuanda na mfunu mpe yalenda sadisa beto samu beto bika kukimona ti beto kele kaka beto mosi to kukivambula na bantu yankaka.”—Instituts nationaux de la santé des États-Unis.

 Biblia kena kupesa malongi ya mfunu samu na mambu yina beto lenda sala samu na kusadisa bantu yankaka. Kusadila mambu yina yametuba lenda sadisa beto samu beto nunga banguilu ya kukimona ti beto kele kaka beto mosi.

 Vuanda na kikadulu ya kukaba. Sosaka maluaku ya kulutisa ntangu na bantu yankaka, mingimingi mbunzu na mbunzu. Vuandaka pene ya kupesa bantu yankaka yina nge kele na yau. Kana nge mesala plina, kondua ntembe bakevuanda na butondi, yau kesala ti beno kuma bankundi.

•   Nsikudukusu ya Biblia: “Beno vuanda na mumeseno ya kupesa mpe bantu kepesa beno.”—Luka 6:38.

 Sadila ngolo na nge samu na kusadisa bantu yankaka. Sosaka mitindu ya kusadisa bantu yina kena kulutisa ntangu mosi ya mpasi. Yalenda lomba nge kuwa bau na ntima kiadi nionso to lomba nge sadisa bau na mua bisalu yina kesala babika mona ti bakele na mambu mingi ya kusala.

•   Nsikudukusu ya Biblia: “Nkundi kevuandaka vana samu na kusadisa, na maluaku nionso.”—Bingana 17:17, Contemporary English Version.

 Samu na kuzaba mambu yankaka samu na mutindu nge lenda tanina kinkundi ya mbote na bantu yankaka, tanga disolo “Libota mpe boninga ná basusu.”