DILONGI 01
Yinki mutindu Biblia lenda sadisa nge?
Beto nionso beto kezolaka kuzaba mambu mingi na yina metadila luzingu, bampasi, lufua, mpe bilumbu kena kuiza. Beto kekukitungisaka diaka samu na bansatu ya konso kilumbu, na kifuani kukuma na luzingu ya mbote to kuvuanda na dibuta ya kiese. Bantu mingi memona ti Biblia sadisaka bau kaka ve samu babaka bamvutu na biuvu ya nene ya luzingu kasi yakepesaka bau diaka malongi ya mfunu samu na luzingu ya konso kilumbu. Nge mekanisa ti Biblia lenda sadisa konso muntu yina nge mezaba?
1. Yinki kele ndambu ya biuvu yina Biblia mepesila bamvutu?
Biblia mepesa bamvutu na biuvu yayi ya mfunu: Yinki mutindu luzingu bandilaka? Yinki kele mfunu ya luzingu? Samu na yinki bantu kekufuaka? Yinki kekuminaka muntu kana yandi mekufua? Kana muntu nionso kele na nsatu ya kiyenge, samu na yinki bamvita kele mingi? Yinki kekumina ntoto na bilumbu kena kuiza? Biblia mekindisa beto na kusosa bamvutu ya biuvu lokola yayi, mpe bamilion ya bantu mebaka bamvutu yina mesepedisa bau na Biblia.
2. Yinki mutindu Biblia lenda sadisa beto beto sepela na luzingu na beto ya konso kilumbu?
Biblia mepesa beto malongi ya mbote. Na kifuani, yakena kulonga mabuta mutindu ya kuvuanda na kiese ya kedika. Yakena kupesa malongi samu na mutindu ya kununga mitungisi mpe ya kusepela na kisalu na beto. Nge kelonguka yina Biblia melonga samu na mambu yango mpe ntangu beto kelonguka kintuadi mukanda yayi. Nge lenda ndima ti ‘Masonukua nionso [konso diambu yina kele na Biblia] kele . . . na mfunu.’—2 Timoteo 3:16.
Mukanda yayi baka kisika ya Biblia ve. Kasi, yakena kukindisa nge longuka Biblia samu na nge mosi. Na yau, beto kena kindisa nge nge tangaka baverse yina bametula na malongi ya mukanda yayi mpe fuanikisa yau na yina nge kena kulonguka.
KOTA NA MPINDA
Mona mutindu Biblia sadisaka bantu, mutindu nge lenda sepela kutanga yau, mpe samu na yinki yakele mbote basadisa nge samu nge bakusa yau.
3. Biblia lenda tuadisa beto
Biblia kele lokola muinda yina kepelaka ngolo. Beto lenda sadila Biblia samu yamonisa beto mutindu ya kubaka banzengolo ya mbote mpe yalenda tubila beto mambu kesalama na bilumbu kena kuiza.
Tanga Nkunga 119:105, mpe na manima tadila biuvu yayi:
-
Yinki mutindu nsoniki ya nkunga vuandaka tadila Biblia?
-
Yinki mutindu nge ketadilaka Biblia?
4. Biblia lenda pesa bamvutu na biuvu na beto
Nketo mosi monaka ti Biblia pesaka bamvutu na biuvu yina vuandaka tungisa yandi banda bamvula mingi. Tula VIDEO, mpe na manima tadila biuvu yayi melanda.
-
Na video yayi, yinki biuvu nketo yango vuandaka na yau?
-
Yinki mutindu ndongokolo ya Biblia sadisaka yandi?
Biblia mekindisa beto beto yuvusaka biuvu. Tanga Matayo 7:7, mpe na manima tadila biuvu yayi melanda:
-
Yinki biuvu nge lenda vuanda na yau yina Biblia lenda pesila bamvutu?
5. Nge lenda sepela kutanga Biblia
Bantu mingi kesepelaka kutanga Biblia mpe bakena kubakila yau mambote. Tula VIDEO, mpe na manima tadila biuvu yayi melanda.
-
Na video yayi, mbala mingi yinki mutindu bantuenia ketadilaka diambu metadila kutanga?
-
Bubu yayi, samu na yinki bamemona ti lusuasanu kele na diambu metadila kutanga Biblia?
Biblia metuba ti yalenda pesa beto malako yina kekindisa beto mpe kepesa beto kivuvu. Tanga Baroma 15:4, mpe na manima tadila biuvu yayi:
-
Bansilulu ya kukindisa mpe ya kivuvu yina kele na Biblia kesepedisaka nge?
6. Bantu yankaka lenda sadisa beto samu na kubakusa Biblia
Katula kutanga Biblia bau mosi, bantu mingi monaka ti kulonguka yau na bantu yankaka sadisaka mingi. Tanga Bisalu 8:26-31, mpe na manima tadila biuvu yayi:
-
Yinki mutindu beto lenda bakusa Biblia?—Tala baverse 30 mpe 31.
Muntu ya Ethiopie vuandaka na nsatu ya lusadusu samu na kubakusa Masonukua. Bubu yayi, bantu mingi kena kumona ti yakele mfunu kutubila Biblia na bantu yankaka
BANTU YANKAKA METUBA: “Kulonguka Biblia kele kulutisa ntangu mpamba.”
-
Yinki nge ketuba? Samu na yinki?
BUNKUFI
Biblia mepesa malongi samu na luzingu ya konso kilumbu, yamepesa bamvutu na biuvu ya mfunu, mpe yakepesaka bantu lukindusu mpe kivuvu.
Mvutukulu
-
Malongi ya yinki mutindu beto lenda kuta na Biblia?
-
Yinki kele ndambu ya biuvu yina Biblia mepesila bamvutu?
-
Yinki nge kesepela kulonguka na Biblia?
SOSA
Mona mutindu malongi ya Biblia kele na mfunu bubu yayi.
“Mateya ya Biblia ezali na bwanya oyo esilaka ngala te” (Linɔ́ngi ya Mosɛnzɛli No. 1 2018)
Mona mutindu Biblia sadisaka bakala mosi yina vuandaka nunga banguilu na yandi banda bumuana.
Longuka malongi ya mfunu ya Biblia samu na luzingu ya dibuta.
Longuka mutindu Biblia kena kumonisa puelele mabanza ya luvunu yina bantu mingi kevuandaka na yau na yina metadila muntu yina kena kuyadila mpenza yinza.
