Mambu yina kele na kati

•   Bampova ya ebandeli 2

•   Bima ya ntalu na Mpova ya Nzambi 3-5

  •   Diskur 3

  •   Bima ya ntalu ya kimpeve 4

  •   Ntangulu ya Biblia 5

•   Kukipesa na kisalu ya kusamuna 6-14

  •  Kubanda disolo 7

  •   Kulandela muntu 8

  •   Kumisa bantu banlonguki 9

  •   Sasila bindimeli na nge 10

  •   Diskur 11

  •  Bima ya kusadila 12

  •  Mutindu ya kusadila 13

  •  Sadila bavideo mpe mikanda 14

•   Luzingu ya Baklisto 15-16

  •   Ndongokolo ya Biblia na kimvuka 16

•   Bampova ya nsuka 17

•   Bafelisitasion mpe malongi samu na bana kalasi 18

•   Wola yina lukutakanu mpe masolo fueti zingila 19

•   Viziti ya nkengi ya kizungidila 20

•   Sabala ya lukutakanu ya nene ya kizunga mpe ya kizungidila 21

•   Sabala ya Mbambukulu 22

•   Nkengi ya lukutakanu Luzingu mpe kisalu 23

•   Prezidan ya lukutakanu Luzingu mpe kisalu 24

•   Nsadisi samu na kupesa malongi 25

•   Bakalasi yankaka 26

•   Bavideo 27

1. Malako yayi kesadisa muntu nionso yina kele na kiyekua mosi na lukutakanu Luzingu mpe kisalu ya Baklisto. Konso muntu yina kele na kiyekua fueti tadila malako yina metadila kiyekua na yandi na Mukanda ya lukutakanu Luzingu mpe kisalu ya Baklisto mpe malako ya mukanda yayi. Bansamuni nionso fueti vuanda pene ya kusala lokola bavolontere samu na badevuare ya bana kalasi. Bantu yankaka yina kekutakanaka mbala na mbala na balukutakanu ya kimvuka lenda sala badevuare kana bakena kundima bakedika ya Biblia mpe kana luzingu na bau kele na nguizani na bansikudukusu ya Buklisto. Nkengi ya lukutakanu Luzingu mpe kisalu ya Baklisto fueti solola na konso muntu yina kuma ntete ve nsamuni, yina memonisa nsatu ya kukota na kalasi mpe yandi kezabisa muntu yango kana yandi mendimama samu na kukota na kalasi. Nkengi fueti tadila muntu yango na ntuala ya nlongisi na yandi ya Biblia (to na ntuala ya bibuti na yandi yina kele Bambangi ya Yehova). Mambu yina baketadila yandi kele kaka yina baketadilaka bantu yina zola kuma bansamuni.—od-LI kikapu 8 paragrafe 8.

 BAMPOVA YA EBANDELI

2. Miniti mosi. Konso sabala, na manima ya muyimbu mpe kisambu ya ebandeli, prezidan ya lukutakanu Luzingu mpe kisalu ya Baklisto ketubila na nkufi programe ya lukutakanu. Prezidan fueti benda dikebi na masolo ya mfunu yina bampangi ya kimvuka kebakila mambote mingi.

  BIMA YA NTALU NA MPOVA YA NZAMBI

 3. Diskur: Miniti 10. Yintu ya diambu mpe plan ya bapoin zole to tatu ya ngudi kele na Mukanda ya lukutakanu Luzingu mpe kisalu ya Baklisto. Nkulutu to nsadisi na kisalu ya makoki nde fueti sala diskur yango. Kana beto kebanda ntangulu ya mukanda ya Biblia ya yimpa na sabala yango, diskur yango kebanda na video mosi yina ketubila mukanda yango ya Biblia na nkufi. Mpovi kemonisa nguizani yina kele kati na video yango mpe yintu ya diambu. Kasi, yandi kesala nionso samu yandi tubila bapoin nionso ya disolo yango yina kele na mukanda ya lukutakanu. Diaka, kana ntangu kele, yandi lenda sadila bafoto yina bametula na disolo yango, yina kele na nguizani na yintu ya diambu bametula. Yandi lenda sadila bareferanse yankaka yina kele na nguizani na yintu ya diambu yina yandi kena kutubila.

 4. Bima ya ntalu ya kimpeve: Miniti 10. Yakele kitini ya biuvu mpe bamvutu kondua bampova ya ebandeli to ya nsuka. Yafueti salama na nkulutu mosi to na nsadisi na kisalu ya makoki. Mpovi fueti yuvusa biuvu yango zole na bantu yina mekutakana. Katula yau, yandi lenda tala diaka kana yakelomba yandi tanga to ve baverse yina bametula. Bantu yina kepesa bakomantere fueti lutisa ve basekonde 30.

 5. Ntangulu ya Biblia: Miniti 4. Devuare yango kesalama na muana kalasi yina kele mpangi ya bakala. Muana kalasi ketanga baverse yina bongisamaka samu na yandi kondua bampova ya ebandeli to ya nsuka. Prezidan ya lukutakanu ketula mingimingi dikebi na yandi na kusadisa bana kalasi samu batanga na sikisiki, na mutindu yina kesala ti bantu bakusa, kondua kukakatana na bampova, kubula nsoso na bampova ya mfunu, kusoba ndinga, kupema na kisika yina mebonga, mpe kutuba mutindu yandi memesanaka kutuba. Lokola badevuare ya ntangulu ya Biblia yankaka kevuandaka ya nkufi mpe yankaka ya yinda, nkengi ya lukutakanu Luzingu mpe kisalu fueti tadila makoki ya konso muana kalasi ntangu yandi kena kupona bampangi yina kesala badevuare.

 KUKIPESA NA KISALU YA KUSAMUNA

6. Miniti 15. Lukanu ya kitini yayi kele ya kupesa konso muntu diluaku ya kubaka formasion samu na kisalu ya kusamuna mpe kukudisa makoki na yandi ya kusamuna mpe kulonga. Kana dikoki kele, bankulutu diaka lenda sala badevuare ya bana kalasi. Konso muana kalasi fueti sadila dilongi yina melombama na yandi yina kele na mua mukanda Kulonga to mua mukanda Nzola kesadisa yina baketulaka na nsuka ya konso devuare na mukanda ya lukutakanu Luzingu mpe kisalu ya Baklisto. Na bantangu yankaka, disolo mosi yina kesalama lokola disolo kintuadi na kimvuka kebanda vuanda na kati ya programe. Nkulutu to nsadisi na kisalu ya makoki nde ketuadisa disolo yango.—Tala  paragrafe 15 samu na kuzaba mutindu ya kutuadisa disolo mosi kintuadi na kimvuka.

 7. Kubanda Disolo: Devuare yango ya muana ya kalasi lenda salama na mpangi ya bakala to na mpangi ya nketo. Kana yakesalama na mpangi ya bakala, muntu yina kesala na yandi fueti vuanda bakala, kana mpangi ya nketo, muntu yina kesala na yandi fueti vuanda nketo, kana yakesalama na mpangi ya bakala na mpangi ya nketo, bafueti vuanda bantu ya dibuta mosi. Balenda sala devuare yango ya kuvuanda to ya kutelema.—Samu na kuzaba mambu yankaka ya Bima ya kusadila mpe Mutindu ya kusadila samu na kiyekua yango, tala  paragrafe 12 mpe  13.

 8. Kulandela muntu: Devuare yango ya muana kalasi lenda salama na mpangi ya bakala to na mpangi ya nketo. Kana yakesalama na mpangi ya bakala, muntu yina kesala na yandi fueti vuanda bakala, kana mpangi ya nketo, muntu yina kesala na yandi fueti vuanda nketo. (km-F 5/97 p. 2) Balenda sala devuare yango ya kuvuanda to ya kutelema. Muana kalasi fueti monisa yinki kutuba kana yandi kena kulandela muntu yina bakutanaka na yandi mbala lutaka.—Samu na kuzaba mambu yankaka ya Bima ya kusadila mpe Mutindu ya kusadila samu na kiyueka yango, tala  paragrafe 12 mpe  13.

 9. Kumisa bantu banlonguki: Devuare yango ya muana kalasi lenda salama na mpangi ya bakala to na mpangi ya nketo. Kana yakesalama na mpangi ya bakala, muntu yina kesala na yandi fueti vuanda bakala, kana mpangi ya nketo, muntu yina kesala na yandi fueti vuanda nketo. (km-F 5/97 p. 2) Balenda sala devuare yango ya kuvuanda to ya kutelema. Kitini yayi kele mbonosono ya ndongokolo ya Biblia yina bandaka deja. Yakele ve na mfunu muana kalasi sadila bampova ya ebandeli to ya nsuka, katula kaka kana yakele poin yina bamelomba yandi yandi sala. Yakele ve na mfunu muana kalasi tanga baparagrafe nionso na ndinga ya ngolo, atako yakele yimbi ve kusala yau.

 10. Sasila bindimeli na nge: Kana devuare yayi kesalama lokola diskur, muana kalasi ya bakala nde kesala yau. Kana yakesalama lokola mbonosono, yalenda salama na muana kalasi ya bakala to ya nketo. Kana yakesalama na mpangi ya bakala, muntu yina kesala na yandi fueti vuanda bakala, kana mpangi ya nketo, muntu yina kesala na yandi fueti vuanda nketo, kana yakesalama na mpangi ya bakala na mpangi ya nketo, bafueti vuanda bantu ya dibuta mosi. Muana kalasi fueti pesa mvutu ya puelele mpe ya kimpombo na kiuvu ya yintu ya disolo na kusadilaka bareferanse yina bamepesa yandi. Muana kalasi kele na yinsua ya kusadila to ve mukanda ya referanse yina bamepesa ntangu yandi kena kusala disolo na yandi.

 11. Diskur: Devuare yango fueti salama na muana kalasi yina kele mpangi ya bakala mpe yandi kesala yau lokola diskur na kimvuka. Kana diskur mesimbama na poin mosi ya apandisi A ya mua mukanda Nzola kesadisa, muana kalasi fueti monisa mutindu baverse lenda sadulua na kisalu ya kusamuna. Na kifuani, yandi lenda pona ntangu yina mebonga kusadila verse, kusasila verse yango mpe mutindu ya kusolola yau na muntu. Kana diskur yango mesimbama na poin mosi yina mekatuka na mosi ya malongi ya mua mukanda Nzola kesadisa, muana kalasi fueti benda dikebi na mutindu ya kusadila poin yango na kisalu ya kusamuna. Yandi lenda tubila kifuani yina kele na poin 1 ya dilongi yango to kutubila baverse yankaka yina kele na dilongi yango, kana yandi memona ti yakele mfunu.

   12. Bima ya kusadila: Mambu yina kele na paragrafe yayi mpe yina melanda kesadulua na kitini “Kubanda Disolo” mpe na kitini “Kulandela muntu.” Kana bapesa diambu yankaka ve, lukanu ya muana kalasi kele ya kutubila kedika mosi ya pete ya Biblia yina kebenda dikebi ya muntu yina kena kusolola na yandi mpe kutuba diambu yina kesala ti batatamana disolo na mbala kekuiza. Muana kalasi fueti pona disolo mosi na kutadila mambu yina kena kusalama mpe na kutadila kisika yina bakevuandaka. Muana kalasi kele na yinsua ya kupesa to ve mukanda to kumonisa video yina kele na bisadulu na beto samu na kulonga. Na kisika ya kulunda kaka na yintu bampova yina yandi ketuba, muana kalasi fueti sadila makoki na yandi mosi ya kusolola, na kifuani kutudila muntu yango dikebi mpe kusolola na yandi mutindu kaka yandi kesololaka na bantu.

   13. Mutindu ya kusadila: Muana kalasi fueti sala devuare na yandi na kutadila mutindu mambu kelutaka na kisika bakevuandaka. Na kifuani:

1.  (1) Yinzo na Yinzo: Mutindu yayi ya kusadila mesangisa kusamuna porte na porte—yavuanda mbunzu na mbunzu, na nzila ya telefone, to na nzila ya letre—mpe kulandela muntu na kutadila disolo yina beno sololaka na kisalu ya kusamuna yinzo na yinzo mbala lutaka.

2.  (2) Kupesa kimbangi na diluaku ya mbote: Mutindu yayi ya kusadila memonisa mfunu ya kupesa kimbangi na nzila ya disolo mosi plina. Yau lenda vuanda kutubila dibanza ya verse mosi na bankundi ya kisalu, ya kalasi mpe na bafinangani na beto, na taksi, to na bisika yankaka yina nge kesadilaka bisalu na nge ya konso kilumbu.

3.  (3) Kupesa kimbangi na kisika ya bantu mingi: Mutindu yayi lenda sangisa kupesa kimbangi na nzila ya bakarte, kukuenda kuta bantu na kisika na bau ya mumbongo, na babalabala, to na baparke, na baparking, to na konso kisika yina bantu lenda vuanda.

 14. Sadila bavideo mpe mikanda: Na kutadila kisika yina beno mekutana, muana kalasi lenda pona kumonisa video to kupesa mukanda mosi. Kana devuare ya muana kalasi kele ya kumonisa video to yandi mepona kupesa mukanda mosi, bau tubila yau kasi bau tala yau ve ntangu bakena kusala devuare.

  LUZINGU YA BAKLISTO

15. Na manima ya muyimbu, miniti 15 yina melanda ya kitini yango kevuanda na kitini mosi to zole yina mebongisama samu na kusadisa bantu yina mekutakana basadila Mpova ya Nzambi. Kana bamepesa malako yankaka ve, bitini yango fueti salama na bankulutu to na bansadisi na kisalu ya makoki, katula kaka kitini bansatu ya kimvuka yina fueti salama kaka na nkulutu mosi. Kana kitini yango kele disolo na kimvuka, mpangi yina kena kutuadisa yau lenda buela biuvu yankaka na disolo na yandi. Bampova na yandi ya ebandeli fueti vuanda ya nkufi, yau kesala ti mambu nionso ya mfunu tubulua mpe bampangi mingi baka diluaku ya kutuba. Kana yakele na biuvu ya masolo, kana dikoki kele, yakevuanda mbote, mpangi yina bakeyuvusa biuvu kuenda na estrade samu na kupesa bamvutu na yandi, kasi ve na kisika yina yandi mevuanda.

  16. Ndongokolo ya Biblia na kimvuka: Miniti 30. Kitini yayi kesalama na nkulutu mosi ya makoki. (Na bimvuka yina bankulutu kele mingi ve, bansadisi na kisalu lenda tuadisa ndongokolo yango, kana yamelombama.) Kimvuka ya bankulutu fueti pona bampangi yina mekokisa mambu kelombamaka samu na kutuadisa Ndongokolo ya Biblia na kimvuka. Bampangi yina meponama fueti vuanda na makoki ya kutuadisa ndongokolo yango mbote mpe kuzitisa wola yina melombama, kubimisa makanisi ya mfunu ya baverse, mpe kusadisa bampangi yina kena kuwa yandi bamona mutindu ya kusadila malongi yina bamelonguka. Kuvutukila malako yina metubila mutindu ya kutuadisa disolo ya ndongokolo ya biuvu mpe bamvutu. (w23.04 p. 24, ankandre) Kana malongi nionso yina kele na kati ya ndongokolo samu na sabala yina metubulua mbotembote, yakele na mfunu ve ti ntuadisi kokisa kaka miniti yina pesamaka. Kana diluaku kele, ntuadisi mosi mpe ntangi mosi keponama konso sabala. Kana prezidan ya lukutakanu Luzingu mpe kisalu mezabisa nge nge kitisa miniti ya ndongokolo ya Biblia na kimvuka, nge kesosa mutindu ya kukitisa miniti ya ndongokolo yango. Nge lenda pona kubika kutanga baparagrafre yankaka.

  BAMPOVA YA NSUKA

17. Miniti 3. Prezidan ya lukutakanu Luzingu mpe kisalu kevutukila na nkufi mambu ya mfunu ya lukutakanu. Yandi fueti tubila diaka na nkufi mambu ya mfunu ya lukutakanu yina kelanda. Yandi lenda tanga bankumbu ya bana kalasi yina kesala badevuare na sabala yina kelanda, kana ntangu kele. Kana bamepesa malako yankaka ve, kana dikoki kele, prezidan kepesa mazayisu mpe yandi lenda tanga baletre na bampova na yandi ya nsuka. Mazayisu yankaka, lokola programe ya kisalu ya kusamuna mpe programe ya kutula bunkete fueti pesama ve na estrade, kasi bafueti tula yau na tablo ya mazayisu. Kana dikoki ya kupona mazayisu ya mfunu to kutanga baletre yina bametindila kimvuka kele ve na miniti yina mepesama samu na bampova ya nsuka, prezidan kelomba na bampangi yina kesala masolo na kitini Luzingu ya Baklisto bakumisa masolo na bau nkufi kana dikoki kele. (Tala  paragrafe 16 mpe  19.) Lukutakanu kemanisa na muyimbu mpe kisambu.

  BAFELISITASION MPE MALONGI SAMU NA BANA KALASI

18. Na manima ya konso devuare ya muana kalasi, prezidan ya lukutakanu Luzingu mpe kisalu kebaka pene ya miniti mosi samu na kupesa bafelisitasion mpe malongi na bampangi yina mesala badevuare na kutadila bapoin yina lombamaka samu na bau. Ntangu yandi kena kubokila muana kalasi, yandi fueti tubila ve dilongi yina yandi kekokisa. Na yau, kana devuare memanisa mpe na manima ya kupesa bafelisitasion yina mebonga, yandi lenda tubila poin yina lombamaka na mua kalasi yango. Yandi kesasila samu na yinki muana kalasi mekokisa poin yango to na kimpombo nionso, samu na yinki yandi fueti tatamana kusala ngolo mpe yina yandi fueti bongisa diaka na dilongi yina lombamaka samu na yandi. Prezidan kele na yinsua ya kutubila mambu yankaka yina metadila devuare yango kana yandi memona mfunu kusala yau samu na muana kalasi to samu na kimvuka. Yandi lenda pesa malongi yankaka na kisika ya bau zole kaka yina lenda sadisa yandi na nzila ya mua mukanda Nzola kesadisa, Kulonga, mpe mukanda Zwá matomba, yandi lenda sala yau na manima ya lukutakanu to na bantangu yankaka. Malongi yango kevuanda samu na dilongi yina bapesaka yandi to samu na dilongi yankaka.—Samu na kuzaba mambu yankaka yina metadila kiyekua ya prezidan ya lukutakanu Luzingu mpe kisalu mpe kiyekua ya nsadisi samu na kupesa malongi, tala  paragrafe 19,  24, mpe  25.

     WOLA YINA LUKUTAKANU MPE MASOLO FUETI ZINGILA

19. Disolo mosi ve fueti lutisa ndilu ya wola na yau, yavuanda malongi ya prezidan ya lukutakanu Luzingu mpe kisalu. Mukanda ya lukutakanu Luzingu mpe kisalu memonisa miniti yina konso disolo fueti zingila, yakele na mfunu ve nge kokisa kaka miniti yina bapesaka nge na kubuelaka mambu yankaka na disolo na nge. Prezidan kezenga na kimpombo nionso muana kalasi yina kena kutatamana kutuba kana yandi memanisa miniti na yandi. Kana bampangi yankaka melutisa miniti yina pesamaka na bau, prezidan ya lukutakanu Luzingu mpe kisalu mpe nsadisi samu na kupesa malongi kepesa malongi na kinsueki na bampangi yango. (Tala  paragrafe 24 mpe  25.) Lukutakanu nionso, yavuanda miyimbu, bisambu fueti zingila wola 1 na miniti 45.

 VIZITI YA NKENGI YA KIZUNGIDILA

20. Kana kimvuka kele na viziti ya nkengi ya kizungidila, programe ya lukutakanu kesalama mutindu kaka mukanda ya lukutakanu Luzingu mpe kisalu memonisa yau: Ndongokolo ya Biblia na kimvuka na kitini Luzingu ya Baklisto kesalama ve samu diskur ya kisalu ya miniti 30 ya nkengi ya kizungidila kesalama na kisika na yau. Tekila diskur ya kisalu, prezidan ya lukutakanu Luzingu mpe kisalu kesala na nkufi mvutukulu ya programe, mpe yandi ketubila na nkufi mambu ya programe ya sabala kelanda, mpe yandi ketubila mazayisu mpe kutanga baletre kana yakele, na manima yandi kebokila nkengi ya kizungidila. Na manima ya diskur ya kisalu, nkengi ya kizungidila kesukisa lukutakanu na muyimbu yina yandi ponaka. Mpe na manima yandi kebokila mpangi ya bakala yina kesala kisambu ya nsuka. Na sabala yango bakalasi yankaka kevuanda ve. Kana yakele na grupe mosi balenda sala balukutakanu na bau mutindu bakesalaka, kasi bakesangana na kimvuka nionso na ntangu ya diskur ya kisalu ya nkengi ya kizungidila.

 SABALA YA LUKUTAKANU YA NENE YA KIZUNGA MPE YA KIZUNGIDILA

21. Na sabala yina kevuanda lukutakanu mosi ya nene ya kizunga mpe ya kizungidila, kimvuka kesala ata lukutakanu mosi ve. Mazayisu fueti pesama na kimvuka ti mambu yina bongisamaka na programe ya sabala yango, fueti tadulua na kati ya dibuta to muntu yandi mosi.

 SABALA YA MBAMBUKULU

22. Kana Mbambukulu kesalama na katikati ya sabala, lukutakanu Luzingu mpe kisalu kevuanda ve.

 NKENGI YA LUKUTAKANU LUZINGU MPE KISALU

23. Kimvuka ya bankulutu fueti pona mpangi mosi kati na bankulutu samu yandi vuanda nkengi ya lukutakanu Luzingu mpe kisalu. Mpangi yango kele na kiyekua ya kulandela lukutakanu samu yabongisama mbote mpe yasalama na kuzitisa malako yayi. Yandi kesala ngolo samu basala na bumosi na nsadisi samu na kupesa malongi. Ntangu kaka Mukanda ya lukutakanu Luzingu mpe kisalu ya Baklisto mebima, nkengi ya lukutakanu Luzingu mpe kisalu kekabula masolo ya lukutakanu ya katikati ya sabala samu na bangonda zole. (Tala  paragrafe 3-16 mpe  24.) Yau mesangisa badevuare ya bana kalasi, masolo yankaka, mpe bampangi yina kevuanda baprezidan na kutadila liste yina kimvuka ya bankulutu ponaka. Masolo nionso fueti pesama basabala tatu na ntuala. Samu na kupesa badevuare ya bana kalasi, formilere Lokasa ya lisolo na likita Bomoi mpe mosala ya bakristo (S-89) fueti sadulua. Nkengi ya lukutakanu Luzingu mpe kisalu kesala nionso samu programe ya lukutakanu ya mvimba vuanda na tablo ya mazayisu. Kimvuka ya bankulutu lenda pona nkulutu yankaka to nsadisi na kisalu samu yandi pesa yandi maboko na kiyekua yango. Kasi, kaka bankulutu nde kele na yinsua ya kupona banani kesala masolo yankaka katula kaka badevuare ya bana kalasi.

    PREZIDAN YA LUKUTAKANU LUZINGU MPE KISALU

24. Konso sabala, nkulutu mosi fueti vuanda prezidan ya programe ya lukutakanu Luzingu mpe kisalu. (Na bimvuka yina bankulutu kele fioti balenda sadila bansadisi na kisalu ya makoki, kana yamelomba kusala mutindu yina.) Prezidan kele na kiyekua ya kubongisa bampova ya ebandeli mpe ya nsuka, yandi lenda tuadisa diaka disolo ya bavideo samu na mutindu ya kubanda disolo na kisalu ya kusamuna. Yandi kele diaka na kiyekua ya kubokila konso mpangi yina kele na disolo, mpe na kutadila ntalu ya bankulutu yina kele na kimvuka, yandi lenda sala masolo yankaka na lukutakanu, mingimingi, masolo yina kevuandaka kumonisa kaka video. Yandi ketuba kaka bampova ya nkufi na manima ya konso disolo. Kimvuka ya bankulutu kepona bankulutu yina mebonga kusala kiyekua yango. Bankulutu ya makoki nde keponamaka samu na kusala lokola prezidan ya lukutakanu samu na konso sabala. Na kutadila mambu ya konso kimvuka, nkengi ya lukutakanu Luzingu mpe kisalu lenda vuanda prezidan mbala mingi kuluta bankulutu yankaka ya makoki. Kana nkulutu mosi kele na makoki ya kutuadisa ndongokolo ya Biblia na kimvuka, mbala mingi yandi kevuanda diaka na makoki ya kuvuanda lokola prezidan. Kasi, kuzimbakana ve ti, kiyekua ya prezidan kele ya kupesa bafelisitasion mpe malongi ya mfunu na bana kalasi mpe yina mesimbama na nzola. Prezidan fueti kenga ti lukutakanu manisa na wola yina yafueti manisa. (Tala  paragrafe 17 mpe  19.) Kana prezidan mesepela mpe kana kisika kele na estrade, balenda tudila yandi mikro yankaka yina kesadisa yandi yandi bokila bantu yankaka yina kesala masolo. Mutindu mosi mpe, kana yandi mesepela, prezidan lenda vuanda na meza ya ntuala na ntangu ya ntangulu ya Biblia mpe na kitini Kukipesa na kisalu ya kusamuna. Yau kesala ti yandi bika kudia miniti.

   NSADISI SAMU NA KUPESA MALONGI

25. Kana dikoki kele, yakele mbote kupona nkulutu mosi ya makoki yina mezaba kusala masolo samu yandi vuanda nsadisi samu na kupesa malongi. Yandi kele na kiyekua ya kupesa malongi na kinsueki na bankulutu mpe bansadisi na kisalu samu na masolo yina bapesaka bau, yavuanda na disolo ya mukanda ya lukutakanu Luzingu mpe kisalu, na diskur mosi ya bantu nionso, na ndongokolo ya Yinzo’a zulu ya Nkengi to na ndongokolo ya Biblia na kimvuka, to mpe na ntangulu ya baparagrafe ya bandongokolo yango. (Tala  paragrafe 19.) Kana na kimvuka na beno, bankulutu mingi kele bampovi mpe banlongisi ya makoki, konso mvula nkulutu mosi kati na bau lenda ponama lokola nsadisi samu na kupesa malongi. Yakele na mfunu ve nsadisi samu na kupesa malongi pesa malongi na konso disolo.

 BAKALASI YANKAKA

26. Na kutadila ntalu ya bana kalasi, bimvuka kebongisa bakalasi yankaka samu na kusala badevuare ya bana kalasi. Konso kalasi yango fueti tuadusua na mpangi mosi ya makoki samu na kupesa malongi, mingimingi nkulutu. Kana yamelombama, nsadisi na kisalu ya makoki lenda sala kiyekua yango. Kimvuka ya bankulutu kepona kana muntu mosi lenda sala kiyekua yango mpe bakepona kana yakebanda salama na bampangi ya kusuasana. Mpangi yango ya makoki samu na kupesa malongi fueti landa malako yina kele na  paragrafe 18. Na manima ya kumanisa kitini Bima ya ntalu ya kimpeve, prezidan kelomba na bana kalasi bakuenda na kalasi yankaka. Bakevutuka na bisika na bau na manima ya kumanisa kitini Kukipesa na kisalu ya kusamuna.

 BAVIDEO

27. Na lukutakanu yayi, beto kesadila bavideo yina metulua na mukanda ya lukutakanu. Bavideo yango ketulamaka na aplikasion JW Library^® mpe bampangi lenda banda telesharje yau na baapareyi na bau.

© 2023 Watch Tower Bible and Tract Society of Pennsylvania

S-38-KGL 11/23