Ntama mingi ve tribinale ya kizunga ya Mayskiy ya République de Kabardino-Balkarie, kebaka nzengolo na nsambusulu ya mpangi Kirill Gushchin. Prokirere tuba ntete ve kitumbu yina mpangi na beto kebaka.

1. Kilumbu ya 20 Mai 2020

   Basoda ya FSB yina vuataka bamaske mpe vuandaka na minduki kuizaka na yinzo ya mpangi Kirill ntangu yandi zolaka kuenda na kisalu. Basoda yango kangaka yandi shene mpe bavutusaka yandi na kingolo na yinzo na yandi. Balundaka yandi mpe nketo na yandi Svetlana, na kisika mosi na kati ya yinzo na bau tii bamanisaka kusosasosa na yinzo nionso. Soda mosi suekaka mikanda yina pekisamaka na kati ya shambre ya bankuelani yango mpe na kisika yankaka

2. Kilumbu ya 26 Avril 2021

   Bamfumu ya Leta bandaka kusambisa mpangi Kirill na kutadila kimbangi ya muntu mosi yina vuandaka anrejistre balukutakanu na kinsueki. Basoda fundaka yandi samu yandi vuandaka yimbila mpe kusambila mpe kutubila bansikudukusu ya Biblia yina kele na 1 Bakorinto 13:8, yina metuba: ‘Nzola kesukaka ve.’

3. Kilumbu ya 28 Avril 2021

   Kirill fundamaka na bamfumu ya leta ti yandi kele krimineli. Babandaka kusambisa mpangi Svetlana mpe bampangi yankaka 4 ya banketo

4. Kilumbu ya 19 Mai 2021

   Mosi ya basoda ya FSB yina vuandaka na kati ya bantu yina salaka baankete fundamaka samu na bimbangi ya luvunu yina yandi vuandaka pesa samu na Bambangi ya Yehova. Mfumu ya departema yina kesalaka baankete, pesaka yinsua ti bavutula diambu yango na prokirere samu na kuvutukila baankete

5. Kilumbu ya 7 Juin 2021

   Bamfumu nataka diambu yango na tribinale ya distriki ya Mayskiy

Lokola mpangi Kirill, beto ketulaka ntima ti Yehova kekuma ‘kisika ya mbote ya lutanunu na bantangu ya mpasi’ samu na yandi mpe bampangi nionso ya babakala mpe ya banketo yina kena kukanga ntima na banzomono na Russie mpe na Crimée.—Nkunga 9:9, 10.