တၢ်မၤလိ ၁
လံာ်စီဆှံ မၤစၢၤနၤ သ့ဒ်လဲၣ်
ပဝဲခဲလၢာ် ပအဲၣ်ဒိး သ့ၣ်ညါအါထီၣ် ဘၣ်ဃးဒီး တၢ်အိၣ်မူ, တၢ်ကီတၢ်ခဲ, တၢ်သံ ဒီးခါဆူညါအဂ့ၢ်. ပအိၣ်ဒီး တၢ်သူၣ်ကိၢ်သးဂီၤ ဘၣ်ဃးဒီး တနံၤဘၣ်တနံၤ အတၢ်ကီတၢ်ခဲတဖၣ် ဒ်သိးဒီး ပကအီၣ်ဘၣ်အီဘၣ်ဒ်လဲၣ် မ့တမ့ၢ် ပကအိၣ်ဒီး ဟံၣ်မုာ်ဃီပၢၤဒ်လဲၣ်. ဘၣ်ဃးဒီး တၢ်အိၣ်မူ အတၢ်သံကွၢ်လၢ အရ့ဒိၣ်တဖၣ်န့ၣ် ပှၤအါဂၤဒိးန့ၢ်ဘၣ်ဝဲ တၢ်စံးဆၢလၢ လံာ်စီဆှံအပူၤ. တကးဒံးဘၣ် လၢလံာ်စီဆှံအပူၤန့ၣ် အိၣ်ဒီးတၢ်ဟ့ၣ်ကူၣ်လၢ အကဲဘျုးလၢ တနံၤဘၣ်တနံၤအဂီၢ်. ဒီးလံာ်စီဆှံန့ၣ် ကဲဘျုးလၢ ပှၤကိးဂၤဒဲးအဂီၢ်လီၤ.
၁. တၢ်သံကွၢ် တနီၤလၢ ပထံၣ်န့ၢ် အတၢ်စံးဆၢလၢ လံာ်စီဆှံအပူၤန့ၣ် မ့ၢ်မနုၤလဲၣ်.
တၢ်သံကွၢ် အရ့ဒိၣ်လၢလာ်တဖၣ်အံၤ အတၢ်စံးဆၢန့ၣ် အိၣ်လၢ လံာ်စီဆှံအပူၤ. တၢ်သံကွၢ်တဖၣ်အံၤ မ့ၢ်ဝဲ ပှၤဟီၣ်ခိၣ်ဖိ ဟဲကဲထီၣ်ဒ်လဲၣ်. ဘၣ်မနုၤအဃိ ပဟဲအိၣ်မူလၢ ဟီၣ်ခိၣ်ချၢလဲၣ်. ဘၣ်မနုၤအဃိ ပှၤဟီၣ်ခိၣ်ဖိ တူၢ်ဘၣ်တၢ်နးတၢ်ဖှီၣ်လဲၣ်. ဖဲပသံအခါ တၢ်မၤအသးဒီးပှၤဒ်လဲၣ်. ပှၤကိးဂၤဒဲး မ့ၢ်လီကီ တၢ်ဃူတၢ်ဖိးန့ၣ် ဘၣ်မနုၤအဃိ တၢ်ဒုးတၢ်ယၤအါ ထဲအံၤညါလဲၣ်. ခါဆူညါန့ၣ် ဟီၣ်ခိၣ်ကဟးဂီၤဧါ. လံာ်စီဆှံ ဟ့ၣ်ဂံၢ်ဟ့ၣ်ဘါပှၤ လၢပကဃုသ့ၣ်ညါ တၢ်သံကွၢ်တဖၣ်အံၤ အတၢ်စံးဆၢလီၤ. ပှၤလၢအကကွဲၢ်တဖၣ် ဒိးန့ၢ်ဘၣ် တၢ်သံကွၢ်တဖၣ်အံၤ အတၢ်စံးဆၢလၢ လံာ်စီဆှံအပူၤ ဒီးအသူၣ်မံသးမုာ်ဝဲလံ.
၂. တနံၤဘၣ်တနံၤန့ၣ် ဒ်သိး ပကအိၣ်ဒီး တၢ်သးခုအဂီၢ် လံာ်စီဆှံ မၤစၢၤပှၤ သ့ဒ်လဲၣ်.
လၢလံာ်စီဆှံအပူၤန့ၣ် တၢ်ဟ့ၣ်ကူၣ်လၢအဂ့ၤ အိၣ်ဝဲအါမး. အဒိ, လံာ်စီဆှံ သိၣ်လိဝဲလၢ ဒ်သိးပဟံၣ်ဖိဃီဖိ ကအိၣ်ဒီး တၢ်သးခုနီၢ်ကီၢ်အဂီၢ် ပကဘၣ်မၤဒ်လဲၣ်. ဖဲပသူၣ်ကိၢ်သးဂီၤတၢ်အခါ လံာ်စီဆှံ ဟ့ၣ်ကူၣ်ပှၤလၢ ပကဘၣ်မၤဒ်လဲၣ် ဒီးဒ်သိး ပကအိၣ်ဒီး တၢ်သးခုလၢ ပတၢ်ဖံးတၢ်မၤ အပူၤအဂီၢ် လံာ်စီဆှံ ဟ့ၣ်ကူၣ်ပှၤလၢ ပကဘၣ်မၤဒ်လဲၣ်. ဖဲပတဲသကိး တၢ်ဂ့ၢ်လၢ လံာ်တဘ့ၣ်အံၤ အပူၤအခါ နကသ့ၣ်ညါဘၣ် လံာ်စီဆှံ သိၣ်လိဝဲ ဘၣ်ဃးဒီး တၢ်ဂ့ၢ်တဖၣ်အံၤ တကးဒံးဘၣ် နကသ့ၣ်ညါဘၣ် တၢ်ဂ့ၢ်အဂၤအါမး. ဒီးခီဖျိလၢ ပတဲသကိး တၢ်ဂ့ၢ်လၢ လံာ်တဘ့ၣ်အံၤ အပူၤအဃိ ပမုၢ်လၢ်လၢ နကနာ်သပှၢ်တၢၢ်လၢ “တၢ်ကွဲးအသးခဲလၢာ် [တၢ်ခဲလၢာ်လၢ အအိၣ်လၢ လံာ်စီဆှံအပူၤ] န့ၣ် . . . ကဲဘျုးဝဲ” လီၤ.—၂ တံၤမသ့း ၃:၁၆.
လံာ်တဘ့ၣ်အံၤ တမ့ၢ်လံာ်စီဆှံဘၣ်. ဘၣ်ဆၣ် လံာ်တဘ့ၣ်အံၤ ကဟ့ၣ်ဂံၢ်ဟ့ၣ်ဘါနၤလၢ နကဃုသ့ၣ်ညါ လံာ်စီဆှံ. အဃိ ပဟ့ၣ်ဂံၢ်ဟ့ၣ်ဘါနၤလၢ နကအိးထီၣ်ဖး လံာ်စီဆှံအဆၢတဖၣ်လၢ အအိၣ်လၢ လံာ်တၢ်မၤလိတဘ့ၣ်အံၤအပူၤ ဒီးထိၣ်သတြီၤအီၤဒီး တၢ်လၢနမၤလိဘၣ်တဖၣ်.
ဃုသ့ၣ်ညါအါထီၣ်
ပကတဲသကိး တၢ်ဂ့ၢ်ဘၣ်ဃးဒီး လံာ်စီဆှံမၤစၢၤပှၤဂၤဒ်လဲၣ်, နဖးလံာ်စီဆှံ ကမုာ်အဂီၢ် နကဘၣ်မၤဒ်လဲၣ် ဒီးဒ်သိး နကနၢ်ပၢၢ်လံာ်စီဆှံအဂီၢ် ဘၣ်မနုၤအဃိ နကြၢးဃ့ ပှၤဂၤအတၢ်မၤစၢၤလဲၣ်.
၃. လံာ်စီဆှံ ဟံးစုနဲၣ်ကျဲပှၤသ့
လံာ်စီဆှံန့ၣ် လီၤဂာ်ဒ်သိးဒီး တၢ်ကပီၤဖးဒိၣ်တခါ. တကးဒံးဘၣ် လံာ်စီဆှံန့ၣ် မၤစၢၤပှၤလၢ ပကမၤ တၢ်ဆၢတဲာ်လၢအဘၣ် ဒီးအဒုးသ့ၣ်ညါပှၤ ဘၣ်ဃးဒီး တၢ်လၢအကကဲထီၣ်အသးလၢ ခါဆူညါသ့ဝဲ.
ဖး စံးထီၣ်ပတြၢၤ ၁၁၉:၁၀၅ ဝံၤဒီး တဲသကိး တၢ်သံကွၢ် လၢလာ်တဖၣ်အံၤ–
-
လံာ်စီဆှံန့ၣ် ပှၤကွဲးထါစံးထီၣ်ပတြၢၤ တဂၤအံၤ ထံၣ်ဝဲဒ်လဲၣ်.
-
နၤမီၤ, လံာ်စီဆှံန့ၣ် နထံၣ်အီၤဒ်လဲၣ်.
၄. ပဃုထံၣ်န့ၢ် ပတၢ်သံကွၢ်တဖၣ် အတၢ်စံးဆၢလၢ လံာ်စီဆှံအပူၤသ့
ပိာ်မုၣ်တဂၤ အိၣ်ဒီးတၢ်သံကွၢ်တဖၣ်လၢ အမၤတံာ်တာ်အသး လၢအနံၣ်အါမး. ဒီးအတၢ်သံကွၢ်တဖၣ်အံၤ အတၢ်စံးဆၢန့ၣ် အထံၣ်န့ၢ်ဝဲလၢ လံာ်စီဆှံအပူၤ. ကွၢ်တၢ်ဂီၤမူ ဝံၤဒီး တဲသကိး တၢ်သံကွၢ် လၢလာ်တဖၣ်အံၤ.
-
လၢတၢ်ဂီၤမူအပူၤန့ၣ် ပိာ်မုၣ်တဂၤ အိၣ်ဒီး တၢ်သံကွၢ် မနုၤတဖၣ်လဲၣ်.
-
အမၤလိလံာ်စီဆှံအဃိ မၤစၢၤအီၤဒ်လဲၣ်.
လံာ်စီဆှံ ဟ့ၣ်ဂံၢ်ဟ့ၣ်ဘါပှၤလၢ ပကသံကွၢ်တၢ်. ဖး မးသဲ ၇:၇ ဝံၤဒီး တဲသကိး တၢ်သံကွၢ် လၢလာ်တဖျၢၣ်အံၤ–
-
တၢ်သံကွၢ်တဖၣ်လၢ နအဲၣ်ဒိးသ့ၣ်ညါ အတၢ်စံးဆၢ လၢလံာ်စီဆှံအပူၤန့ၣ် အိၣ်ဧါ.
၅. ဖးလံာ်စီဆှံ ဒီးဃုကျဲဒ်သိး နဖးအီၤကမုာ်အဂီၢ်
ပှၤအါဂၤန့ၣ် ဖးလံာ်စီဆှံမုာ်မး ဒီးအဝဲသ့ၣ် ဒိးန့ၢ်ဘၣ်အဘျုး. ကွၢ်တၢ်ဂီၤမူ ဝံၤဒီး တဲသကိး တၢ်သံကွၢ် လၢလာ်တဖၣ်အံၤ.
-
လၢတၢ်ဂီၤမူအပူၤန့ၣ် ဘၣ်ဃးဒီး တၢ်ဖးလံာ်ဖးလဲၢ်န့ၣ် ပှၤသးစၢ်တဖၣ် အတၢ်ထံၣ် အိၣ်ဒ်လဲၣ်.
-
ဘၣ်မနုၤအဃိ အဝဲသ့ၣ် ဖးလံာ်စီဆှံ မုာ်လဲၣ်.
လံာ်စီဆှံ အတၢ်ဟံးစုနဲၣ်ကျဲတဖၣ်န့ၣ် မၤမုာ်ထီၣ်ပသး ဒီးဟ့ၣ်ပှၤတၢ်မုၢ်လၢ်. ဖး ရိမ့ၤ ၁၅:၄ ဝံၤဒီး တဲသကိး တၢ်သံကွၢ် လၢလာ်တဖျၢၣ်အံၤ–
-
နအဲၣ်ဒိး သ့ၣ်ညါအါထီၣ် ဘၣ်ဃးဒီး တၢ်အၢၣ်လီၤလၢ လံာ်စီဆှံတဆၢအံၤ ပာ်ဖျါထီၣ်ဝဲဧါ.
၆. ဒ်သိး နကနၢ်ပၢၢ် လံာ်စီဆှံအဂီၢ် ပှၤဂၤမၤစၢၤနၤသ့
ပှၤအါဂၤ ဖးလံာ်စီဆှံလၢ အနီၢ်ကစၢ် တကးဒံးဘၣ် အဝဲသ့ၣ် တဲသကိးဝဲဒီး ပှၤဂၤအဃိ ကဲဘျုးလၢ အဝဲသ့ၣ်အဂီၢ် ဒိၣ်မး. ဖး မၤတၢ် ၈:၂၆-၃၁ ဝံၤဒီး တဲသကိး တၢ်သံကွၢ် လၢလာ်တဖျၢၣ်အံၤ–
-
ဒ်သိး ပကနၢ်ပၢၢ် လံာ်စီဆှံအဂီၢ် ပကဘၣ်မၤ မနုၤလဲၣ်.—ကွၢ် အဆၢဖိ ၃၀ ဒီး ၃၁.
ပှၤတနီၤတဲဝဲလၢ– “တၢ်မၤလိလံာ်စီဆှံန့ၣ် လၢာ်ဂီၤတၢ်ဆၢကတီၢ်လီၤ.”
-
မ့မ့ၢ်နၤမီၤ, နဆိကမိၣ်ဒ်လဲၣ်. ဘၣ်မနုၤအဃိ နဆိကမိၣ် ဒ်န့ၣ်လဲၣ်.
တၢ်ဂ့ၢ်လၢအရ့ဒိၣ်
လံာ်စီဆှံန့ၣ် အိၣ်ဒီး တၢ်ဟ့ၣ်ကူၣ်လၢ တၢ်အိၣ်မူ တနံၤဘၣ်တနံၤအဂီၢ်, အိၣ်ဒီး တၢ်သံကွၢ် လၢအရ့ဒိၣ်တဖၣ် အတၢ်စံးဆၢ, မၤမုာ်ထီၣ်က့ၤပသး ဒီးဟ့ၣ်ပှၤတၢ်မုၢ်လၢ်.
တၢ်ကွၢ်ကဒါက့ၤ
-
လၢလံာ်စီဆှံအပူၤန့ၣ် အိၣ်ဒီးတၢ်ဟ့ၣ်ကူၣ် မနုၤတဖၣ်လဲၣ်.
-
လံာ်စီဆှံ စံးဆၢဝဲ တၢ်သံကွၢ် မနုၤတဖၣ်လဲၣ်.
-
လၢလံာ်စီဆှံအပူၤန့ၣ် နအဲၣ်ဒိးသ့ၣ်ညါ တၢ်ဂ့ၢ်မနုၤတဖၣ်လဲၣ်.
ဃုသ့ၣ်ညါ
လံာ်စီဆှံန့ၣ် အိၣ်ဒီးတၢ်ဟ့ၣ်ကူၣ်လၢ အကဲဘျုးလၢပဂီၢ် လၢမုၢ်မဆါတနံၤအံၤ.
“လံာ်စီဆှံအတၢ်ဟံးစုနဲၣ်ကျဲန့ၣ် ကဲဘျုးဝဲထီဘိ” (တၢးထီခိးတၢ် နီၣ်ဂံၢ် ၁ ၂၀၁၈)
ပိာ်ခွါတဂၤလၢ အကဲပှၤလၢအမဲာ်ဆှးသ့ စးထီၣ်လၢအဖိသၣ်ခါလံၤလံၤန့ၣ် လံာ်စီဆှံမၤစၢၤအီၤဒ်လဲၣ်.
ဃုကွၢ် လံာ်စီဆှံ အတၢ်ဟ့ၣ်ကူၣ်လၢအဘျုးအိၣ် လၢဟံၣ်ဖိဃီဖိအဂီၢ်.
“တၢ်ခူသူၣ် ၁၂ ခါလၢ ကမၤစၢၤနၤဒ်သိး နကအိၣ်ဒီး ဟံၣ်မုာ်ဃီပၢၤ” (ပၢၢ်ထီၣ်! နီၣ်ဂံၢ် ၂ ၂၀၁၈)
တၢ်နၢ်ပၢၢ်ကမၣ် ဘၣ်ဃးဒီး မတဂၤ ပၢဟီၣ်ခိၣ်လဲၣ်န့ၣ် လံာ်စီဆှံ ပာ်ဖျါထီၣ်ဝဲ အတၢ်စံးဆၢဒ်လဲၣ်န့ၣ် ဃုသ့ၣ်ညါကွၢ်.