တၢ်သံကွၢ်နီၣ်ဂံၢ် ၁
ယမ့ၢ်ပှၤဒ်လဲၣ်တဂၤလဲၣ်
မ့မ့ၢ်နၤန့ၣ် နကမၤဒ်လဲၣ်
ဆိကမိၣ်ကွၢ်တၢ်ဂ့ၢ်အံၤတက့ၢ်– ခဲရဲၤန့ၣ် မ့ၢ်ပှၤသးစၢ်တဂၤ လၢအသးနံၣ်တပှဲၤထီၣ်ဒံးဘၣ်, ဒီးလဲၤဝဲဆူပၣ်တံၣ် (party) လၢအသကိးအဟံၣ်လီၤ. အဝဲလဲၤတုၤဝဲတစိၢ်ဖိဒီး အသကိးလၢအလီၢ်ခံတဂၤတဲဘၣ်အီၤလၢ–
“ဘၣ်မနုၤအဃိ နဆၢထၢၣ်အိၣ်ဒ်န့ၣ်လဲၣ်.”
ခဲရဲၤ ဃၣ်တရံးအသး ဒီးထံၣ်ဝဲအသကိးမုၣ်ကၠဲၤစံၤခၤ ဟဲစိာ်ဝဲသံးခံကိ ဒီးဟ့ၣ်လီၤအီၤတကိလီၤ. ဒီးအသကိးမုၣ် တဲအီၤလၢ “နမုၣ်ကနီၤထီၣ်လံ နမ့ၢ်အီသံးတစဲးတမွဲးဒု တဘၣ်နီတမံၤဘၣ်.”
ခဲရဲၤ တအဲၣ်ဒိးအီဝဲဘၣ်. ဘၣ်ဆၣ် ကၠဲၤစံၤခၤ မ့ၢ်အသကိးတဂၤလၢအမုာ်ဒီးအီၤအဃိ အဝဲတအဲၣ်ဒိးလၢကၠဲၤစံၤခၤ သးလၢာ်အီၤဘၣ်. ဒီးအဝဲဆိကမိၣ်ဝဲလၢ ‘ကၠဲၤစံၤခၤမ့ၢ်ပှၤလၢ အနၢ်လိၤတဂၤအဃိ အဝဲမ့ၢ်အီဒု ယဲစ့ၢ်ကီးယမ့ၢ်အီ တဘၣ်တၢ်နီတမံၤဘၣ်, မ့ၢ်ဒၣ်သံးလီၤ, တမ့ၢ်ကသံၣ်မူၤဘှီးဒၢး.’
နမ့ၢ်အိၣ်ဘၣ်လၢ ခဲရဲၤအလီၢ်န့ၣ် နကမၤဒ်လဲၣ်.
ဟံးန့ၢ်တၢ်ဆၢကတီၢ် ဒီးဆိကမိၣ်ထံတၢ်တက့ၢ်
ဒ်သိးနဆၢတဲာ်တၢ်လၢ တၢ်ကူၣ်သ့ကသ့အဂီၢ် နကဘၣ်သ့ၣ်ညါလီၤနသးလၢ နမ့ၢ်ပှၤဒ်လဲၣ်တဂၤလဲၣ်န့ၣ်လီၤ. နမ့ၢ်သ့ၣ်ညါလီၤနသးလၢ နမ့ၢ်ပှၤဒ်လဲၣ်တဂၤလဲၣ်န့ၣ် နကသ့ၣ်ညါလၢ တၢ်အရ့ဒိၣ်လၢနတၢ်အိၣ်မူအပူၤန့ၣ်မ့ၢ်မနုၤလဲၣ် ဒီးတၢ်လၢနနာ်န့ၣ်မ့ၢ်မနုၤလဲၣ်န့ၣ်လီၤ. နမ့ၢ်သ့ၣ်ညါလီၤနသးလၢနမ့ၢ်ပှၤဒ်လဲၣ်တဂၤလဲၣ် ဒီးတၢ်လၢနနာ်န့ၣ်မ့ၢ်မနုၤလဲၣ်န့ၣ် နကအိၣ်ဒီးတၢ်သူၣ်ဒူသးဒူဒီး ပှၤဂၤမၢဆူၣ်နၤတန့ၢ်ဘၣ်.—၁ ကရံၣ်သူး ၉:၂၆, ၂၇.
ဒ်သိးနကအိၣ်ဒီး တၢ်သးဒူဒ်အံၤအဂီၢ် နကဘၣ်မၤဒ်လဲၣ်. အဆိကတၢၢ် နမ့ၢ်စံးဆၢက့ၤတၢ်သံကွၢ်လွံၢ်ဖျၢၣ်အံၤန့ၣ် မ့ၢ်ခီၣ်ခါအဂ့ၤကတၢၢ်လၢနဂီၢ်န့ၣ်လီၤ.
၁ ယတၢ်ဂ့ၤတၢ်ဝါတဖၣ် မ့ၢ်မနုၤလဲၣ်.
နမ့ၢ်သ့ၣ်ညါလီၤနနီၢ်ကစၢ် အတၢ်သ့တၢ်ဘၣ်ဒီး တၢ်ဂ့ၤတၢ်ဝါတဖၣ်န့ၣ် နကအိၣ်ဒီးတၢ်သူၣ်ဒူသးဒူလီၤ.
တၢ်အဒိလၢ လံာ်စီဆှံအပူၤ– တၢ်မၢဖိပီလူးကွဲးဝဲလၢ– “ဘၣ်တဘၣ်ယတမ့ၢ်ပှၤသ့စံးသ့ကတိၤတၢ်တဂၤသ့ၣ်သ့ၣ်လီၤ. ဘၣ်ဆၣ်ဒီးမ့မ့ၢ်လၢတၢ်သ့ၣ်ညါနၢ်ပၢၢ်တကပၤန့ၣ်, သပှၢ်ကတၢၢ်, တမ့ၢ်ဒ်န့ၣ်ဘၣ်.” (၂ ကရံၣ်သူး ၁၁:၆, ခ့ခါစှီၤကျိာ်) စီၤပီလူးန့ၣ် သ့ၣ်ညါနၢ်ပၢၢ်ဝဲလံာ်စီဆှံဂ့ၤဂ့ၤလီၤ. လၢတၢ်န့ၣ်အဃိ ဖဲပှၤအဂၤတဖၣ် ထီဒါအီၤအခါဒၣ်လဲာ် အသးတဟးဂီၤဝဲဘၣ်. ပှၤဂၤမ့ၢ်တဲဆါအီၤဘၣ်ဆၣ် အဝဲတဟ့ၣ်အခွဲးလၢ ပှၤဂၤအတၢ်ကတိၤတဖၣ်အံၤကမၤစၢ်လီၤ အတၢ်သူၣ်ဒူသးဒူဘၣ်.—၂ ကရံၣ်သူး ၁၀:၁၀; ၁၁:၅.
သမံသမိးလီၤနသးတက့ၢ်– ကွဲးလီၤနတၢ်သ့တၢ်ဘၣ်တခါတက့ၢ်.
ခဲအံၤကွဲးလီၤ နတၢ်ဂ့ၤတၢ်ဝါတခါတက့ၢ်. (အဒိ, မ့ၢ်နကဲပှၤလၢ ကဟုကယာ်ပှၤဂၤ, ပှၤလၢအသးဂ့ၤ, ပှၤနာ်န့ၢ်နၤသ့ မ့တမ့ၢ်ပှၤလၢပာ်ကဲတၢ်ဆၢကတီၢ်ဧါ.)
၂ ယတၢ်ဂံၢ်စၢ်ဘါစၢ်တဖၣ် မ့ၢ်မနုၤလဲၣ်.
အဒိ, ပျံၤထးအကွီၤမ့ၢ်ထီၣ်အ့ၣ်ထဲတကွီၤန့ၣ် ထီၣ်တဲာ်ညီဝဲလီၤ. ဒ်န့ၣ်အသိး နမ့ၢ်ပျဲနတၢ်ဂံၢ်စၢ်ဘါစၢ်တဖၣ် လုၢ်ဘၢကွံာ်နၤန့ၣ် နတၢ်ပာ်သူၣ်ပာ်သးဆီတလဲ သတူၢ်ကလာ်သ့ဝဲလီၤ.
တၢ်အဒိလၢလံာ်စီဆှံအပူၤ– စီၤပီလူးသ့ၣ်ညါဝဲ အနီၢ်ကစၢ်အတၢ်ဂံၢ်စၢ်ဘါစၢ်လီၤ. အဝဲကွဲးဝဲလၢ– “အဂ့ၢ်ဒ်အံၤ, ဖဲဒၣ်ပှၤလၢညါခီ, ယမုာ်လၤလၢယွၤအတၢ်သိၣ်တၢ်သီလီၤ. ဘၣ်ဆၣ်ဒီးယထံၣ်တၢ်သိၣ်တၢ်သီအဂၤ, အိၣ်လၢယဂီၤတဖၣ်အပူၤ, လၢအဒုးလိာ်ယၤလိာ်အသးဒီး ယသးအတၢ်သိၣ်တၢ်သီ, ဒီးဒုးကဲကုၢ်ယၤလၢ တၢ်ဒဲးဘးအတၢ်သိၣ်တၢ်သီ” လီၤ.—ရိမ့ၤ ၇:၂၂, ၂၃.
သမံသမိးလီၤနသးတက့ၢ်– နကဘၣ်ပၢၤဃာ် နတၢ်ဂံၢ်စၢ်ဘါစၢ်မနုၤတဖၣ်လဲၣ်.
၃ ယဖီတၢၣ်တဖၣ် မ့ၢ်မနုၤလဲၣ်.
အဒိ နငါကါ (taxi) တခိၣ် ဒီးနမၢပှၤနီကါဖိတဂၤအံၤ နီဝံၤနီက့ၤအကါတုၤလၢအသိလၢာ်ဝဲန့ၣ်လီၤ. နမ့ၢ်မၤဒ်အံၤန့ၣ် နလီၤဂာ်ဒ်ပှၤနါစိၤတဂၤ ဒီးနစ့ကလၢာ်ဂီၤကွံာ်ဝဲကလီကလီစ့ၢ်ကီးလီၤ.
နဒိးန့ၢ်ဘၣ်တၢ်မၤလိဒ်လဲၣ်. နမ့ၢ်အိၣ်ဒီး ဖီတၢၣ်န့ၣ်ကမၤစၢၤနၤဒ်သိး နတၢ်အိၣ်မူကလဲၤထီၣ်လဲၤထီ ဒီးနတၢ်ဆၢကတီၢ်တလၢာ်ဂီၤဝဲကလီကလီဘၣ်. မ့ၢ်လၢနသ့ၣ်ညါတၢ်လၢ နကဘၣ်မၤအဃိ နကလဲၤတုၤလၢနဖီတၢၣ်လီၤ.
တၢ်အဒိလၢ လံာ်စီဆှံအပူၤ– စီၤပီလူးကွဲးဝဲလၢ– “မၤသးဒ်န့ၣ်ဒီးယဃ့ၢ်တၢ်ဒ်န့ၣ်အသိး, ဒ်ပှၤသးဒ့ဒီအသိးတမ့ၢ်ဘၣ်. ယထိတၢ်ဒ်န့ၣ်အသိး, ဒ်ပှၤတီၢ်ကလံၤအသိးတမ့ၢ်ဘၣ်.” (၁ ကရံၣ်သူး ၉:၂၆) စီၤပီလူးန့ၣ် တမၤလၢာ်ဂီၤတၢ်ဆၢကတီၢ်ဘၣ်, အဝဲပာ်လီၤအဖီတၢၣ်ဒီး ဂုာ်ကျဲးစၢးမၤဝဲဒ်သိး ကတုၤလၢအဖီတၢၣ်အဂီၢ်လီၤ.—ဖံလံးပံၤ ၃:၁၂-၁၄.
သမံသမိးလီၤနသးတက့ၢ်– ကွဲးလီၤနဖီတၢၣ်သၢခါလၢ နအဲၣ်ဒိးမၤလၢပှဲၤထီၣ်အီၤလၢ ခဲကိာ်တနံၣ်န့ၣ်တက့ၢ်.
၄ တၢ်လၢယနာ်နီၢ်နီၢ်န့ၣ် မ့ၢ်မနုၤလဲၣ်.
နမ့ၢ်သ့ၣ်ညါတၢ်အရ့ဒိၣ်လၢ နတၢ်အိၣ်မူအပူၤမ့ၢ်မနုၤလဲၣ် ဒီးတၢ်လၢနနာ်မ့ၢ်မနုၤလဲၣ်န့ၣ်, နကလီၤဂာ်ဒ်သ့ၣ်တထူၣ်လၢ အဂံၢ်စဲၤလီၤအသးလၢဟီၣ်ခိၣ်လာ်ဖးယိာ် ဒီးဖဲကလံၤမုၢ်ဖးဒိၣ်ဟဲအူဘၣ်အီၤဆူၣ်ဆူၣ်အခါဒၣ်လဲာ် လီၤကူၢ်ဝဲတန့ၢ်ဘၣ်
နမ့ၢ်တအိၣ်ဒီးတၢ်နာ်နီၢ်နီၢ်န့ၣ် ဖဲနဆၢတဲာ်တၢ်အခါ နသးကဒ့ဒီဝဲလီၤ. ဒီးဖဲနဘၣ်သဂၢၢ်ဒီးတၢ်ဆီၣ်သနံးန့ၣ် နကလီၤဂာ်ဒ်တခွံၣ်လၢ အဆီတလဲအလွဲၢ် ဒ်တၢ်အိၣ်သးဆီတလဲဝဲအသိးန့ၣ်လီၤ.
နမ့မ့ၢ်ပှၤလၢ အိၣ်ဒီးတၢ်နာ်နီၢ်နီၢ်န့ၣ် ပှၤလၢနခိၣ်နဃၢၤတဖၣ် မ့ၢ်အိၣ်မူဝဲဒ်လဲၣ်ဂ့ၤဒ်လဲၣ်ဂ့ၤဘၣ်ဆၣ် နတမၤပိာ်ထွဲအဝဲသ့ၣ်အခံဒီး နကဆဲးပၢၤဃာ် လုၢ်လၢ်သကဲာ်ပဝးလၢအဂ့ၤလီၤ.
တၢ်အဒိလၢ လံာ်စီဆှံအပူၤ– ဒ်ပှၤသးစၢ်တဂၤအသိး ဝံဒၤနံးယ့လးန့ၣ် အိၣ်ယံၤဒီး အဟံၣ်ဖိဃီဖိသနာ်က့ အဝဲ “ပာ်လီၤအသးလၢ” ကဒိကနၣ် ကစၢ်ယွၤအတၢ်သိၣ်တၢ်သီလီၤ. (ဒၤနံးယ့လး ၁:၈, ခ့ခါစှီၤကျိာ်) ခီဖျိလၢ ဝံဒၤနံးယ့လးမၤဝဲဒ်န့ၣ်အဃိ အဝဲဆၢထၢၣ်ဂၢၢ်ကျၢၤဒီးအိၣ်မူဒ် အတၢ်နာ်နီၢ်နီၢ်အိၣ်ဝဲအသိးလီၤ.
သမံသမိးလီၤနသးတက့ၢ်– နနာ်တၢ်မနုၤလဲၣ်. အဒိ– မ့ၢ်နနာ်ယွၤဧါ. နမ့ၢ်နာ်ယွၤန့ၣ် ဘၣ်မနုၤအဃိနနာ်အီၤလဲၣ်. ဒီးယွၤအိၣ်ဝဲနီၢ်နီၢ်န့ၣ် တၢ်အုၣ်သးအိၣ်ဝဲလၢနဂီၢ်ဒ်လဲၣ်.
မ့ၢ်နနာ်လၢ ယွၤအတၢ်သိၣ်တၢ်သီသ့ၣ်တဖၣ်န့ၣ် ကဲဘျုးလၢနဂီၢ်ဧါ. ဘၣ်မနုၤအဃိနနာ်ဒ်န့ၣ်လဲၣ်.
မ့ၢ်နအဲၣ်ဒိးလီၤဂာ်ဒ် သ့ၣ်လၣ်တဘ့ၣ်လၢ ကလံၤဟဲဒီးဒံဝ့ၤဒံဝီၤဝဲလၢ ကလံၤကျါန့ၣ်ဧါ မ့တမ့ၢ်ဘၣ်န့ၣ် မ့ၢ်နအဲၣ်ဒိးလီၤဂာ်ဒ်သ့ၣ်တထူၣ်လၢ အဂံၢ်စဲၤလီၤအသးကျၢၤကျၢၤဒီး ဖဲကလံၤမုၢ်ဖးဒိၣ်မ့ၢ်ဟဲအူဘၣ်အီၤအခါဒၣ်လဲာ် လီၤကူၢ်ဝဲတန့ၢ်ဘၣ်န့ၣ်ဧါ. မၤဂၢၢ်ကျၢၤထီၣ် တၢ်လၢနနာ်အီၤတဖၣ်တက့ၢ်. နမ့ၢ်မၤဒ်န့ၣ်န့ၣ် နကလီၤဂာ်ဒ်သ့ၣ်တထူၣ်န့ၣ်လီၤ. ဒီးကမၤစၢၤနၤလၢ နကသ့ၣ်ညါလီၤနသးလၢနမ့ၢ် ပှၤဒ်လဲၣ်တဂၤလဲၣ်န့ၣ်လီၤ.
You May Also Like
ကးတိလၢ လၢၢ်ဘ့ၣ်ဘၣ်ဝါအလိၤ
တြီဆၢ တံၤသကိး အတၢ်ဆီၣ်သနံးတက့ၢ်
ကျဲလွံၢ်ဘိလၢ ကမၤစၢၤနၤလၢ နကဆၢတဲာ်တၢ်လၢ နနီၢ်ကစၢ်.
