“ကစၢ်​ယွၤ​က​ထွါကွံာ် အဝဲသ့ၣ်​ အ​မဲာ်ထံ​ခဲလၢာ် ဒီး​တၢ်သံ​တအိၣ်​လၢၤဘၣ်. ဒီး​တၢ်သူၣ်အုးသးအုး​မ့ၢ်ဂ့ၤ, တၢ်ဟီၣ်တၢ်ယၢၤ​မ့ၢ်ဂ့ၤ, တၢ်လၢ​အ​ဆါ​မ့ၢ်ဂ့ၤ တအိၣ်​လၢၤဘၣ်. တၢ်အလီၢ်လံၤ​လၢ အ​မၤသးအုး​တ့ၢ်ပှၤန့ၣ်​ ဒံကွံာ်​ဝဲ​လံ.”—လီၣ်ဖျါ ၂၁:၄, ဟီၣ်ခိၣ်သီ တၢ်ကွဲး​ကျိာ်ထံ​လံာ်စီဆှံ.

န​ကအိၣ်​ဒီး တၢ်ဖံး​တၢ်မၤ​လၢ အ​​လီၤ​သူၣ်မံသးမုာ်. —ယၡါယၤ ၆၅:၂၁-၂၃.

တၢ်ဆူး​တၢ်ဆါ တအိၣ်​လၢၤဘၣ်.—ယၡါယၤ ၂၅:၈; ၃၃:၂၄.

န​က​အိၣ်မူ​​ဘၣ်​တပူၤဃီ​ဒီး န​ဟံၣ်ဖိ​ဃီဖိ​ဒီး န​သကိး​တဖၣ်လၢ တၢ်သးခု​အပူၤ လီၤထူ​လီၤယိာ်.—စံးထီၣ်ပတြၢၤ ၃၇:၁၁, ၂၉.

ပနာ်​အီၤ​သ့​ခီဖျိ​လၢ တၢ်ဂ့ၢ်လၢ တၢ်​ဖီလာ်​အဃိ.

• ကစၢ်​ယွၤ​မၤ​လၢပှဲၤ အ​တၢ်အၢၣ်​လီၤ​တဖၣ်​သ့ဝဲ. မ့ၢ်လၢ ယဟိဝၤ​ယွၤ အစိကမီၤ လၢာ်​တသ့ဘၣ်​ အဃိ လံာ်စီဆှံ​ကိးအီၤလၢ “သ့တၢ်လၢာ်” ကစၢ်. (လီၣ်ဖျါ ၁၅:၃) လံာ်စီဆှံ​တဲ​ဝဲ​လၢ “ကစၢ်ယွၤ​န့ၣ်​ မၤတၢ်​သ့​ခဲလၢာ်” အဃိ ပ​သ့ၣ်ညါ​ဘၣ်​လၢ ကစၢ်​ယွၤ​မၤ​ဂ့ၤထီၣ်က့ၤ ဟီၣ်ခိၣ်​တၢ်အိၣ်သး​တဖၣ်​ သ့ဝဲ.—မးသဲ ၁၉:၂၆.

• ကစၢ်​ယွၤ​အဲၣ်ဒိး မၤ​လၢပှဲၤ​အ​တၢ်အၢၣ်​လီၤ​တဖၣ်. အဒိ, ယဟိဝၤ​ယွၤ​သးအိၣ်​ မၤသမူထီၣ်​က့ၤ ပှၤသံ​တဖၣ်.—ယိၤဘး ၁၄:၁၄, ၁၅.

  လံာ်စီဆှံ တဲ​စ့ၢ်ကီး​လၢ ကစၢ်​ယွၤ​အ​ဖိခွါ ယ့ၣ်ၡူးန့ၣ်​ မၤဘျါ​က့ၤ​ပှၤဆူးပှၤဆါ​တဖၣ်. ဘၣ်မနုၤ​အဃိ ယ့ၣ်ၡူး​မၤ​ဝဲ​ဒ်န့ၣ်လဲၣ်. မ့ၢ်လၢ​အသးအိၣ်​မၤ​ဝဲ​အဃိ. (မၢ်ကူး ၁:၄၀, ၄၁) ယ့ၣ်ၡူး​ပာ်ဖျါထီၣ်​ အပၢ်​အ​တၢ်ပာ်သူၣ်ပာ်သး လီၤတံၢ်​လီၤဆဲး​အဃိ ထီဘိ​န့ၣ်​ အသးအိၣ်​မၤစၢၤ ပှၤလၢ​အ​လိၣ်​ဘၣ်​တၢ်မၤစၢၤ​တဖၣ်.—ယိၤဟၣ်​ ၁၄:၉.

  အဃိ ပနာ်သ့​သပှၢ်တၢၢ်​လၢ ယဟိဝၤ​ယွၤ​ဒီး​ယ့ၣ်ၡူး​ခရံာ် အဲၣ်ဒိး​မၤစၢၤ​ပှၤ ဒ်သိး​ပ​ကအိၣ်​ဒီး တၢ်​သူၣ်ဖှံ​သးညီ​လၢ ခါဆူညါ.—စံးထီၣ်ပတြၢၤ ၇၂:၁၂-၁၄; ၁၄၅:၁၆; ၂ ပ့းတရူး ၃:၉.