ယ​အိၣ်ဖျဲၣ်​လၢ သဝီ အၣ်​ခ​ယူၢ် လၢ​ကစၢၢ်​ကျါ လၢ​ကီၢ်​ကွၢ်ထံၢ်​မံၤ​လၢ် မုၢ်နုာ်​တခီ​န့ၣ်​လီၤ. ယ​ဟံၣ်ဖိ​ဃီဖိ​တဖၣ်​န့ၣ်​မ့ၢ် အ​စံၣ် ကလုာ်ဒူၣ် လၢ​အ​ဟဲ​လီၤစၢၤ​လီၤသွဲၣ်​လၢ မၢ်​ယၤ​ကလုာ်ဒူၣ်​န့ၣ်​လီၤ. ယ​တဲ​ယ​ပှၤ​ကလုာ်​အကျိာ် ဘၣ်​ဝဲ​တကးဒံးဘၣ် ယ​တဲ​စ​ပဲၣ်​နံၣ်​အကျိာ် ဘၣ်​ဝဲ​စ့ၢ်ကီး​လီၤ. လၢ​ကီၢ်​ကွၢ်ထံၢ်​မံၤ​လၢ်​န့ၣ် ထံ​လီၢ်​ကီၢ်ပူၤ​အ​တၢ်ဒုး​တၢ်ယၤ အိၣ်ဝဲ​အ​နံၣ် ၃၆ နံၣ်​န့ၣ်​လီၤ. ဒီး​ဖဲ​ယ​ဒိၣ်ထီၣ် အဆၢ​ကတီၢ်​န့ၣ် တၢ်ဒုး​ဆူၣ်​ထီၣ်ဝဲ​ဒိၣ်မး​လီၤ. ဖဲ​န့ၣ်​အဆၢ​ကတီၢ် ပှၤ​အ​စံၣ်ဖိ​တဖၣ် သံဝဲ​အါအါ​ဂီၢ်​ဂီၢ်​လီၤ.

ဖဲ​ယ​အိၣ် လွံၢ်​နံၣ်​အခါ ယ​ကၠီ​လၢ​အ​အိၣ်​နွံ​နံၣ်​တဂၤ လိာ်ကွဲ​ဝဲ​ဒီး​စု​မ့ၣ်ပိၢ်​ဒီး မ့ၣ်ပိၢ်​န့ၣ်​ပိၢ်ဖးထီၣ်​ဝဲ သတူၢ်​ကလာ်​လီၤ. လၢတၢ်န့ၣ်​အဃိ ယ​မဲာ်ချံ​ဟးဂီၤ​ဝဲ​ခံခီ​လၢာ်​လီၤ. မ့မ့ၢ်​ယ​ကၠီ​န့ၣ်​သံဝဲလီၤ. ဖဲ​န့ၣ်​ဝံၤ​အလီၢ်​ခံ ယ​ဘၣ်​လဲၤထီၣ်​ကၠိ​လၢ ပှၤမဲာ်​တထံၣ်​တၢ်​အ​ကၠိ လၢ​အိၣ်​လၢ​ကွၢ်ထံၢ်​မံၤ​လၢ် အ​ဝ့ၢ်​ပူၤ​န့ၣ်​လီၤ. ဖဲ​န့ၣ်​အဆၢ​ကတီၢ် ပှၤလၢ​အ​ကွၢ်ထွဲ​ယၤ​သ့ၣ်​တဖၣ် ဘၣ်​မနုၤ​အဃိ အဝဲသ့ၣ် တ​ပျဲ​ယ​တဲတၢ်​ဒီး ဖိသၣ်​အဂၤ​တဖၣ်​လဲၣ်​ဒီး ဘၣ်​မနုၤ​အဃိ ယ​တံၤသကိး​လၢ​ကၠိတဖၣ် ဟးဆှဲး​ယၤ​လဲၣ်န့ၣ် ယ​တ​နၢ်ပၢၢ်​ဘၣ်. ယ​ဘၣ်​အိၣ်သယုၢ်​ထဲ​တဂၤဧိၤ ထီဘိ​လီၤ. ဘၣ်ဆၣ် တနံၣ်​အတီၢ်ပူၤ​န့ၣ် ယ​က့ၤ​အိၣ်ဘၣ်​ဒီး​ယ​မိၢ် ခံ​လါ​န့ၣ်​လီၤ. ယ​ခိး​ကွၢ်လၢ် တၢ်​ဆၢကတီၢ်​အံၤ​ထီဘိ မ့ၢ်​လၢ​ယ​မိ​န့ၣ်​မ့ၢ် ပှၤလၢ​အ​အဲၣ်​ယၤ ဒီး​ကဟုကယာ်​ယၤ​အဃိ​လီၤ. ဘၣ်ဆၣ် လီၤသးအုး​ဒိၣ်မး ဖဲ​ယ​သးအိၣ် အ​နံၣ် ၁၀ အခါ​ယ​မိ​သံဝဲလီၤ. ယ​တူၢ်ဘၣ်​လၢ ပှၤ​ထဲ​တဂၤဧိၤ​လၢ အ​အဲၣ်​ယၤ​န့ၣ် လီၤမၢ်​ကွံာ်ဝဲ​လၢ​ယ​ဂီၢ်​လီၤ. ဖဲ​န့ၣ်​အဆၢ​ကတီၢ် ဘူး​တ့ၢ်​မး​လၢ​ယ​သး​က​သ့ၣ်ဖးဝဲ​လီၤ.

ဖဲ​ယ​သးအိၣ် ၁၁ နံၣ်​အခါ ယ​က့ၤကဒါက့ၤ​ဆူ ယ​သဝီ​န့ၣ်​လီၤ. ဖဲ​န့ၣ် ယ​က့ၤ​အိၣ်​ကဒါက့ၤ​ဒီး ယ​ဒီပုၢ်ဝဲၢ်​ခိၣ်ချၢ​ဒီး အဟံၣ်​ဖိ​ဃီဖိ​လီၤ. အဝဲသ့ၣ်​ကွၢ်ထွဲ​ယၤ လၢ​နီၢ်ခိ​တၢ်လိၣ်ဘၣ်​တဖၣ် ဘၣ်ဆၣ် မ့မ့ၢ်​ယ​သး အ​တၢ်​တူၢ်ဘၣ်​န့ၣ် ပှၤ​မၤစၢၤ​ယၤ​တ​သ့ နီ​တဂၤ​ဘၣ်. တဘျီတခီၣ် ဖဲ​ယ​ဟီၣ်​ကိးပသူ​ထီၣ်​ဆူ​ယွၤ​အ​အိၣ်ဒီး​စံး– “ဘၣ်​မနုၤ​အဃိ ယ​မိၢ်​ဘၣ်​သံဝဲ​လဲၣ်. ဒီး​ဘၣ်​မနုၤ​အဃိ ယ​မဲာ်ချံ ဘၣ်​ဟးဂီၤ​ဝဲ​လဲၣ်. ဘၣ်ဆၣ် ပှၤ​တဲ​ယၤ​လၢ တၢ်​လီၤသးအုး​လၢ ယ​ဘၣ်​ကွၢ်ဆၢၣ်မဲာ်​ဘၣ်​အီၤ​တဖၣ်​အံၤ မ့ၢ်​တၢ်ဘၣ်​ယွၤ​အသး​န့ၣ်​လီၤ. အဃိ ယ​ဆိကမိၣ်​လၢ​ကစၢ်​ယွၤ​န့ၣ် အ​တၢ်​သးကညီၤ တအိၣ်​ဘၣ် ဒီး​အ​တၢ်အဲၣ်​တၢ်ကွံ တအိၣ်​ဘၣ်. ယ​အဲၣ်ဒိး မၤသံ​လီၤ​ယ​သး ဘၣ်ဆၣ် ယ​က​ဘၣ်​မၤ​ဒ်လဲၣ်​န့ၣ် ယ​မၤ​တဘၣ်​ဘၣ်.

ခီဖျိ​လၢ ယ​မဲာ်​တထံၣ်​တၢ်​အဃိ ပှၤ​မၤဘၣ်ဒိ​ဘၣ်ထံး​ယၤ ညီဝဲ​လီၤ. ယ​မ့ၢ်​ပိာ်ခွါ​ဖိ​တဂၤ​ဒၣ်လဲာ် ပှၤ​ဖီၣ်ဆူၣ်​မံဃုာ်​ယၤ တဘျုး​ဘျီ​ညါ​လီၤ. ဘၣ်ဆၣ် ယ​တ​လဲၤ​တၢၣ်​ဖျါထီၣ် တၢ်ဂ့ၢ်​နီတဘျီ​ဘၣ်. မ့ၢ်​လၢ ယ​ဆိကမိၣ် ပှၤလၢ​က​ဒိကနၣ်​ယၤ တအိၣ်​နီ​တဂၤ​ဘၣ်​အဃိ​န့ၣ်​လီၤ. အါတက့ၢ် ပှၤ​တ​ဟဲ​ရ့​ယၤ​ဘၣ်. ဒီး​ယဲ​စ့ၢ်ကီး ယ​တ​ဟး​ရ့​ဒီး ပှၤ​နီ​တဂၤ​ဘၣ်. ယ​အိၣ်​ထဲ​တဂၤဧိၤ ဒီး​ယ​သူၣ်အုး​သးအုး​ဒိၣ်မး​လီၤ. ယ​နာ်​ပှၤ​တ​ဘူၣ်​နီ​တဂၤ​ဘၣ်.

ဖဲ​ယ​အိၣ် ၁၃ နံၣ်​အခါ​န့ၣ် ယဟိဝၤ​ပှၤအုၣ်​အသး ဒီမါဝၤ​ခံဂၤ ဟဲ​ဆူ​ယ​အိၣ်​ဖဲ မုၢ်ဆါခီ​ကၠိ​ပျၢ် အဆၢ​ကတီၢ်​န့ၣ်​လီၤ. ယ​သရၣ်​လၢ အသး​ကညီၤ​ဘၣ်​ယၤ​တဂၤ မၢ​အဝဲသ့ၣ်​ဒီမါဝၤ​ခံဂၤ ဟဲ​အိၣ်သကိး​ယၤ​လီၤ. အဝဲသ့ၣ် တဲဘၣ်​ယၤ လၢ​လံာ်စီဆှံ​စံးပာ်ဝဲ​လၢ ပှၤသံ​တဖၣ် က​ဂဲၤဆၢထၢၣ်​သမူထီၣ်​က့ၤဝဲ ဒီး​ပှၤလၢ​အမဲာ်​တထံၣ် တၢ်ဘၣ်​တဖၣ် က​ထံၣ်​ထီၣ်​က့ၤ​တၢ်​လီၤ. (ယၡါယၤ ၃၅:၅; ယိၤဟၣ် ၅:၂၈,၂၉) တၢ်​လၢ​အဝဲသ့ၣ် သိၣ်လိ​ယၤ​န့ၣ် ဘၣ်​ယ​သး​ဒိၣ်မး​လီၤ. ဘၣ်ဆၣ် ယ​က​ကတိၤ​တၢ်​ဒီး အဝဲသ့ၣ်​အဂီၢ်​ကီဝဲ​လီၤ. မ့ၢ်​လၢ ယ​တ​ညီနုၢ်​ကတိၤ​တၢ် ဒီး​ပှၤဂၤ​အဃိ​လီၤ. ယ​တ​အဲၣ်ဒိး​တဲတၢ်​ဒီး အဝဲသ့ၣ် သနာ်က့ အဝဲသ့ၣ်​ဂုာ်ကျဲးစၢး ပာ်ဖျါ​ထီၣ်ဝဲ တၢ်အဲၣ်​တၢ်ကွံ ဒီး​တၢ်​ဝံသးစူၤ လၢ​ယ​ဖီခိၣ် ဒ်သိး​က​သိၣ်လိ​ယၤ တၢ်မ့ၢ်​တၢ်တီ​လၢ လံာ်စီဆှံ​ပူၤ​အဂီၢ်​န့ၣ်​လီၤ. ပှၤဒီမါဝၤ​ခံဂၤ​အံၤ က​ဟဲ​အိၣ်သကိး​ယၤ​အဂီၢ်​န့ၣ် အဝဲသ့ၣ်​က​ဘၣ်​ခီဂာ်​ကစၢၢ် ဒီး​ဘၣ်​ဟးဝဲ​တၢ်ဒ့ၣ်စၢၤ​ယံၤဝဲ ၆ မံးလာ် (၁၀ ကံလိမံထၢၣ်) လီၤ.

ယ​ဝဲၢ်ခွါ တဲဘၣ်​ယၤ​လၢ ပှၤဒီမါဝၤ လၢ​အ​ဟဲ​သိၣ်လိ​ယၤ လံာ်စီဆှံ​န့ၣ် ကူဝဲကၤဝဲ တၢ်ကူ​တၢ်ကၤ လၢ​အ​ကဆှဲ​ကဆှီ သနာ်က့​အဝဲသ့ၣ် အ​တၢ်​တအိၣ်​တ​ယၢၤ​ဘၣ်. ဘၣ်ဆၣ် အဝဲသ့ၣ် အ​သူၣ်အိၣ်​သးအိၣ်​ယၤ ဒီး​ဟဲ​စိာ်​န့ၢ်​ယၤ တၢ်ဟ့ၣ်​လၢ​အ​ဆံး​ဖိ​တဖၣ်​ထီဘိ​လီၤ. အဃိ ယ​တူၢ်ဘၣ်​လၢ ထဲ​ခရံာ်ဖိ​လၢ အမ့ၢ်​အတီ​တဖု​န့ၣ် က​ပာ်ဖျါ​ထီၣ် တၢ်အဲၣ်​တၢ်ကွံ​ဒ်​န့ၣ်​လီၤ.

ယ​မၤလိ လံာ်စီဆှံ လၢ​ပှၤမဲာ်​တထံၣ်​တၢ်​အ​လံာ် အ​တၢ်မၤစၢၤ​အဃိ​န့ၣ်​လီၤ. တၢ်ဂ့ၢ်​လၢ ယ​မၤလိ​ဘၣ်​သ့ၣ်​တဖၣ်​န့ၣ် ယ​နၢ်ပၢၢ်​အီၤ​လီၤ. ဘၣ်ဆၣ်​သနာ်က့ တၢ်ဂ့ၢ်​လၢ ယ​မၤလိ​ဘၣ်​အကျါ​တနီၤ​န့ၣ် ယ​က​ဘၣ်​တူၢ်လိာ်​အီၤ ကီဝဲ​လီၤ. အဒိ ကစၢ်​ယွၤ ဒီး​ပှၤအဂၤ​သ့ၣ်​တဖၣ် သူၣ်အိၣ်​သးအိၣ်​ယၤ​နီၢ်ကီၢ်​န့ၣ် မ့ၢ်​တၢ်​လၢ​ယ​နာ်​ဘၣ်​အီၤ ကီဒိၣ်မး​လီၤ. ဘၣ်​မနုၤ​အဃိ ကစၢ်​ယွၤ ဘၣ်​ပျဲဝဲ​တၢ်နး​တၢ်ဖှီၣ်​အခွဲး တစိၢ်​တလီၢ်​လဲၣ်န့ၣ် ယ​နၢ်ပၢၢ်​ဘၣ်ဆၣ် ယ​က​ဘၣ်​ထံၣ် ယဟိဝၤ​ယွၤ ဒ်​ပၢ်​လၢ​အ​အိၣ်ဒီး​တၢ်အဲၣ်​တဂၤ​အသိး​န့ၣ် ကီဝဲ​လၢ​ယ​ဂီၢ်​လီၤ. *

တၢ်​လၢ ယ​မၤလိ​ဘၣ်​လၢ လံာ်စီဆှံ​အ​ပူၤ​တဖၣ်​န့ၣ် မၤစၢၤ​ယၤ​ဒ်သိး ယ​က​ဆီတလဲ ယ​တၢ်ထံၣ်​ကယီ​ကယီ​န့ၣ်​လီၤ. အဒိ ယ​မၤလိ​ဘၣ်​လၢ ကစၢ်​ယွၤ​ဒိသူၣ်​ဒိသး​ဝဲ ပှၤလၢ​အ​တူၢ်ဘၣ် တၢ်ကီ​တၢ်ခဲ​တဖၣ်​န့ၣ်​လီၤ. ပှၤလၢ​အ​ဘူၣ်ထီၣ်​ဘါထီၣ် ကစၢ်​ယွၤ​န့ၣ် ဖဲ​အဝဲသ့ၣ်​တူၢ်ဘၣ်​ဝဲ တၢ်ကီ​တၢ်ခဲ​အခါ ယွၤ​စံး​ဝဲ​လၢ– “ယ​နၢ်ဟူ အ​တၢ်​ကိးပသူ​ကိးပသီ. . . အဂ့ၢ်ဒ်အံၤ, ယ​သ့ၣ်ညါ အ​သူၣ်ကိၢ်​အသး​ဂီၤ​လီၤ.” (၂ မိၤၡ့ ၃:၇) ဖဲ​ယ​နၢ်ပၢၢ်ထီၣ် ယဟိဝၤ​ယွၤ အ​တၢ်ဂ့ၤ​တၢ်ဝါ​သ့ၣ်​တဖၣ်​အခါ တၢ်အံၤ​ထိၣ်ဟူး​ထိၣ်ဂဲၤ​ထီၣ်​ယၤ​လၢ ယ​က​ဟ့ၣ်လီၤ​ယ​သး​ဆူ​အ​အိၣ်​လီၤ. ဖဲ ၁၉၉၈ န့ၣ်​ယ​ဒိး​ဘျၢထံ ဒီး​ယ​ကဲထီၣ် ယဟိဝၤ​ပှၤအုၣ်​အသး​တဂၤ​လီၤ.

ယ​ဘျၢထံ တနံၣ်​ဝံၤ​အလီၢ်​ခံ​န့ၣ် ယ​လဲၤထီၣ် ပှၤမဲာ်​တထံၣ်​တၢ် အ​တၢ်​မၤလိ လၢ​အ​အိၣ်ဘူး​ဒီး ဝ့ၢ်​အဲး​စ​ခူ​ထၣ်​န့ၣ်​လီၤ. တၢ်​အိၣ်ဖှိၣ်​သးပှၢ်​လၢ အိၣ်​လၢ​ဟီၣ်ကဝီၤ​ဖဲ​န့ၣ်​တဂၤ သ့ၣ်ညါ​ဘၣ်​လၢ ယ​အိၣ်ဒီး​တၢ်ကီ​တၢ်ခဲ​လၢ ယ​က​လဲၤထီၣ် တၢ်​အိၣ်ဖှိၣ်​ရိဖှိၣ်​အဂီၢ်​န့ၣ်​လီၤ. ဒ်သိး​ယ​က​လဲၤထီၣ်​ဘၣ် တၢ်​အိၣ်ဖှိၣ်​လၢ အ​အိၣ်ဘူး​ကတၢၢ် ဒီး​ယ​သဝီ​န့ၣ် ယ​ဘၣ်​လဲၤ​ခီဂာ် ကစၢၢ်​တဖျၢၣ်​ဃီ လၢ​ပှၤ​နီၢ်​ဒီမါဝၤ​ခံဂၤ က​ဘၣ်​ခီဂာ်ဝဲ​လၢ က​ဟဲ​မၤလိ​ယၤ လံာ်စီဆှံ​အဂီၢ်​လီၤ. အဃိ ယ​က​လဲၤထီၣ် တၢ်​အိၣ်ဖှိၣ်​အဂီၢ်​န့ၣ် ကီ​လၢ​ယ​ဂီၢ်​လီၤ. ဘၣ်ဆၣ် တၢ်​အိၣ်ဖှိၣ်​သးပှၢ်​တဂၤ ဃုထံၣ်​န့ၢ်ဝဲ ဟံၣ်ဖိ​ဃီဖိ​တဒူၣ် အိၣ်​လၢ​ဝ့ၢ်​အဲး​စ​ခူ​ထၣ်​လီၤ. အဝဲ​ရဲၣ်ကျဲၤ​ဝဲ​လၢ ယ​ကအိၣ်​ဘၣ်​လၢ အဝဲသ့ၣ်​အဟံၣ် ဒီး​အဝဲသ့ၣ်​မၤစၢၤ​ယၤ ဒ်သိး​ယ​လဲၤထီၣ် တၢ်​အိၣ်ဖှိၣ်​က​န့ၢ်ဝဲ​အဂီၢ်​န့ၣ်​လီၤ. တုၤလၢ​ခဲအံၤ​န့ၣ် အဝဲသ့ၣ် ကဟုကယာ်​ယၤ ဒ်​အဟံၣ်​ဖိ​ဃီဖိ​တဂၤ​အသိး​လီၤ.

တၢ်​အိၣ်ဖှိၣ်​ဖိ​အဂၤ​တဖၣ်​လၢ အ​ပာ်ဖျါ​ထီၣ်ဝဲ တၢ်အဲၣ်​နီၢ်နီၢ်​လၢ ယ​ဖီခိၣ်​န့ၣ် အိၣ်ဝဲ​ဒီဒူၣ်​လီၤ. ဒ်​ယ​မ့ၢ် ယဟိဝၤ​ပှၤအုၣ်​အသး​တဂၤ​အသိး ယ​တၢ်​လဲၤခီဖျိ​သ့ၣ်​တဖၣ်​အံၤန့ၣ် ဒုး​နာ်န့ၢ်​ယၤ​လၢ ယ​အိၣ်ဘၣ်​လၢ ခရံာ်ဖိ​အမ့ၢ်​အတီ​တဖၣ်​အကျါ​န့ၣ်​လီၤ. —ယိၤဟၣ် ၁၃:၃၄, ၃၅.

လၢညါ ယ​တူၢ်ဘၣ်​လၢ ယ​လုၢ်​ယ​ပှ့ၤ​တအိၣ်​ဘၣ် ဒီး​ယ​တၢ်​မုၢ်လၢ် တအိၣ်​ဝဲ​စ့ၢ်ကီး​ဘၣ်. မ့မ့ၢ်​ခဲအံၤ ယ​တ​တူၢ်ဘၣ်​ဒ်​န့ၣ်​လၢၤဘၣ်. ယ​တၢ်အိၣ်မူ​ပှဲၤ​ဒီး အခီပညီ​န့ၣ်​လီၤ. ယ​မ့ၢ် ယဟိဝၤ​ပှၤအုၣ်​အသး ဒီး​ယ​မၤ​ကစၢ်​ယွၤ အ​တၢ်မၤ​လၢ တၢ်​ဆၢကတီၢ်​လၢပှဲၤ​အဃိ လၢ​ယ​က​ဆိကမိၣ် ယ​တၢ်​ဂံၢ်စၢ်​ဘါစၢ်​အလီၢ်​န့ၣ် ယ​သးစၢၢ်ဆၢ​လၢ ယ​က​ဘၣ်​သိၣ်လိ​ပှၤဂၤ လံာ်စီဆှံ တၢ်မ့ၢ်​တၢ်တီ​အဂ့ၢ်​န့ၣ်​လီၤ. ယ​ဒိးန့ၢ်​ဘၣ် တၢ်ခွဲး​တၢ်ယာ်​လၢ ယ​ကဲ​ဘၣ် တၢ်​အိၣ်ဖှိၣ်​သးပှၢ် ဒီး​ယ​ဟ့ၣ် တၢ်​စံၣ်တဲၤ​တဲလီၤ​လၢ တၢ်​အိၣ်ဖှိၣ်​အ​ပူၤ​န့ၣ်​လီၤ. တကးဒံးဘၣ် ယ​စံၣ်တဲၤ​တဲလီၤ​တၢ်​လၢ ကီၢ်ရ့ၣ်တၢ်အိၣ်ဖှိၣ်ဖးဒိၣ် လၢ​ပှၤ​အ​ကထိ​တဖၣ်​အမဲာ်​ညါ​န့ၣ်​လီၤ.

ဖဲ ၂၀၁၀ အ​နံၣ်​န့ၣ် ယ​ဖျိထီၣ် Ministerial Training School (ခဲအံၤ ဘၣ်​တၢ်​ကိး​အီၤ​လၢ ပှၤ​စိာ်​ဘီမုၢ်​တၢ်သးခု​ကစီၣ်​အ​ကၠိ) လၢ​ဝ့ၢ် အဲလ်စၣ်ဘၤဒိ အ​ပူၤ​န့ၣ်​လီၤ. ကၠိ​အံၤ မၤစၢၤ​ယၤ​ဒ်သိး ယ​မၤ​လၢပှဲၤ ယ​မူဒါ​လၢ တၢ်​အိၣ်ဖှိၣ်​ပူၤ က​သ့​ဂ့ၤဂ့ၤ​အဂီၢ်​န့ၣ်​လီၤ. ခီဖျိ​လၢ​ယ​ထီၣ်ဘၣ် တၢ်​မၤလိ​အံၤ​အဃိ ယ​တူၢ်ဘၣ်​လၢ ယဟိဝၤ​ယွၤ ပာ်လုၢ်​ပာ်ပှ့ၤ​ယၤ​ဒီး အဝဲ​အဲၣ်​ယၤ​ဒိၣ်မး​န့ၣ်​လီၤ. တကးဒံးဘၣ် တၢ်အံၤ​ပာ်ဖျါ​ထီၣ်ဝဲ​လၢ ယဟိဝၤ​ယွၤ ဃုထၢ​ဒီး​သိၣ်လိ​နဲၣ်လိဝဲ ပှၤ​တဂၤ​ဂ့ၤ တဂၤ​ဂ့ၤ ဒ်သိး​ပ​မၤ​အ​တၢ်မၤ က​သ့​အဂီၢ်​န့ၣ်​လီၤ.

ယ့ၣ်ၡူး​စံး​ဝဲ​လၢ– “ဟ့ၣ်​တၢ်​န့ၣ် ဘၣ်​တၢ်​ဆိၣ်ဂ့ၤ​အါန့ၢ် ဒိးန့ၢ်​တၢ်​တက့ၢ်​လီၤ.” (မၤတၢ် ၂၀:၃၅) မုၢ်မဆါ​တနံၤ​အံၤ ယ​စံး​သ့​လၢ ယ​အိၣ်ဒီး​တၢ်သးခု​နီၢ်ကီၢ်​လီၤ. ဒီး​လၢညါ​န့ၣ် ယ​ဆိကမိၣ်​လၢ ယ​မၤစၢၤ​ပှၤဂၤ တ​သ့ဝဲ​နီတဘျီ​ဘၣ်. ဘၣ်ဆၣ် ခဲအံၤ ယ​တူၢ်ဘၣ်​လၢ ယ​မၤစၢၤ​ပှၤဂၤ​သ့ဝဲ​လံ.