တၢ်ဂ့ၢ်လၢအဘၣ်ထွဲလိာ်သးဒီးလံာ်ကုခိၣ် | ပလဲၤခီဖျိ တၢ်သူၣ်ကိၢ်သးဂီၤ ကသ့ဒ်လဲၣ်
တၢ်သူၣ်ကိၢ်သးဂီၤလၢ ကျိၣ်စ့ အဃိ
စီၤဖီလၢအဖိအိၣ်ခံဂၤစံးဝဲ “ဖဲကျိၣ်စ့အလုၢ်အပှ့ၤလီၤလၢ ယထံကီၢ်အခါ တၢ်အီၣ်တၢ်အီသ့ၣ်တဖၣ် အပှ့ၤဒိၣ်ထီၣ်ဒီး ဃုဘၣ်အီၤကီဒိၣ်မးလီၤ. ပဆၢထၢၣ်ရဲၣ်လီၤပသးလၢ ပကလဲၤပှ့ၤအီၣ်တၢ်အဂီၢ် ယံာ်ဝဲတဘျုးနၣ်ရံၣ်ညါလီၤ. ဘၣ်ဆၣ်အါဘျီတချုးပလဲၤတုၤဒံးလၢ တၢ်မဲာ်ညါန့ၣ် တၢ်အီၣ်လၢာ်ကွံာ်ဝဲဒၣ်န့ၣ်လီၤ. ပှၤတဖၣ်န့ၣ်ဃဲၤလီၤဃိလီၤဝဲလၢ တၢ်သၣ်ဝံၤလီၤဒိအဃိ ဒီးတနီၤသးပ့ၤနီၣ်အသး ဒီးလီၤဃံၤလၢကျဲကပၤလီၤ. တၢ်လၢပလိၣ်ဘၣ်တဖၣ်လၢမုၢ်ဆ့ၣ်မုၢ်ဂီၤဒၣ်လဲာ် အပှ့ၤဒိၣ်ထီၣ်တုၤလၢ အကကွဲၢ်ဒီး အကကွဲၢ်လၢအကထိတဖၣ်လီၤ. လၢခံကတၢၢ် ကျိၣ်စ့သ့ၣ်တဖၣ်န့ၣ် အလုၢ်အပှ့ၤတအိၣ်လၢၤဘၣ်. ယစ့လၢယပာ်ဖှိၣ်လၢစ့တၢးအပူၤ, တၢ်အုၣ်ကီၤဒီးပ့ၣ်စ့ၣ် အလုၢ်အပှ့ၤတအိၣ်လၢၤဘၣ်.”
စီၤဖီ
အဟံၣ်ဖိဃီဖိ သုတလီၤဒိတဂ့ၤအဂီၢ် စီၤဖီသ့ၣ်ညါဝဲလၢ အဝဲကဘၣ်အိၣ်ဒီး “တၢ်ကူၣ်သ့အမူာ်အနီၢ်” န့ၣ်လီၤ. (ကတိၤဒိ ၃:၂၁) အဝဲစံးဝဲ “ယမ့ၢ်ပှၤဘှီ လီမ့ၣ်အူတဂၤလီၤ. ဘၣ်ဆၣ် စ့မ့ၢ်န့ၢ်တစဲးဖိဒၣ်လဲာ် ကယဲၢ်တၢ်မၤလၢယထံၣ်န့ၣ်ယမၤခဲလၢာ်လီၤ. ပှၤတနီၤဟ့ၣ်ယၤအဘူးအလဲလၢ တၢ်အီၣ်တၢ်အီ မ့တမ့ၢ် ဟံၣ်တၢ်ပီးတၢ်လီတဖၣ်လီၤ. ယမ့ၢ်မၤန့ၢ်ချါသိ (ဆးပၠၣ်) လွံၣ်လိၣ်န့ၣ် ယသူခံလိၣ်ဒီး ယဆါကွံာ်အီၤခံလိၣ်လီၤ. ယမၤဒ်န့ၣ်ဒီး လၢခံယပှ့ၤန့ၢ်ဝဲ ဆီဖိအဘ့ၣ် ၄၀ လီၤ. တုၤဆီဖိတဖၣ် ဒိၣ်ထီၣ်ဒီး ယဆါကွံာ်အီၤဒီး ယပှ့ၤက့ၤကဒီး ဆီဖိအဘ့ၣ် ၃၀၀ လီၤ. လၢခံဆီဖိဒိၣ်ထီၣ်ဒီး ယလဲဆီအဘ့ၣ် ၅၀ ဒီး ဘုခ့ကမူၣ်ခံထၢၣ်, တထၢၣ်န့ၣ် အတယၢၢ်အိၣ်ဝဲအပီၣ် ၁၁၀ (အကံလိ ၅၀) န့ၣ်လီၤ. ဘုခ့ကမူၣ်ခံထၢၣ်အံၤအဃိ ယလုၢ်အီၣ်လုၢ်အီ ယဟံၣ်ဖိဃီဖိဒီး ဟံၣ်ဖိဃီဖိအဂၤတနီၤန့ၢ်ဝဲ ဖးယံာ်ညါလီၤ.”
စီၤဖီသ့ၣ်ညါစ့ၢ်ကီးဝဲလၢ တၢ်အဂ့ၤကတၢၢ်လၢပှၤတဂၤမၤဝဲသ့န့ၣ် မ့ၢ်တၢ်နာ်န့ၢ်ကစၢ်ယွၤလီၤ. ပမ့ၢ်မၤတၢ်ဒ်ကစၢ်ယွၤ တဲဝဲအသိးန့ၣ် အဝဲကမၤစၢၤပှၤလီၤ. ဘၣ်ဃးဒီး နီၢ်ခိအတၢ်လိၣ်ဘၣ်တဖၣ်န့ၣ် ယ့ၣ်ၡူးစံးဝဲလၢ– “သုတဘၣ်ယိၣ်ဘၣ်ဘီတဂ့ၤ. အဂ့ၢ်ဒ်အံၤ, . . . သုပၢ်သ့ၣ်ညါလၢ သုန့ၢ်ဘၣ်တၢ်တဖၣ်န့ၣ် အလီၢ်အိၣ်လီၤ.”—လူၤကၣ် ၁၂:၂၉-၃၁.
လီၤသးအုးဒိၣ်မးလၢ ကစၢ်ယွၤအဒုၣ်အဒါ မုၣ်ကီၤလံၢ် ကွဲန့ၢ်လွဲန့ၢ် ပှၤဟီၣ်ခိၣ်ဖိတဖၣ် ဒ်သိးကသးစၢၢ်ဆၢထဲ နီၢ်ခိအတၢ်လိၣ်ဘၣ်တဖၣ်န့ၣ်လီၤ. ပှၤဟီၣ်ခိၣ်ဖိတဖၣ် ဘၣ်ယိၣ်တၢ်ဒိၣ်ဒိၣ်မုၢ်မုၢ် ဘၣ်ဃးဒီးတၢ်လၢအလိၣ်ဘၣ်ဝဲ မ့တမ့ၢ်တၢ်လၢအဆိကမိၣ်လၢ အလိၣ်ဘၣ်ဝဲတဖၣ်အဃိ ဂုာ်ကျဲးစၢးမၤဝဲတုၤအန့ၢ်ဘၣ် တၢ်လၢအတလိၣ်တဖၣ်စ့ၢ်ကီးလီၤ. ပှၤအါဂၤန့ၣ် အဒ့ၣ်ထီၣ်ကမၢ်ထီၣ် ဒီးသ့ၣ်ညါဘၣ်က့ၤဝဲလၢ “ပှၤလၢအလိၢ်စ့န့ၣ် ကကဲထီၣ်စ့ကစၢ်အကုၢ်လီၤ.”—ကတိၤဒိ ၂၂:၇.
ပှၤတနီၤနီၤ အတၢ်ဆၢတဲာ်ကမၣ်ဝဲလီၤ. စီၤဖီစံးဝဲ “ပှၤလၢယဟံၣ်ခိၣ်ဟံၣ်ဃၢၤအါဂၤန့ၣ် ပာ်တ့ၢ်ကွံာ်အဟံၣ်ဖိဃီဖိ, တံၤဖိသကိးဖိတဖၣ် ဒီးလဲၤမၤတၢ်ဆူ ထံဂၤကီၢ်ဂၤလီၤ. အဝဲသ့ၣ်တနီၤန့ၣ် တအိၣ်ဒီးလံာ်လၢအဖိးသဲစးအဃိ ဃုဝဲတၢ်မၤတညီဘၣ်. အါတက့ၢ်အဝဲသ့ၣ် ဘၣ်ပာ်ခူသူၣ်အသးလၢပၢၤကီၢ် ဒီးဘၣ်ဟးမံလၢကျဲကပၤန့ၣ်လီၤ. အဝဲသ့ၣ်တဟ့ၣ်ကစၢ်ယွၤ တၢ်ခွဲးတၢ်ယာ်လၢ ကမၤစၢၤအီၤဘၣ်. ဘၣ်ဆၣ် မ့မ့ၢ်ပဝဲပဟံၣ်ဖိဃီဖိတဖၣ်န့ၣ် ဖဲပကွၢ်ဆၢၣ်မဲာ်ဘၣ်ဒီးကျိၣ်စ့တၢ်ကီတၢ်ခဲအခါ ပပျဲလၢကစၢ်ယွၤကမၤစၢၤပှၤန့ၣ်လီၤ.”
မၤထွဲယ့ၣ်ၡူး အတၢ်ဟ့ၣ်ကူၣ်
စီၤဖီတဲကဒီးဝဲ– “ယ့ၣ်ၡူးစံးဝဲလၢ– ‘မၤသးဒ်န့ၣ်ဒီး ဘၣ်ယိၣ်တၢ်လၢခဲဂီၤအဂီၢ်တဂ့ၤ. အဂ့ၢ်ဒ်အံၤ, ခဲဂီၤန့ၣ် ကဘၣ်ယိၣ်တၢ်လၢ အဂီၢ်ဒၣ်ဝဲလီၤ. မုၢ်တနံၤအတၢ်အၢတၢ်နးန့ၣ် အါလံလၢအဂီၢ်လံ.’ လၢတၢ်န့ၣ်အဃိ ကိးနံၤဒဲးယတၢ်ထုကဖၣ်န့ၣ် မ့ၢ်ဒၣ်တၢ်လၢကစၢ်ယွၤ ‘ကဟ့ၣ်ပှၤတၢ်အီၣ်လၢ တနံၤအဂီၢ်’ လၢပသုတလီၤဒိတဂ့ၤန့ၣ်လီၤ. ဒ်ယ့ၣ်ၡူးအၢၣ်လီၤပာ်ဝဲအသိး ကစၢ်ယွၤမၤစၢၤပှၤလီၤ. တၢ်လၢပသးလီန့ၣ် ပတမၤန့ၢ်ဘၣ်ထီဘိဘၣ်. ဘၣ်တဘျီ ယဆၢထၢၣ်ခိးတၢ်ဒ်သိးယကပှ့ၤတၢ်အီၣ် ဘၣ်ဆၣ်တၢ်အိၣ်ဒံးမနုၤလဲၣ်န့ၣ် ယတသ့ၣ်ညါဘၣ်. ဖဲယလဲၤတုၤလၢ တၢ်မဲာ်ညါအခါ အိၣ်တ့ၢ်က့ၤထဲ တၢ်နုၢ်ထံဆံၣ်န့ၣ်လီၤ. ယအီၣ်တၢ်အံၤတဝံၣ်ဘၣ်. ဘၣ်ဆၣ် တၢ်အံၤမ့ၢ်တၢ်အီၣ်တခါလီၤ. လၢတၢ်န့ၣ်အဃိ တၢ်တနၤန့ၣ် ပအီၣ်ဒၣ်ထဲတၢ်နုၢ်ထံဆံၣ်ဧိၤန့ၣ်လီၤ. ယစံးဘျုးဘၣ် ကစၢ်ယွၤဒိၣ်မးလၢ တၢ်မၤအသးဒီတကတီၢ်အပူၤ ပဟံၣ်ဖိဃီဖိတဖၣ် ဖဲအဝဲသ့ၣ်က့ၤမံအခါ တၢ်တသၣ်ဝံၤအသးနီတနၤဘၣ်.” *
ကစၢ်ယွၤအၢၣ်လီၤပှၤလၢ– “ယတညိကွံာ်ဘၣ်နၤဘၣ်, ယတလဲၤသဒၣ်ဘၣ်နၤဘၣ်.”—ဧ့ၤဘြံၤ ၁၃:၅
“အခဲအံၤကျိၣ်စ့တဃံး ဒ်သိးလၢညါလၢၤဘၣ်. ယသ့ၣ်ညါဘၣ်လၢ ယတၢ်လဲၤခီဖျိတဖၣ်န့ၣ်အပူၤ ကသံၣ်အဂ့ၤကတၢၢ်လၢအမၤဘျါ တၢ်သူၣ်ကိၢ်သးဂီၤန့ၣ် မ့ၢ်ဒၣ်တၢ်နာ်န့ၢ်ကစၢ်ယွၤလီၤ. ပမ့ၢ်ပာ်ယဟိဝၤယွၤ * အတၢ်ဘၣ်သးလၢ ပတၢ်ဘၣ်သးအမဲာ်ညါန့ၣ် အဝဲကမၤစၢၤပှၤထီဘိလီၤ. စံးထီၣ်ပတြၢၤ ၃၄:၈ စံးဝဲ– ‘လ့ၣ်ကွၢ်, ဒီးထံၣ်လၢယွၤမ့ၢ်တၢ်ဂ့ၤန့ၣ်တက့ၢ်. ပှၤလၢအသန့ၤအသးလၢအီၤန့ၣ် ဘၣ်ဆိၣ်ဂ့ၤဝဲလီၤ.’ ပထံၣ်ဘၣ်လၢတၢ်ကတိၤအံၤ မ့ၢ်အဘၣ်ဝဲသပှၢ်ကတၢၢ်လီၤ. လၢတၢ်န့ၣ်အဃိ ပမ့ၢ်ကွၢ်ဆၢၣ်မဲာ်ဘၣ်ကဒီး ကျိၣ်စ့တၢ်ကီတၢ်ခဲသနာ်က့ ပတဘၣ်ယိၣ်တၢ်လၢၤဘၣ်.”
“ကစၢ်ယွၤမၤစၢၤပှၤလၢအတီဒီးအီၤတဖၣ် ဒ်သိးအဝဲသ့ၣ်ကအိၣ်ဒီး “ကိၣ်လၢတနံၤအဂီၢ်”
“ပသ့ၣ်ညါထီၣ်ဘၣ်ဂ့ၤဂ့ၤ လၢပှၤဟီၣ်ခိၣ်ဖိကမူဝဲအဂီၢ် တၢ်လၢလိၣ်ဘၣ်ဝဲန့ၣ် တမ့ၢ်တၢ်မၤ မ့တမ့ၢ် ကျိၣ်စ့ဘၣ်, မ့ၢ်ဒၣ်တၢ်အီၣ်တၢ်အီန့ၣ်လီၤ. လၢတၢ်သူၣ်ဆူၣ်သးဆူၣ်အပူၤ ပအိၣ်ခိးကွၢ်လၢ်တၢ်ဆၢကတီၢ်လၢ ကစၢ်ယွၤအတၢ်စံးပာ်လၢအမ့ၢ် ‘ဘုဧိၤဟုဧိၤ ကအိၣ်လၢပှဲၤဝဲလၢဟီၣ်ခိၣ်’ ကဟဲလၢပှဲၤထီၣ်ဝဲန့ၣ်လီၤ. အခါခဲအံၤ ‘ပတၢ်အီၣ်တၢ်အီ, ဒီးပကူပသိးမ့ၢ်အိၣ်ဒီး, ပကသူၣ်မံသးမံလၢ တၢ်တဖၣ်န့ၣ်လီၤ.’ ပဒိးန့ၢ်ဘၣ်တၢ်ဂံၢ်တၢ်ဘါလၢ ကစၢ်ယွၤအကလုၢ်ကထါ လၢအမ့ၢ်ဝဲ– ‘သုမၤတၢ်ဖံးတၢ်န့ၣ်, မ်အထူၣ်ဖျဲးဒီး တၢ်အဲၣ်ကျိၣ်ဧိၤစ့ဧိၤတက့ၢ် ဖဲသုတၢ်အိၣ်တဖၣ်န့ၣ်, သူၣ်မံသးမံဒီးအီၤတက့ၢ်. အဂ့ၢ်ဒ်အံၤ, တၢ်စံးဝဲဒၣ်, ယတညိကွံာ်ဘၣ်နၤဘၣ်, ယတလဲၤသဒၣ်ဘၣ်နၤဘၣ်. မၤသးဒ်န့ၣ်ဒီး, ပကစံးလၢပသးခူတလ့ၢ်, ယွၤမ့ၢ်ပှၤမၤစၢၤယၤ, ဒီးဖဲဒၣ်ပှၤကညီကမၤဘၣ်ယၤန့ၣ်, ယတပျံၤဘၣ်’” န့ၣ်လီၤ. *
ဒ်စီၤဖီအဟံၣ်ဖိဃီဖိအသိးပ “လဲၤတၢ်ဒီးယွၤ” ကသ့အဂီၢ် ပလိၣ်ဘၣ်တၢ်နာ်နီၢ်နီၢ်လီၤ. (၁ မိၤၡ့ ၆:၉) ခဲအံၤမ့ၢ်ဂ့ၤ ခါဆူညါမ့ၢ်ဂ့ၤ ပမ့ၢ်ဘၣ်ကွၢ်ဆၢၣ်မဲာ်ဒီး ကျိၣ်စ့တၢ်ကီတၢ်ခဲန့ၣ် စီၤဖီအတၢ်နာ်ဒီး အတၢ်ကူၣ်သ့အဒိအတဲာ် သိၣ်လိပှၤတၢ်မၤလိလၢအရ့ဒိၣ်တဖၣ်န့ၣ်လီၤ.
ဘၣ်ဆၣ် လၢပဟံၣ်ဖိဃီဖိအဃိ ပတၢ်သူၣ်ကိၢ်သးဂီၤမ့ၢ်အိၣ်န့ၣ် ပကမၤဒ်လဲၣ်.
^ လံာ်အဆၢ. 9 ကွၢ်မးသဲ ၆:၁၁, ၃၄ တက့ၢ်.
^ လံာ်အဆၢ. 10 ယဟိဝၤန့ၣ် မ့ၢ်ကစၢ်ယွၤအမံၤလၢ ဘၣ်တၢ်ပာ်ဖျါထီၣ်အီၤလၢ လံာ်စီဆှံအပူၤလီၤ.
