တၢ်ကတိၤ “လ့ၣ်ကဟၣ်” လၢအအိၣ်လၢ ဟီၣ်ခိၣ်သီ တၢ်ကွဲးကျိာ်ထံလံာ်စီဆှံ အပူၤန့ၣ် လၢကြံးကျိာ်န့ၣ် အဲၣ်ဒိးတဲဝဲအခီပညီ လ့ၣ်ကဟၣ် တကလုာ်ဂ့ၤ တကလုာ်ဂ့ၤ. (မၤတၢ် ၈:၂၈, ၂၉, ၃၈) သနာ်က့ ဖျါလီၤဂာ်လၢ ပှၤအဲၤသံအီးပးဖိ အပဒိၣ်တဂၤအံၤ ဒိးဝဲလ့ၣ်ကဟၣ်န့ၣ် အဒိၣ်န့ၢ်ဒံး လ့ၣ်ကဟၣ် ဆံးဆံးဖိလၢ သုးဖိတဖၣ်ဒိးဝဲ ဒီးလ့ၣ်ကဟၣ်လၢ ပှၤဒိးပြၢတၢ်အဂီၢ်ဒံး. ဘၣ်မနုၤအဃိ ပတဲဒ်န့ၣ်လဲၣ်န့ၣ် ပကကွၢ်သကိး တၢ်ဂ့ၢ်တနီၤ.

ပှၤအဲၤသံအီးပးဖိ အပဒိၣ်တဂၤအံၤ အလဲၤတၢ်ယံၤမး. ပှၤအဲၤသံအီးပးဖိတဂၤအံၤ အကဲဝဲ “အဲၤသံအီးပး အနီၢ်ပၤမုၣ် ကၣ်ဒါက့ၤ အပဒိၣ်တဂၤလၢ အပၢၤဝဲ နီၢ်ပၤမုၣ်အံၤ အတၢ်ထူးတၢ်တီၤ ခဲလၢာ်.” (မၤတၢ် ၈:၂၇) အဲၤသံအီးပး အတၢ်လီၢ်လၢပျၢၤအံၤန့ၣ် ခဲအံၤ အကဲဝဲ စူၢ်ဒၣ် ဒီးအဲၤကူပတူး ကလံၤထံး. ပဒိၣ်တဂၤအံၤ ဘၣ်လဲၤတၢ်ဖးယံၤညါ. ဒီးလၢအတၢ်လဲၤဒီတကတီၢ်န့ၣ် အဟဲစိာ်ဝဲ တၢ်လၢအလိၣ်ဘၣ်တဖၣ် ဒီဒူၣ်ညါ ဒီးဘၣ်သ့ၣ်သ့ၣ် အတဒိးဝဲ လ့ၣ်ကဟၣ် တခိၣ်လီၢ်လီၢ်ဘၣ်. ဒီးဖဲတၢ်မၢဖိအစိၤန့ၣ် ပှၤသူဝဲလ့ၣ်တနီၤ လၢအအိၣ်ဒီး အပၣ်လွံၢ်ပၣ် ဒ်သိး ကဆှၢထီၣ်ဆှၢလီၤ ပှၤလဲၤတၢ်ဖိ. လံာ်တဘ့ၣ်လၢ အတဲဘၣ်ဃးဒီး လံာ်မၤတၢ်အဂ့ၢ်န့ၣ် ပာ်ဖျါထီၣ်ဝဲလၢ “လ့ၣ်ကဟၣ် ဒ်အံၤန့ၣ် ပှၤတီၣ်ဝဲ တၢ်ဖိတၢ်လံၤ ဒီးတၢ်ဘိၣ်တၢ်စှၢၤန့ၢ်အါ, ပှၤဒိးအီၤမုာ် ဒီးပှၤသူအီၤလၢ တၢ်လဲၤတၢ်က့ၤအဂီၢ်ညီ.”

ပှၤအဲၤသံအီးပးဖိ အပဒိၣ်တဂၤအံၤ အဖးလံာ် ဖဲစီၤဖံလံးပူး လဲၤထံၣ်လိာ်သးဒီးအီၤအခါ. လံာ်စီဆှံ ပာ်ဖျါထီၣ်ဝဲလၢ “စီၤဖံလံးပူး ဃ့ၢ်ဝဲလၢ လ့ၣ်ကဟၣ်အကပၤ ဒီးနၢ်ဟူ [ပှၤအဲၤသံအီးပး အပဒိၣ်] ဖးသီၣ်ဝဲ ဝံယၡါယၤအလံာ်.” (မၤတၢ် ၈:၃၀) ပမ့ၢ်ဘၣ်ကွၢ် လ့ၣ်ကဟၣ်လၢ ပှၤဆှၢထီၣ်ဆှၢလီၤ ပှၤလဲၤတၢ်ဖိန့ၣ် ပှၤတတ့ဝဲဒ်သိး အကလဲၤတၢ် ချ့ချ့ဘၣ်. ခီဖျိလၢ လ့ၣ်ကဟၣ် လဲၤတၢ်ကယီကယီအဃိ ပဒိၣ်တဂၤအံၤ ဖးလံာ်န့ၢ်ဝဲ ဒီးစီၤဖံလံးပူး လဲၤစံၣ်လူၤဝဲ လ့ၣ်ကဟၣ်ချုးစ့ၢ်ကီး.

ပှၤအဲၤသံအီးပးဖိ အပဒိၣ်တဂၤအံၤ “အဝဲမၢ စီၤဖံလံးပူး ဟဲထီၣ်ဆ့ၣ်နီၤဒီးအီၤ.” (မၤတၢ် ၈:၃၁) လ့ၣ်ကဟၣ်လၢ ပှၤသူဝဲလၢ ပှၤဒိးပြၢတၢ်အဂီၢ်န့ၣ် ညီနုၢ် ပှၤဒိးပြၢတၢ်ဖိ ဆၢထၢၣ်ဝဲလၢအပူၤ. မ့မ့ၢ် လ့ၣ်ကဟၣ်လၢ ပှၤသူဝဲလၢ ကဆှၢထီၣ်ဆှၢလီၤ ပှၤလဲၤတၢ်ဖိန့ၣ် အိၣ်ဝဲဒီး တၢ်လီၢ်လၢ ပဒိၣ်တဂၤအံၤ ဒီးစီၤဖံလံးပူး ကဆ့ၣ်နီၤဝဲအဂီၢ်.

အဃိ ဒ်လံာ်မၤတၢ် အဆၢဒိၣ် ၈ ပာ်ဖျါထီၣ်ဝဲ ဒီးဒ်တၢ်အုၣ်သးလၢပျၢၤ အိၣ်ဝဲအသိး လၢပတၢ်ကရၢကရိလံာ်လဲၢ်အပူၤန့ၣ် ပထံၣ်ဘၣ် တၢ်ဂီၤလၢ အပာ်ဖျါထီၣ်ဝဲလၢ ပှၤအဲၤသံအီးပးဖိ အပဒိၣ်တဂၤအံၤ အဒိးဝဲ လ့ၣ်ကဟၣ်န့ၣ် အဒိၣ်န့ၢ်ဒံး လ့ၣ်ကဟၣ်လၢ ပှၤသုးဖိဒိးဝဲ ဒီးလ့ၣ်ကဟၣ်လၢ ပှၤသူဝဲလၢ ပှၤဒိးပြၢတၢ်အဂီၢ်ဒံး.