ယဟိဝၤပှၤအုၣ်အသးတဖၣ်​ ထီၣ်ဝဲတၢ်အိၣ်ဖှိၣ်​ တနွံခံဘျီ လၢဘီမုၢ်ဘျီၣ်ဒိၣ်လီၤ. လၢဘီမုၢ်ဘျီၣ်ဒိၣ်န့ၣ်​ ပှၤမၤတၢ်မနုၤလဲၣ်, ဒီးပမ့ၢ်ထီၣ်တၢ်အိၣ်ဖှိၣ်န့ၣ်​ ပကဒိးန့ၢ်ဘၣ်​ အဘျုးဒ်လဲၣ်.

•  ဖဲဘီမုၢ်ဘျီၣ်ဒိၣ်န့ၣ်​ ပှၤမၤတၢ်မနုၤလဲၣ်

•  ဘၣ်မနုၤအဃိ ပဘၣ်ထီၣ်တၢ်အိၣ်ဖှိၣ်လဲၣ်

•  နသကိးတဖၣ်​ တဲဝဲ

 ဘီမုၢ်ဘျီၣ်ဒိၣ်န့ၣ်​ မ့ၢ်ဝဲ တၢ်လီၢ်လီၤလီၤဆီဆီတခါလၢ ပှၤမၤလိလံာ်စီဆှံ. တၢ်ထီၣ်တၢ်အိၣ်ဖှိၣ်န့ၣ်​ ကမၤစၢၤပှၤလၢ

•   ပကသ့ၣ်ညါအါထီၣ်​ တၢ်မ့ၢ်တၢ်တီ ဘၣ်ဃးဒီး ကစၢ်ယွၤအဂ့ၢ်.

•   ပကနၢ်ပၢၢ်ထီၣ်လၢ ဘၣ်မနုၤအဃိ ပစိၤခဲအံၤ တၢ်ကဲထီၣ်အသး ဒ်အံၤလဲၣ်.

•   ပကကဲထီၣ်​ ပှၤလၢအဂ့ၤဒိၣ်န့ၢ်ဒံးအလီၢ်.

•    ပကထံၣ်န့ၢ် တံၤသကိးလၢအဂ့ၤတဖၣ်.

 မ့ၢ်နသ့ၣ်ညါဧါ. ယဟိဝၤပှၤအုၣ်အသး အတၢ်အိၣ်ဖှိၣ်လီၢ်န့ၣ်​ ညီနုၢ် ပှၤတဲသကိးဝဲ ယွၤအဘီမုၢ်အဂ့ၢ်အဃိ ပှၤကိးအီၤလၢ ဘီမုၢ်ဘျီၣ်ဒိၣ်လီၤ.—မးသဲ ၆:၉, ၁၀; ၂၄:၁၄; လူၤကၣ်​ ၄:၄၃.

 တၢ်ဂ့ၢ်တၢ်ကျိၤလၢ နနၢ်ဟူဘၣ်တဖၣ်န့ၣ်​ ကမၤစၢၤနၤ. လံာ်စီဆှံ တၢ်ဟံးစုနဲၣ်ကျဲတဖၣ်လၢ ပှၤတဲသကိးအီၤဖဲ ယဟိဝၤပှၤအုၣ်သး အဘီမုၢ်ဘျီၣ်ဒိၣ်န့ၣ်​ ကမၤစၢၤနၤဒ်သိး နက “မၤန့ၢ်တၢ်ကူၣ်သ့” အဂီၢ်လီၤ. (ကတိၤဒိ ၄:၅) အဃိ ကမၤစၢၤနၤလၢနကမၤ တၢ်ဆၢတဲာ်အဂ့ၤ လၢနတၢ်အိၣ်မူပူၤလီၤ. တကးဒံးဘၣ်​ နကသ့ၣ်ညါထီၣ်​ တၢ်သံကွၢ်လၢ အရ့ဒိၣ်တဖၣ်​ အတၢ်စံးဆၢ, တၢ်သံကွၢ် ဒ်သိးဒီး–

•   ပတၢ်အိၣ်မူ အတၢ်တိာ်ပာ်န့ၣ်​ မ့ၢ်မနုၤလဲၣ်

•   ပထံၣ်ဘၣ်​ တၢ်ကီတၢ်ခဲန့ၣ်​ ပပာ်ထီၣ်​ တၢ်ကမၣ်လၢ ကစၢ်ယွၤအလိၤသ့ဧါ

•   ဖဲပသံအခါ တၢ်ကမၤအသးဒီးပှၤဒ်လဲၣ်

 လၢနွံကတၢၢ် တၢ်အိၣ်ဖှိၣ်န့ၣ်​ ပကနၢ်ဟူဘၣ်​ တၢ်စံၣ်တဲၤတဲလီၤတၢ်, တၢ်စံၣ်တဲၤတဲလီၤတၢ် အခိၣ်တီတနီၤန့ၣ်​ မ့ၢ်ဝဲ–

•   ဘၣ်မနုၤအဃိ ပကဘၣ်မၤထွဲ လံာ်စီဆှံ အတၢ်ဟံးစုနဲၣ်ကျဲလဲၣ်.

•   ဖဲနထံၣ်ဘၣ်​ တၢ်ကီတၢ်ခဲအခါ နဒိးန့ၢ်ဘၣ်​ တၢ်မၤစၢၤ ကသ့ဖဲလဲၣ်.

•   ခဲအံၤ ယွၤအဘီအမုၢ် မၤန့ၢ်ပှၤ တၢ်မနုၤလဲၣ်.

 ဘြဲဒၤ တဲဝဲလၢ “ယသကိးလၢ ကၠိတဂၤ ဟဲထီၣ်တၢ်အိၣ်ဖှိၣ်ဒီးယၤ ဒီးအဝဲ ဆ့ၣ်နီၤတပူၤဃီဒီး ပဟံၣ်ဖိဃီဖိ ဒီးပပၠးအီၤ ပလံာ်တဖၣ်​ ဒီးအတဲယၤလၢ ဖဲဒီပုၢ်ဝဲတဖၣ်​ ဟ့ၣ်တၢ်စံးဆၢလၢ တၢ်အိၣ်ဖှိၣ်အပူၤအခါ အဝဲဘၣ်သူၣ်ဘၣ်သးဝဲဒိၣ်မး. ဒီးအတဲစ့ၢ်ကီးလၢ အသရိာ်န့ၣ်​ တၢ်မၤလိ အတၢ်ရဲၣ်တၢ်ကျဲၤဒ်အံၤ တအိၣ်ဘၣ်.”

 မ့ၢ်နသ့ၣ်ညါဧါ. နကလဲၤထီၣ်​ တၢ်အိၣ်ဖှိၣ်လၢ ဘီမုၢ်ဘျီၣ်ဒိၣ်အဂီၢ် နတလိၣ်ဟ့ၣ်စ့ဘၣ်​ ဒီးပှၤတထၢ တိၢ်မၤဘူၣ်စ့ၢ်ကီးဘၣ်.

 တၢ်ရ့လိာ်မုာ်လိာ်သးန့ၣ်​ ကကဲထီၣ်​ တၢ်ဟ့ၣ်ဂံၢ်ဟ့ၣ်ဘါလၢနဂီၢ်. လံာ်စီဆှံတဲဝဲလၢ ခရံာ်ဖိတဖၣ်​ ကဘၣ်ထီၣ်​ တၢ်အိၣ်ဖှိၣ်န့ၣ်​ မ့ၢ်ဒ်သိး အဝဲသ့ၣ်က “ဟ့ၣ်ဂံၢ်ဟ့ၣ်ဘါလိာ်သး တဂၤဒီးတဂၤ” အဂီၢ်. (ဧ့ၤဘြံၤ ၁၀:၂၄, ၂၅) ပအိၣ်မူဘၣ်လၢ ဟီၣ်ခိၣ်လၢ အပှဲၤဒီး ပှၤလၢအအဲၣ်လီၤထဲအသး သနာ်က့ လၢဘီမုၢ်ဘျီၣ်ဒိၣ်န့ၣ်​ ပကထံၣ်ဘၣ်ဒီး ပှၤလၢအပာ်ဆိ ကစၢ်ယွၤ ဒီးပှၤဂၤအတၢ်လိၣ်ဘၣ်လၢညါအဃိ ပဂံၢ်ပဘါထီၣ်ဒိၣ်မး.

 အဲၤလံစၤ တဲဝဲလၢ “ဒီတနံၤကျၢၤ ဝံၤအလီၢ်ခံ ယတူၢ်ဘၣ်တမုာ်ဘၣ်​ ဒီးယလီၤဘှံးလီၤတီၤ ဘၣ်ဆၣ်​ ပှၤလၢဘီမုၢ်ဘျီၣ်ဒိၣ်တဖၣ်န့ၣ်​ မၤမုာ်ထီၣ်ယၤထီဘိ. ဖဲတၢ်အိၣ်ဖှိၣ်ဝံၤ ဒီးယဟဲက့ၤလၢကျဲအခါန့ၣ်​ ယသးခုဒိၣ်မး ဒီးယဂံၢ်ယဘါအိၣ်လၢ ခဲမုၢ်ဆ့ၣ်အဂီၢ်လံ.”

 မ့ၢ်နသ့ၣ်ညါဧါ. လၢဟီၣ်ခိၣ်ဒီဘ့ၣ်န့ၣ်​ ယဟိဝၤပှၤအုၣ်အသး အတၢ်အိၣ်ဖှိၣ်အိၣ်ဝဲ ၁၂၀,၀၀၀ ဘျဲၣ်​ ဒီးအဝဲသ့ၣ်ထီၣ်တၢ်အိၣ်ဖှိၣ်လၢ တၢ်လီၢ်အတီၤ ၆၀,၀၀၀ ဘျဲၣ်. ဒီးမ့ၢ်လၢ ပှၤဟဲထီၣ်တၢ်အိၣ်ဖှိၣ်​ အနီၣ်ဂံၢ် အါထီၣ်ဝဲအဃိ တနံၣ်ဘၣ်တနံၣ်န့ၣ်​ ပှၤတ့ထီၣ်​ ဘီမုၢ်ဘျီၣ်ဒိၣ်​ အဖျၢၣ်​ ၁,၅၀၀ ဃၣ်ညါ. a