ဘၣ်ဃးဒီးတၢ်ဆဲးယီၢ်န့ၣ် လံာ်စီဆှံတဲဝဲဒ်လဲၣ်
လံာ်စီဆှံ တဲဝဲလၢ
လၢလံာ်စီဆှံအပူၤန့ၣ် ယၢၤထီၣ်ဝဲ တၢ်ဆဲးယီၢ်အဂ့ၢ်ထဲတဘျီဧိၤလီၤ. ဖဲ ၃ မိၤၡ့ ၁၉:၂၈ န့ၣ်တဲဝဲလၢ “သုတဘၣ်ကူးလီၤ သုဖံးသုညၣ်လၢ ပှၤသံအဃိတဂ့ၤ. ဒီးသုတဘၣ် ဆဲးယီၢ် လၢသုလိၤတဂ့ၤ.” ကစၢ်ယွၤ ဟ့ၣ်လီၤဝဲ တၢ်မၤလိာ်အံၤလၢ ပှၤအံၣ်စရ့လးဖိသ့ၣ်တဖၣ်အဂီၢ် ဒ်သိးအဝဲသ့ၣ်တဖၣ် ကလီၤဆီဒီး ပှၤကလုာ်လၢအခိၣ်အဃၢၤသ့ၣ်တဖၣ်လၢ အဆဲးယီၢ် ဒီးဆဲးလီၤဝဲအယွၤအမံၤ မ့တမ့ၢ် တၢ်ပနီၣ်တမံၤမံၤလၢ အယွၤအဂီၢ်. (၅ မိၤၡ့ ၁၄:၂) ပမ့ၢ်ကွၢ် တၢ်သိၣ်တၢ်သီအံၤ ကစၢ်ယွၤဟ့ၣ်လီၤဝဲထဲ ပှၤအံၣ်စရ့လးဖိတဖၣ် သနာ်က့ မ့မ့ၢ် ပဝဲခရံာ်ဖိသ့ၣ်တဖၣ် တကြၢးလၢ ပဆိကမိၣ်ထံအဂ့ၢ်ဘၣ်ဧါ.
မ့ၢ်ခရံာ်ဖိသ့ၣ်တဖၣ် ကြၢးဆဲးယီၢ်ဧါ.
လံာ်စီဆှံ အတၢ်ဟံးစုနဲၣ်ကျဲလၢလာ်သ့ၣ်တဖၣ်အံၤ မၤစၢၤပှၤသ့.
“ပိာ်မုၣ်တဖၣ် ကြၢးမၤဃံမၤလၤထီၣ်အသး ခီဖျိ အကူတၢ်သိးတၢ် ဂ့ၤဂ့ၤဘၣ်ဘၣ်လၢ အလီၤပာ်ကဲ ဒီးလၢအပာ်ဖျါထီၣ် လၢအမ့ၢ် ပှၤလၢ အဆိကမိၣ်ထံတၢ်သ့ဂ့ၤဂ့ၤလီၤ.” (၁ တံၤမသ့း ၂:၉) တၢ်ဟံးစုနဲၣ်ကျဲတခါအံၤန့ၣ် အဘၣ်ဃးဒီးပိာ်မုာ်ဒီးပိာ်ခွါခံဒူၣ်လၢာ်လီၤ. ပဝဲခဲလၢာ်န့ၣ် ပကဘၣ်ဆိကမိၣ်န့ၣ်တၢ်လၢ ပှၤဂၤအဂီၢ် ဒီးပကဘၣ်ပလီၢ်ပသး ဒီးတဘၣ်မၤ ဒ်သိးပှၤသုတသးစၢၢ်ဆၢ ပှၤတဂ့ၤအဂီၢ်.
ပှၤတနီၤဆဲးယီၢ် ဒ်သိးကပာ်ဖျါထီၣ်ဝဲလၢ အဝဲသ့ၣ်အိၣ်ဒီးတၢ်ခွဲးတၢ်ယာ်လၢ အနီၢ်ကစၢ်အမိၢ်ပှၢ်အဖီခိၣ်. ဘၣ်ဆၣ် လံာ်စီဆှံဟ့ၣ်သဆၣ်ထီၣ်ဝဲ ခရံာ်ဖိတဖၣ်လၢ “သုကဟ့ၣ်လုၢ်ထီၣ်သုနီၢ်ခိ ဒ်တၢ်လုၢ်လၢအမူဝဲ, စီဆှံဝဲ ဒီးကစၢ်ယွၤ တူၢ်လိာ်ဝဲလီၤ. ဒီးဖဲသုမၤ အတၢ်မၤစီဆှံအခါ သူသုတၢ်သ့တၢ်ဘၣ်လၢ သုကပဲာ်ထံနီၤဖးတၢ်တက့ၢ်. (ရိမ့ၤ ၁၂:၁) အဃိ ပကဘၣ် “ပဲာ်ထံနီၤဖးတၢ်” သံကွၢ်လီၤပသးလၢ ဘၣ်မနုၤအဃိ ပအဲၣ်ဒိးဆဲးယီၢ်လဲၣ်. မ့ၢ်လၢယအဲၣ်ဒိး မၤပိာ်ပှၤဂၤအခံခီဧါ. မ့တမ့ၢ် ယအဲၣ်ဒိးလၢ ပှၤကသ့ၣ်ညါယၤလၢ ယဘၣ်ထွဲဒီးပှၤတဖုဖု မ့တမ့ၢ် တၢ်ကရၢကရိတဖုဖုခီဧါ. ပသးန့ၣ်ဆီတလဲသ့ ဘၣ်ဆၣ် ပမ့ၢ်ဆဲးယီၢ်န့ၣ် ယီၢ်အံၤကအိၣ်တ့ၢ်လၢ ပလိၤဖးယံာ်ညါ. အဃိ သမံသမိးလီၤက့ၤသုသးဒီးမၤတၢ်ဆၢတဲာ်လၢ အဘၣ်နီၤ. ကတိၤဒိ ၄:၇.
“တၢ်လၢပှၤခုတဖၣ် ရဲၣ်လီၤကျဲၤလီၤဝဲန့ၣ် ကကဲထီၣ်လိၣ်ထီၣ်ဝဲ သပှၢ်တၢၢ်, မ့မ့ၢ် ပှၤလၢအမၤကရီတၢ်န့ၣ် ကဖှီၣ်လီၤယာ်လီၤဝဲ သပှၢ်တၢၢ်လီၤ.” (ကတိၤဒိ ၂၁:၅) ပှၤတနီၤနီၤ ကဆဲးယီၢ်အဂီၢ် မၤဝဲတၢ်ဆၢတဲာ်ချ့မး. နမ့ၢ်ဆဲးယီၢ်န့ၣ် မၤဘၣ်ဒိနတၢ်ရ့လိာ်သးသ့ ဒီးဘၣ်ဒိစ့ၢ်ကီး နတၢ်ဖံးတၢ်မၤသ့. တၢ်ဆဲးယီၢ်န့ၣ် အပှ့ၤဒိၣ်မး တကးဒံးဘၣ် နမ့ၢ်အဲၣ်ဒိးမၤလီၤမၢ်အီၤန့ၣ် အဆါဒိၣ်မး. ပှၤဃုသ့ၣ်ညါတၢ်ဖိတဖၣ် ဒီးတၢ်လီၢ်လၢ ပှၤမၤလီၤမၢ်န့ၢ်ပှၤလၢအဆဲးယီၢ်တဖၣ် အယီၢ်န့ၣ် တဲဝဲလၢ ပှၤလၢအဆဲးယီၢ်အါတက့ၢ်န့ၣ် လၢခံအဝဲသ့ၣ် အါတက့ၢ်န့ၣ်တဲဝဲလၢ မ့ၢ်တဆဲးယီၢ်ဘၣ်န့ၣ်ဂ့ၤဒါခီ.