စီၤကၤယံၣ်န့ၣ်​ မ့ၢ်ဝဲနီၢ်အံၣ်အုဒီး စီၤအၤဒၣ်​ အဖိဝဲၢ်ကိ. စီၤကၤယံၣ်​ ဟံးန့ၢ်အမါဒီး အဒ့မုၣ်တဂၤဂၤ မ့တမ့ၢ် အဘူးအတံၢ်လၢ အဘူးဒီးအီၤတဂၤဂၤ. ပကသ့ၣ်ညါထီၣ်ဘၣ်​ တၢ်ဂ့ၢ်အံၤအဂီၢ် ပကတဲသကိးတၢ်ဂ့ၢ်ဘၣ်ဃးဒီး စီၤကၤယံၣ်​ ဒီးအဟံၣ်ဖိဃီဖိ အတၢ်ဟဲလီၤစၢၤလီၤသွဲၣ်အဂ့ၢ်.

ပကတဲသကိးတၢ်ဂ့ၢ်ဘၣ်ဃးဒီး စီၤကၤယံၣ်​ ဒီးအဟံၣ်ဖိဃီဖိအဂ့ၢ်

•    ပှၤဟီၣ်ခိၣ်ဖိခဲလၢာ်န့ၣ်​ ဟဲလီၤစၢၤလီၤသွဲၣ်လၢ နီၢ်အံၣ်အုဒီးစီၤအၤဒၣ်. ကစၢ်ယွၤ “ဒုးအိၣ်ထီၣ်​ ပှၤဟီၣ်ခိၣ်ဖိ ကိးကလုာ်ဒဲးလၢ အအိၣ်အဆိးလၢဟီၣ်ခိၣ်ချၢ ခီဖျိလၢ ပိာ်ခွါတဂၤ [စီၤအၤဒၣ်] လီၤ.” (မၤတၢ် ၁၇:၂၆) စီၤအၤဒၣ်အမါ နီၢ်အံၣ်အုန့ၣ်​ အဝဲကဲထီၣ်​ “ပှၤဟီၣ်ခိၣ်ဖိခဲလၢာ်အမိၢ်.” (၁ မိၤၡ့ ၃:၂၀) အဃိ ပသ့ၣ်ညါဘၣ်လၢ စီၤကၤယံၣ်​ ဟံးန့ၢ်အမါဒီး အဘူးအတံၢ်တဂၤဂၤ.

•    စီၤကၤယံၣ်​ ဒီးအပုၢ်စီၤဟ့းဘ့းလးန့ၣ်​ အဝဲသ့ၣ်မ့ၢ်ဝဲ နီၢ်အံၣ်အုအဖိအဆိကတၢၢ်ခံဂၤ. (၁ မိၤၡ့ ၄:၁, ၂) စီၤကၤယံၣ်​ မၤသံအပုၢ်အဃိ အဝဲဘၣ်လဲၤအိၣ်လၢ တၢ်လီၢ်အဂၤ. စီၤကၤယံၣ်​ ဘၣ်ယိၣ်တၢ်ဒီး အတဲဝဲလၢ “ပှၤတဂၤဂ့ၤတဂၤဂ့ၤလၢ အထံၣ်ယၤန့ၣ်​ ကမၤသံယၤလီၤသၢၤ.” (၁ မိၤၡ့ ၄:၁၄) အဃိ စီၤကၤယံၣ်န့ၣ်​ ပျံၤဝဲမတဂၤလဲၣ်. လံာ်စီဆှံ တဲဝဲလၢ စီၤအၤဒၣ်​ “ထီၣ်ဖိအဖိမုၣ်ဖိခွါတဖၣ်လီၤ.” (၁ မိၤၡ့ ၅:၄) အဃိ စီၤကၤယံၣ်​ ပျံၤဝဲလၢ အဘူးအတံၢ်လၢအဂၤတဖၣ်​ ကဟဲမၤသံအီၤ.

•    လၢညါန့ၣ်​ ပှၤအါတက့ၢ် အဝဲသ့ၣ်​ ဆီဟံၣ်ဆီဃီဒီး အနီၢ်ကစၢ်အဘူးအတံၢ်န့ၣ်​ တဘၣ်နီမံၤဘၣ်. အဒိ, ပှၤတီပှၤလိၤ စီၤအၤဘြၤဟၣ်န့ၣ်​ အဟံးန့ၢ်အမါဒီး အဒီပုၢ်ဝဲၢ်မုၣ်ခိၣ်ချၢ (အပါဖိမုၣ်). (၁ မိၤၡ့ ၂၀:၁၂) ဖဲစီၤကၤယံၣ်​ သံဝံၤအနံၣ်လၢ အကယၤတဖၣ်အလီၢ်ခံန့ၣ်​ စီၤမိၤၡ့ အတၢ်သိၣ်တၢ်သီ ဟဲအိၣ်ထီၣ်လၢ ပှၤတဘၣ်ဆီဟံၣ်ဆီဃီဒီး အဘူးအတံၢ်ဘၣ်. (၁ မိၤၡ့ ၁၈:၉, ၁၂, ၁၃) လၢညါန့ၣ်​ ပှၤမ့ၢ်ဟံးန့ၢ်ဒီး အဘူးအတံၢ် ဒီးအဖိမ့ၢ်အိၣ်ဖျဲၣ်ထီၣ်န့ၣ်​ အက့ၢ်အဂီၤ တလၢပှဲၤဘၣ်န့ၣ်​ တအိၣ်ဘၣ်. ဘၣ်ဆၣ်​ မုၢ်မဆါတနံၤအံၤန့ၣ်​ တမ့ၢ်ဒ်သိးဒီးလၢညါဘၣ်.

•    လံာ်စီဆှံ ပာ်ဖျါထီၣ်ဝဲ စီၤအၤဒၣ်, နီၢ်အံၣ်အုၣ်​ ဒီးအဟံၣ်ဖိဃီဖိအဂ့ၢ်န့ၣ်​ ဘၣ်ဝဲလီၤတံၢ်လီၤဆဲး. စီၤအၤဒၣ်​ အစၢၤအသွဲၣ်​ အတၢ်ဟဲလီၤစၢၤ တဆီဘၣ်တဆီအဂ့ၢ်န့ၣ်​ စီၤမိၤၡ့ ကွဲးဖျါထီၣ်ဝဲဖဲ ၁ မိၤၡ့အပူၤ တကးဒံးဘၣ်​ ဧ့စြၤအလံာ်တၢ်စံၣ်စိၤတဲစိၤ ဒီးလံာ်လူၤကၣ်​ ပာ်ဖျါထီၣ်ဝဲစ့ၢ်ကီး. (၁ မိၤၡ့ ၅:၃-၅; ၁ ကွဲးနီၣ်တၢ် ၁:၁-၄; လူၤကၣ်​ ၃:၃၈) ပှၤကွဲးလံာ်စီဆှံတဖၣ်န့ၣ်​ ကွဲးဖျါထီၣ်က့ၤ စီၤကၤယံၣ်အဂ့ၢ် ဒ်တၢ်စံၣ်စိၤတဲစိၤတခါအသိး.—ဧ့ၤဘြံၤ ၁၁:၄; ၁ ယိၤဟၣ်​ ၃:၁၂; ယူၤဒၤ ၁၁.