Baala naa dimiaa yooŋgu kɛndɛ Mɛlɛka wo cho o toolaŋ a mɛɛ Seiyaa Chɛhowaa a kɛɛsiaŋ o kɔl le yɔŋgoo yɛ. Ŋ veelu waŋnda chuuŋgiaa choo o bɔŋaŋnda naalaŋ te. Ŋ kilul chaaŋaa naa laalaŋnda nyɛsɔlaa choo le yɔŋgu le. (Maatiu 10:7, 8) Wana dimi isɔɔ a tonya, kɔfulaŋ la cho o fondaŋnda naŋ bɔŋaŋndaŋ. Te wana o wana yeema pɛ le nyɛ malɔɔ leniŋ, o mal a mɛɛ o kɛɛsiaŋ o kɔl le yɔŋgoo yɛ. Wanaa yɔŋgu nyɛ sɔlaa hoo wa pelnuŋ la dio le.

 Sabu naŋ bii nyɛsɔlaa naa nyɛkɛndɛiyo cho ni maa ŋ nɔ Wanaa naŋ paawa o kɔɔna naa niŋ te. Le handɔɔ lechoo, Seiyaa Chɛhowaa kua waŋnda yooŋgu kɛndɔɔ dimullo wa bɛɛ, a sɔla paawa le laŋ te. O fula o koŋ kɔɔli, ŋ beŋ fondaŋnda naala lepiɛilaŋ le chɔmnɔŋ te.

Nyɛsɔlaa o nyɛsɔlaa nda yɔŋ pɛ o lɛuvii Seiyaa Chɛhowaa, a soliŋ ndu kpeku le wanaa kpundɔɔ del choo wa malaa, le wanaa nda yɔŋ le yooŋgu kɛndɔɔ dimioo o lɛŋnde kɔɔli wa a buɛiyaa kelaa choo wa tooloo, le fondaŋnda naala lepiɛilaŋ taŋgullo o lɛŋii nɔ nyɛsɔlaa bɔɔ lei niŋ, a le toosiaa Baabuilaŋ a yaula cheleŋnda naŋ pɛɛku a Mɛlɛka okɔɔ laŋ, okoŋ ma yɔŋ ndaŋ o lɛŋii cheleŋ niŋ.

 Wana o wana kɛɛsiaa o kɔl ndɔɔ niŋ le tooloo le bahawɛila kundaa solioo, le baala naa dimiaa yooŋgu kɛndɔɔ, ɔɔ le o kɛ kɛ. Te tooloo hoo sɔlaŋ pɛ, wanaa chua chilaŋ o kunda o kunda niŋnda chɔm mɛɛ nyɛsɔlaa hoo pisiŋ yɛ le mi chaaŋaa naa laalaŋnda sina.