Jiova Witnɛs dɛn gɛt Baybul stɔdi program we yu go gɛt bɔku ansa to kwɛstyɔn dɛn lɛk:

•   Udat na Gɔd?

•   Gɔd rili bisin bɔt mi?

•   Wetin a go du fɔ mek a ɛnjɔy mi mared mɔ?

•   Aw a go gɛt gladi at na layf?

 Dɔŋsay yu go si ansa to kwɛstyɔn dɛn we pipul dɛn kin aks ɔltɛm bɔt wi Baybul stɔdi program.

  Aw una kin du di Baybul stɔdi? Wi kin tek tɔpik lɛk “Gɔd” ɔ “mared” ɛn wach difrɛn Baybul vas dɛn we tɔk bɔt da tɔpik de. We wi kɔmpia di difrɛn vas dɛn ɛn si wetin di Baybul se bɔt da tɔpik de, i kin tan lɛk di Baybul de tɔk fɔ insɛf.

 Fɔ ɛp wi stɔdi di Baybul, wi de yuz di buk we nem Wetin Rili di Baybul De Tich? Dis buk de sho klia wan wetin rili di Baybul se bɔt Gɔd, Jizɔs, ɛn wi tumara bambay.

  Ɔmɔs fɔ pe fɔ Baybul stɔdi? Di stɔdi na fri, ɛn yu nɔ nid fɔ pe fɔ di buk we una de yuz fɔ di stɔdi.

  Aw lɔng di stɔdi de tek? Bɔku pipul dɛn kin yuz wan awa fɔ stɔdi di Baybul wit wi. Wi nɔ gɛt wan patikyula tɛm we wi de tek fɔ stɔdi pɔsin. Wi go arenj fɔ stɔdi pɔsin di tɛm we i want.

  Wetin go apin we a aks fɔ mek dɛn kam stɔdi mi? We yu aks fɔ Baybul stɔdi, wan pan Jiova Witnɛs dɛn go kam fɛn yu na di ples ɛn tɛm we yu want. I go yuz smɔl tɛm fɔ sho yu aw di stɔdi program kin tan lɛk. If yu lɛk am, yu kin kɔntinyu.

  If a gri fɔ di Baybul stɔdi, dat min se a fɔ bi wan pan Jiova Witnɛs dɛn? Nɔ. Jiova Witnɛs dɛn lɛk fɔ tich pipul dɛn bɔt di Baybul, bɔt wi nɔ di ɛva fos pɔsin fɔ bi wan pan wi. Wi kin rɛspɛkt pipul dɛn ɛn tich dɛn wetin di Baybul se ɛn disayd fɔ dɛnsɛf wetin dɛn want fɔ biliv.—Pita In Fɔs Lɛta 3:15.