Di tin dɛn we di Baybul de tich, na in mek Jiova Witnɛs dɛn nɔ de gri put an pan pɔlitiks. Wi nɔ de sɔpɔt pɔlitikal pati, wi nɔ de vot, wi nɔ de stand fɔ ilɛkshɔn ɔ put an pan ɛnitin we gɛt fɔ du wit strayk fɔ pul gɔvmɛnt na pawa. Wi biliv se di Baybul gɛt gud rizin we mek wi nɔ fɔ put an pan pɔlitiks.

•   Wi de fala Jizɔs we nɔ bin gri fɔ lɛ dɛn mek am kiŋ. (Jɔn 6:​15) I bin tɛl in disaypul dɛn se dɛn ɛn di pipul dɛn na di wɔl “nɔ de si wan we” ɛn i tɔk klia wan se dɛn nɔ fɔ put an pan pɔlitiks biznɛs.​—Jɔn 17:14, 16; 18:36; Mak 12:13-​17.

•   Na Gɔd in Kiŋdɔm wi de sɔpɔt. Jizɔs sɛf bin tɔk bɔt di Kiŋdɔm we i bin se: “Pipul go tɛl ɔlman na [di] wɔl di Gud Nyuz bɔt wɛn Gɔd go rul.” (Matyu 24:14) As pipul dɛn we de fɔ di Kiŋdɔm ɛn we gɛt di wok fɔ tɔk bɔt di tɛm we i go bigin rul, wi nɔ de put an pan ɛni pɔlitiks biznɛs na ɛni kɔntri ilɛksɛf na di kɔntri uasy wi de.​—Sɛkɛn Lɛta Fɔ Kɔrint 5:​20; Lɛta Fɔ Ɛfisɔs 6:​20.

•   Ilɛk wetin difrɛn pipul dɛn tink bɔt pɔlitiks, wi kin fil fri fɔ tɔk to dɛn di gud nyus bɔt di Kiŋdɔm bikɔs wi nɔ de put an pan pɔlitiks. Wi de rili tray fɔ mek di tin dɛn we wi de tɔk, ɛn di we aw wi de liv wi layf sho se na Gɔd in Kiŋdɔm wi abop pan fɔ sɔlv di prɔblɛm dɛn we de na di wɔl.​—Sam 56:11.

•   Bikɔs wi nɔ de put an pan di difrɛn pɔlitikal pati dɛn we de, dat de mek wi ɔl gɛt wanwɔd na difrɛn say dɛn na di wɔl. (Lɛta Fɔ Kɔlɔse 3:​14; Pita In Fɔs Lɛta 2:​17) Bɔt rilijɔn dɛn we de put an pan pɔlitiks de mek dɛn mɛmba dɛn nɔ gɛt wanwɔd​—Fɔs Lɛta Fɔ Kɔrint 1:​10.

 Wi rɛspɛkt gɔvmɛnt. Pan ɔl we wi nɔ de put an pan pɔlitiks, wi rɛspɛkt di gɔvmɛnt we de na wi kɔntri. Dis gri wit witin di Baybul se: “Una ɔl fɔ du wetin dɛn wan we de rul na di kɔntri tɛl una fɔ du.” (Lɛta Fɔ Rom 13:1) Wi de obe di lɔ, wi de pe taks, ɛn wi de du wetin di gɔvmɛnt se fɔ du so dat di wan dɛn we de na di kɔntri go ebul fɔ liv fayn. Bifo wi du tin we go ambɔg di gɔvmɛnt, wi de fala di Baybul in advays we se wi fɔ pre “fɔ dɛn wan we de rul ɛn ɔl dɛn bigman,” mɔ we dɛn gɛt fɔ disayd bɔt sɔntin we go afɛkt wi wɔship to Gɔd.​—Fɔs Lɛta To Timoti 2:​1, 2.

 We i kam pan pɔlitiks, wi de rɛspɛkt ɔlman in rayt fɔ disayd fɔ insɛf. Fɔ ɛgzampul, wi nɔ de ambɔg ilɛkshɔn tɛm ɔ ivin put mɔt pan di wan dɛn we disayd fɔ vot.

 Na dis biɛn tɛm wi lɛf fɔ put an pan pɔlitiks? Nɔ. Di apɔsul dɛn ɛn ɔda fɔstɛm Kristian dɛn nɔ bin gri fɔ miks pan pɔlitiks. Insay di buk we nem Beyond Good Intentions, dɛn rayt de se: “Pan ɔl we dɛn biliv se dɛn fɔ obe di wan dɛn we de rul, di fɔstɛm Kristian dɛn nɔ bin biliv se dɛn fɔ put an pan pɔlitiks biznɛs.” Semweso, insay di buk we nem On the Road to Civilization dɛn rayt de se di fɔstɛm Kristian dɛn “nɔ bin de tek pozishɔn na gɔvmɛnt.”

 Bikɔs una nɔ de put an pan pɔlitiks dat fɔ mek pipul dɛn fred se una go ambɔg di pis we de na di kɔntri? Nɔ. Wi na pipul dɛn we gɛt pis ɛn di wan dɛn we de rul nɔ fɔ fred wi. Insay 2001 we di National Academy of Sciences of Ukraine bin de tɔk bɔt pɔlitiks biznɛs, dɛn bin se: “insay wi yon tɛm bɔku pipul dɛn nɔ lɛk Jiova Witnɛs dɛn bikɔs dɛn nɔ de put an pan pɔlitiks; ɛn na dat na bin di men rizin we mek dɛn bin de ambɔg dɛn di tɛm we di Nazi pati bin de rul.” Ɛn pan ɔl we di Soviet bin de prɛzhɔ dɛn, “dɛn bin stil de obe lɔ. Dɛn bin de wok tranga wan na di fam dɛn we di Communist dɛn bin gɛt ɛn dɛn nɔ ɛva tawa fɔ ambɔg dɛn.” We dɛn de dɔn fɔ rayt di ripɔt dɛn se; di tin dɛn we Jiova Witnɛs dɛn biliv ɛn di tin we dɛn de du de sho se dɛn “nɔ de du tin we de ambɔg di pis ɛn kol at we de na di kɔntri usay dɛn de.”