Dɛn dɔn spɛn bɔku pan wɔ.

•   “Las ia, gɔvmɛnt dɛn ɔlsay na di wɔl spɛn 2.2 trilyɔn dɔla pan difrɛn wɔ dɛn; dis mɔni bɔku pas wetin dɛn dɔn spɛn pan wɔ insay ɛni ɔda ia.”—The Washington Post, Fɛbwari 13, 2024.

 Bɔt nɔto mɔni nɔmɔ dɔn go bikɔs ɔf wɔ. Jɔs tink bɔt wan ɛgzampul, we na di wɔ na Yukren.

•   Sojaman dɛn. Sɔm masta sabi bukman dɛn se na ɔlmost 500,000 sojaman dɛn dɔn day ɔ wund frɔm we di wɔ bigin tu ia bifo naw.

•   Sivilian dɛn. United Nations se i pas 28,000 sivilian dɛn we dɔn day ɔ wund. Bɔt wan big pɔsin na UN tɔk se: “I nɔ pɔsibul fɔ no ɔmɔs pipul dɛn dis bad bad wɔ ya dɔn afɛkt.” a

 Di kayn mɔtalman dɛn we dɔn sɔfa bikɔs ɔf wɔ ɛn fɛt-fɛt ɔlsay na di wɔl rili bɔku.

•   114 milyɔn. Na di nɔmba dis we de sho ɔmɔs pipul dɛn dɔn lɛf dɛn os bikɔs ɔf wɔ ɛn fɛt-fɛt ɔlsay na di wɔl frɔm Sɛptɛmba 2023.

•   783 milyɔn. Na di nɔmba dis we de sho ɔmɔs pipul dɛn angri bad bad wan. “Na fɛt-fɛt mɔ kin kɔz angri pas ɛni ɔda tin; sɛvinti pasɛnt pan di pipul dɛn we angri de na say dɛn we wɔ ɛn fɛt-fɛt de.”—World Food Programme.

 Fɔ se wɔ go ɛva dɔn? Ɛni op de se wi go gɛt pis? Fɔ se dɛn go ɛva yuz di bɔku bɔku tin dɛn we de na di wɔl fɔ mek pipul dɛn nɔ angri ɛn po igen? Wetin di Baybul se?

 Di Baybul bin dɔn tɔk se wɔ go apin ɔlsay na di wɔl, ɛn i tɔk bɔt am bay we i yuz di ɛgzampul ɔf pɔsin we de rayd ɔs.

•   “Ɛn wan ɔda ɔs we in kɔlɔ tan lɛk faya kɔmɔt na do, dɛn alaw di wan we sidɔm pan am fɔ pul pis kɔmɔt na di wɔl so dat di wan dɛn we de de go kil dɛn kɔmpin dɛn, ɛn dɛn gi am wan pawaful sɔd.”—Rɛvɛleshɔn 6:​4.

 Tu ɔda man dɛn de biɛn da man de, ɛn dɛn tinap fɔ bad bad angri ɛn di day we pipul dɛn de day bikɔs ɔf bad bad sik ɔ ɔda tin dɛn. (Rɛvɛleshɔn 6:​5-8) Fɔ lan mɔ bɔt dis Baybul prɔfɛsi ɛn di rizin we mek wi fɔ biliv se i de kam tru insay wi tɛm, rid di atikul we gɛt di taytul “The Four Horsemen—Who Are They?”

 I nɔ go te igen, dɛn nɔ go yuz di tin dɛn we de na di wɔl fɔ fɛt wɔ. Bɔt nɔto mɔtalman gɛt fɔ du dis. Di Baybul se:

•   Gɔd go mek “wɔ dɔn ɔlsay na di wɔl.”—Sam 46:​9.

•   Gɔd go pul ɔl di prɔblɛm dɛn we dɔn apin bikɔs ɔf wɔ. “I go wep ɔl di kray wata na dɛn yay, ɛn day nɔ go de igen, pwɛlat ɛn pen nɔ go de igen, ɛn dɛn nɔ go kray igen bikɔs dɛn at pwɛl. Di tin dɛn we bin de apin nɔ go de igen.”—Rɛvɛleshɔn 21:​4.

•   Gɔd go mek shɔ se ɔlman gɛt pis. “Mi pipul dɛn go de na ples we pis de, dɛn go de na ples we sef ɛn kwayɛt fɔ rɛst.”—Ayzaya 32:​18.

 Akɔdin to Baybul prɔfɛsi, di wɔ ɛn ɔda tin dɛn we wi de si tide de sho se dis tɛm we pis go kam nɔ de fa igen.

 Aw Gɔd go mek wi ɛnjɔy dis pis tumara bambay? I go yuz in gɔvmɛnt ɔ Kiŋdɔm we de ɔp ɛvin. (Matyu 6:​10) Fɔ lan bɔt wetin na dis Kiŋdɔm ɛn wetin i go du fɔ yu, wach dis shɔt vidio we nem Wetin na Gɔd in Kiŋdɔm?