Di men tin we wi kin tɔk bɔt na Kiŋdɔm Ɔl, na bɔt Gɔd in Kiŋdɔm. Na dat Jizɔs bin de prich bɔt we i bin de na di wɔl.—Lyuk 8:1.

Na ples fɔ wɔship Gɔd di rayt we. Na Kiŋdɔm Ɔl Jiova Witnɛs dɛn kin arenj aw fɔ prich. (Matyu 24:14) Nɔto di sem we dɛn bil ɔl di Kiŋdɔm Ɔl dɛn, bɔt dɛn ɔl simpul. Sɔm Kiŋdɔm Ɔl dɛn de we gɛt pas wan kɔngrigeshɔn we kin mit de. Dɛn biɛn tɛm ya, wi de bil bɔku bɔku Kiŋdɔm Ɔl dɛn bikɔs bɔku pipul de kam na di mitin dɛn. Aw wi ebul bil ɔl dɛn Kiŋdɔm Ɔl ya?—Matyu 19:26.

Di mɔni we wi kin gi, na in dɛn kin yuz fɔ bil di Kiŋdɔm Ɔl dɛn. Wi kin sɛn di mɔni na di branch ɔfis. Dɛn kin yuz dis mɔni ya fɔ gi kɔngrigeshɔn dɛn we want fɔ bil nyu Kiŋdɔm Ɔl ɔ we want fɔ chenj di we aw dɛn bil dɛn Kiŋdɔm Ɔl.

Wi nɔ de pe di wan dɛn we de bil am. Insay bɔku kɔntri dɛn, wi gɛt wan grup we wi kɔl Kiŋdɔm Ɔl Kɔnstrɔkshɔn Grup. Di brɔda ɛn sista dɛn we de na dis grup kin go na difrɛn difrɛn say dɛn na di kɔntri fɔ ɛp di brɔda dɛn we de de fɔ bil dɛn yon Kiŋdɔm Ɔl dɛn. Na ɔda kɔntri dɛn, dɛn dɔn pik sɔm brɔda dɛn we sabi aw fɔ bil, fɔ mek dɛn go de sho di wan dɛn we de bil di Kiŋdɔm Ɔl dɛn, aw dɛn fɔ du dɛn wok. Pan ɔl we ɔda brɔda ɛn sista dɛn we lan ɔda wok, dɛnsɛf kin kam fɔ ɛp, stil bɔku pan di brɔda dɛn we de de kin kam fɔ ɛp pan di wok. Wi kin ebul fɔ bil wi Kiŋdɔm Ɔl dɛn bikɔs di brɔda dɛn kin wok tranga wan ɛn Jiova in spirit kin de wit dɛn.—Sam 127:1; Lɛta Fɔ Kɔlɔse 3:23.

• Wetin mek wi de kɔl di ples usay wi de wɔship Gɔd, Kiŋdɔm Ɔl?

• Wetin mek wi ebul fɔ bil Kiŋdɔm Ɔl dɛn ɔlsay na di wɔl?