Romans 12:1-21

  • Una gi una bɔdi dɛn as sakrifays we de alayv (1, 2)

  • Difrɛn gift dɛn bɔt wan bɔdi (3-8)

  • Advays bɔt aw tru Kristian fɔ liv in layf (9-21)

12  So, mi brɔda dɛn, a tek Gɔd in sɔri-at beg una, fɔ gi una bɔdi dɛn as sakrifays we de alayv, we oli, di kayn we Gɔd go tek, we go mek una de tink we una de sav am.*  Ɛn una lɛf fɔ alaw di we aw tin dɛn de apin naw* fɔ shep una, bɔt una chenj bay we una chenj di we aw una de tink, so dat una go pruv to unasɛf wetin gud, wetin Gɔd de tek, ɛn di pafɛkt tin we Gɔd want.  Bikɔs ɔf Gɔd in spɛshal gudnɛs* we de pan mi, a de tɛl una ɔl we de de se nɔbɔdi nɔ fɔ tink tumɔs bɔt insɛf pas aw i fɔ tink, bɔt i fɔ tink di kɔrɛkt we, jɔs lɛk aw Gɔd dɔn gi am fet.  Jɔs lɛk aw wan bɔdi kin gɛt bɔku pat dɛn, bɔt ɔl di pat dɛn nɔ de du di sem wok,  na so bak pan ɔl we wi bɔku, wi na wan bɔdi we gɛt wanwɔd wit Krays, ɛn wi na pat dɛn we jɔyn togɛda.  Bikɔs ɔf Gɔd in spɛshal gudnɛs* we de pan wi, wi ɔl gɛt difrɛn gift dɛn, if na fɔ tɔk wetin Gɔd se, lɛ wi du am akɔdin to di fet we wi gɛt;  if na wok, lɛ wi wok; di wan we de tich, mek i go de tich;  di wan we de ɛnkɔrej,* lɛ i de ɛnkɔrej;* di wan we de sheb, lɛ i du am wit fri-an; di wan we de oba pipul dɛn, lɛ i du am fayn fayn wan;* di wan we de sho se i gɛt sɔri-at, lɛ i du am wit gladi-at.  Una nɔ fɔ bi ipokrit we una de sho lɔv. Una fɔ rili et wetin wikɛd ɛn rili lɛk* wetin gud. 10  Una fɔ lɛk unasɛf lɛk aw brɔda dɛn kin lɛk dɛnsɛf. Na una fɔs fɔ sho ɔnɔ to una kɔmpin dɛn. 11  Una fɔ wok tranga wan,* una nɔ fɔ lezi.* Lɛ di oli spirit mek una gɛt zil. Una bi Jiova* in slev. 12  Una gladi fɔ di op we una gɛt. Una bia we una gɛt prɔblɛm. Una nɔ taya fɔ pre. 13  Una sheb wetin una gɛt wit di oli wan dɛn akɔdin to wetin dɛn nid. Una go de sho se una kia fɔ pipul dɛn. 14  Una go de blɛs di wan dɛn we de mek una sɔfa; una go de blɛs ɛn nɔ go de swɛ. 15  Una gladi wit di wan dɛn we gladi; una kray wit di wan dɛn we de kray. 16  Una tink bɔt ɔda pipul dɛn di sem we aw una de tink bɔt unasɛf; una nɔ go de tink bɔt big big tin dɛn, una tink bɔt simpul tin dɛn. Una nɔ fɔ de tink se una gɛt sɛns. 17  If pɔsin du una bad, una nɔ du am bad bak. Una go de tink bɔt wetin fayn na ɔlman in yay. 18  If i pɔsibul, una du ɔl wetin una ebul fɔ du fɔ mek una gɛt pis wit ɔlman. 19  Di wan dɛn we a rili lɛk, una nɔ tɔn-dɛt, una lɛf una kes to Gɔd mek in fɛt fɔ una; bikɔs dɛn rayt se: “Jiova* se, ‘Na mi fɔ tɔn-am-gi; a go tɔn-dɛt.’” 20  Bɔt “if yu ɛnimi angri, gi am tin fɔ it; if i tɔsti, gi am sɔntin fɔ drink; we yu de du dis, yu de put faya kol na in ed.”* 21  Una nɔ alaw bad fɔ win una, una go de du gud tin fɔ win di bad.

Futnot

Insay Grik, “du oli wok.”
Ɔ “dis tɛm.” Rid Baybul Wɔd dɛn Minin.
Rid Baybul Wɔd dɛn Minin.
Rid Baybul Wɔd dɛn Minin.
Ɔ “wɔn ɔ advays.”
Ɔ “wɔn ɔ advays.”
Ɔ “wit ɔl in at.”
Insay Grik, “fasin.”
Ɔ “fayn fayn wan; wit zil.”
Ɔ “una nɔ ple wit una wok.”
Rid Baybul Wɔd dɛn Minin.
Rid Baybul Wɔd dɛn Minin.
Dat na, fɔ mek di pɔsin nɔ gɛt strɔng at igen.