Matyu 5:1-48
-
JIZƆS TICH ƆP WAN MAWNTIN (1-48)
-
Jizɔs bigin fɔ tich na di mawntin (1, 2)
-
Nayn tin dɛn we de mek pɔsin gɛt gladi-at (3-12)
-
Sɔl ɛn layt (13-16)
-
Jizɔs fɔ mek wetin di Lɔ se apin (17-20)
-
Advays bɔt wamat (21-26), we maredman ɔ mareduman du mami ɛn dadi biznɛs wit ɔda pɔsin (27-30), dayvɔs (31, 32), swɛ (33-37), tɔn-am-gi (38-42), ɛn fɔ lɛk yu ɛnimi (43-48)
-
5 We i si di krawd, i go ɔp di mawntin. We i sidɔm, in disaypul dɛn kam to am.
2 Dɔn i bigin fɔ tich dɛn se:
3 “Di wan dɛn we no se dɛn nid fɔ lan bɔt Gɔd* gɛt gladi-at bikɔs na dɛn gɛt di Kiŋdɔm we de na ɛvin.
4 “Di wan dɛn we dɛn at pwɛl gɛt gladi-at bikɔs dɛn go kɔrej dɛn.
5 “Di wan dɛn we ɔmbul gɛt gladi-at bikɔs dɛn go gɛt di wɔl.
6 “Di wan dɛn we rili want fɔ lɛ wetin rayt apin gɛt gladi-at bikɔs Gɔd go satisfay dɛn.
7 “Di wan dɛn we de sɔri fɔ ɔda pipul dɛn gɛt gladi-at bikɔs dɛn* go sɔri fɔ dɛn.
8 “Di wan dɛn we dɛn at klin gɛt gladi-at bikɔs dɛn go si Gɔd.
9 “Di wan dɛn we de mek pis* gɛt gladi-at bikɔs dɛn go kɔl dɛn Gɔd in pikin dɛn.
10 “Di wan dɛn we pipul dɛn dɔn mek sɔfa bikɔs dɛn de du wetin rayt gɛt gladi-at bikɔs na dɛn gɛt di Kiŋdɔm we de na ɛvin.
11 “Una we pipul dɛn de trit bad, ɛn una we dɛn de mek sɔfa ɛn lay pan bad bad wan fɔ mi sek gɛt gladi-at.
12 Una gladi pasmak bikɔs una gɛt bɔku blɛsin na ɛvin. Na so dɛn bin de mek di prɔfɛt dɛn we bin de bifo una sɔfa.
13 “Una na di sɔl na di wɔl, bɔt if di sɔl nɔ gɛt tes igen, aw i go gɛt in tes bak? I nɔ gɛt no yus igen pas fɔ trowe am na do lɛ pipul dɛn mas am.
14 “Una na di layt na di wɔl. Siti we de pantap mawntin nɔ ayd.
15 We pipul dɛn layt lamp, dɛn kin put am pan di stand fɔ put lamp fɔ mek i shayn pan ɔlman na di os, dɛn nɔ de put am ɔnda baskɛt.*
16 Semweso, una mek una layt shayn bifo pipul dɛn, so dat dɛn go si di fayn tin dɛn we una de du ɛn prez una Papa we de na ɛvin.
17 “Una nɔ tink se a kam fɔ pwɛl di Lɔ ɔ wetin di Prɔfɛt dɛn tich. A nɔ kam fɔ pwɛl dɛn, a kam fɔ mek wetin dɛn tich apin.
18 Fɔ tru, a de tɛl una se ivin if ɛvin ɛn dis wɔl nɔ de igen, wan pan di lɛta dɛn we smɔl pas ɔl ɔ pat pan wan lɛta nɔ go kɔmɔt na di Lɔ pas te ɔltin apin.
19 So ɛnibɔdi we brok wan pan dɛn lɔ ya we nɔ tu impɔtant ɛn tich ɔda pipul dɛn fɔ du dat nɔ fit fɔ go na di Kiŋdɔm we de na ɛvin. Bɔt ɛnibɔdi we obe dɛn ɛn tich dɛn, fit fɔ go na di Kiŋdɔm we de na ɛvin.
20 A de tɛl una se if una nɔ du wetin rayt pas di Lɔ ticha dɛn ɛn Faresi dɛn, una nɔ go go insay di Kiŋdɔm we de na ɛvin.
21 “Una dɔn yɛri se dɛn bin tɛl di wan dɛn we bin de trade trade se: ‘Yu nɔ fɔ kil pɔsin. Ɛnibɔdi we kil pɔsin, go ansa na kɔt.’
22 Bɔt mi de tɛl una se ɛnibɔdi we kɔntinyu fɔ vɛks bad pan in brɔda go ansa na kɔt; ɛn ɛnibɔdi we yuz bad wɔd fɔ disgres in brɔda go ansa na di Ay Kɔt; bɔt ɛnibɔdi we se, ‘Yu yuzlɛs fulman!’ go ɛnd-ɔp na di faya na Gɛɛna.*
23 “So if yu de kam wit yu gift na di ɔlta ɛn we yu rich de, yu mɛmba se yu brɔda nɔ gladi wit yu,
24 lɛf yu gift bifo di ɔlta ɛn go mek pis fɔs wit yu brɔda, dɔn kam bak ɛn gi yu gift.
25 “Tray kwik kwik wan fɔ sɔlv di prɔblɛm we yu gɛt wit di wan we want fɔ kɛr yu go na kɔt, we yu de wit am na rod fɔ go de, so dat i nɔ go kɛr yu go to di jɔj, ɛn di jɔj mek di prizin ɔfisa put yu na prizin.
26 Fɔ tru, a de tɛl yu se yu nɔ go kɔmɔt de pas te yu pe ɔl yu mɔni.
27 “Una dɔn yɛri se dɛn bin se: ‘Yu nɔ fɔ lɛf yu man ɔ wɛf ɛn go du mami ɛn dadi biznɛs wit ɔda pɔsin.’
28 Bɔt mi de tɛl una se ɛnibɔdi we kɔntinyu fɔ luk uman we nɔto in wɛf, te i gɛt filin fɔ am, dɔn ɔlrɛdi du mami ɛn dadi biznɛs wit am na in at.
29 If yu rayt yay de mek yu sin, pul am ɛn trowe am. I bɛtɛ lɛ wan pan yu pat dɛn nɔ de, pas fɔ mek yu wan ol bɔdi go na Gɛɛna.*
30 Ɛn if yu raytan de mek yu sin, kɔt am ɛn trowe am. I bɛtɛ lɛ wan pan yu pat dɛn nɔ de, pas fɔ mek yu wan ol bɔdi go na Gɛɛna.*
31 “Pantap dat, dɛn bin se: ‘Ɛnibɔdi we dayvɔs in wɛf fɔ gi am dayvɔs satifiket.’
32 Bɔt mi de tɛl una se ɛnibɔdi we dayvɔs in wɛf, we i bi se in wɛf nɔ du mami ɛn dadi biznɛs di we aw Gɔd nɔ want,* de tɛmt am fɔ du mami ɛn dadi biznɛs wit ɔda pɔsin, ɛn ɛnibɔdi we mared uman we dɛn dayvɔs dis we dɔn du mami ɛn dadi biznɛs wit ɔda man in wɛf.
33 “Una bin dɔn yɛri bak se dɛn bin tɛl di wan dɛn we bin de trade trade se: ‘Yu nɔ fɔ swɛ ɛn nɔ du wetin yu se yu go du; yu fɔ du wetin yu dɔn vaw to Jiova* se yu go du.’
34 Bɔt mi de tɛl una se: Una nɔ swɛ atɔl atɔl, una nɔ swɛ to ɛvin bikɔs na Gɔd in tron;
35 ɔ swɛ to di wɔl, bikɔs na de i de put in fut; ɔ swɛ to Jerusɛlɛm, bikɔs na di gret Kiŋ in siti.
36 Nɔ swɛ to yu ed, bikɔs yu nɔ ebul tɔn wan ia wayt ɔ blak.
37 Jɔs mek yu ‘Yɛs’ min yɛs, ɛn yu ‘Nɔ’ min nɔ, bikɔs ɛnitin apat frɔm dis kɔmɔt frɔm di wikɛd wan!
38 “Una bin dɔn yɛri wetin dɛn bin dɔn tɔk. Dɛn bin se: ‘If pɔsin damej sɔmbɔdi in yay, dɛn fɔ damej in yon, ɛn if pɔsin brok sɔmbɔdi in tit, dɛn fɔ brok in yon.’
39 Bɔt mi de tɛl una se: Nɔ fɛt pɔsin we wikɛd, bɔt ɛnibɔdi we slap yu na yu rayt jɔ, tɔn di ɔdasay fɔ am.
40 Ɛn if pɔsin want fɔ kɛr yu go na kɔt fɔ tek di klos we yu wɛr ɔnda, gi am bak di wan we yu wɛr pantap;
41 ɛn if pɔsin we gɛt pawa fos yu fɔ kɛr lod wan mayl, go wit am tu mayl.
42 If pɔsin aks yu fɔ sɔntin gi am, ɛn nɔ tɔn yu bak pan di wan we want fɔ lɛnt* to yu.
43 “Una bin dɔn yɛri wetin dɛn bin dɔn tɔk. Dɛn bin se: ‘Yu fɔ lɛk yu neba ɛn et yu ɛnimi.’
44 Bɔt a de tɛl una se: Una fɔ kɔntinyu fɔ lɛk una ɛnimi dɛn ɛn pre fɔ di wan dɛn we de mek una sɔfa,
45 so dat una go sho se una na pikin dɛn to una Papa we de na ɛvin, bikɔs i de mek in san shayn pan di wikɛd pipul dɛn ɛn di gud pipul dɛn, ɛn i de mek ren kam pan di pipul dɛn we de du wetin rayt ɛn di wan dɛn we nɔ de du wetin rayt.
46 If una lɛk di wan dɛn we lɛk una, us blɛsin una go gɛt? Di wan dɛn we de gɛda taks de du di sem tin, nɔto so?
47 Ɛn if na una brɔda dɛn nɔmɔ una de grit, una tink se wetin una de du bɛtɛ pas wetin ɔda pipul dɛn de du? Pipul dɛn we de na ɔda neshɔn dɛn de du di sem tin, nɔto so?
48 So una fɔ pafɛkt* lɛk aw una Papa we de na ɛvin pafɛkt.
Futnot
^ Ɔ “di wan dɛn we de beg fɔ di spirit.”
^ I kin min Gɔd bak.
^ Ɔ “want pis.”
^ Dɛn kin yuz am fɔ mɛzhɔ it dɛn lɛk wit.
^ Di say we dɛn bin de bɔn dɔti. Dis say nɔ bin de insay Jerusɛlɛm. Rid Baybul Wɔd dɛn Minin.
^ Rid Baybul Wɔd dɛn Minin.
^ Rid Baybul Wɔd dɛn Minin.
^ Grik, pɔnia. Rid Baybul Wɔd dɛn Minin.
^ Rid Baybul Wɔd dɛn Minin.
^ Dat na, fɔ lɛnt pɔsin ɛn nɔ aks am fɔ put sɔntin pantap.
^ Ɔ “kɔmplit.”
