1 Pita 4:1-19
4 Bikɔs Krays sɔfa we in na bin mɔtalman, unasɛf rɛdi fɔ tink* lɛk am; bikɔs di pɔsin we de sɔfa dɔn lɛf fɔ sin,
2 so dat i go yuz di balans tɛm we dɔn lɛf fɔ am as mɔtalman fɔ du wetin Gɔd want, nɔto fɔ du wetin mɔtalman want igen.
3 Di tɛm we dɔn pas dɔn du fɔ una fɔ de du wetin pipul dɛn na ɔda neshɔn dɛn want, we una bin de du dɛn tin we de sho se una nɔ gɛt wan shem ɛn rɛspɛkt,* we una nɔ bin ebul fɔ kɔntrol unasɛf pan sɔntin, we una bin de drink pasmak, we una bin de miks pan dɛn wayl pati, pan dɛn pati dɛn fɔ drink pasmak, ɛn pan dɛn dɔti dɔti aydɔl wɔship.
4 Dɛn sɔprayz bikɔs una nɔ de kɔntinyu fɔ fala dɛn pan di sem dɔti layf we dɛn de pan, so dɛn de tɔk bad bɔt una.
5 Bɔt dɛn pipul ya go ansa to di wan we rɛdi fɔ jɔj di wan dɛn we de alayv ɛn di wan dɛn we dɔn day.
6 Infakt, na dis mek dɛn prich di gud nyuz to di wan dɛn we dɔn day, so dat pan ɔl we mɔtalman jɔj dɛn bay aw dɛn si dɛn, dɛn go liv akɔdin to di spirit na Gɔd in yay.
7 But di tɛm we ɔltin fɔ dɔn, dɔn kam nia. So una go de du tin wit sɛns ɛn nɔ slip we i kam pan prea.
8 Bɔt di tin we pas ɔl na dat, una fɔ rili lɛk una kɔmpin dɛn, bikɔs lɔv de kɔba bɔku bɔku sin dɛn.
9 Una fɔ fri-an to una kɔmpin dɛn, ɛn una nɔ fɔ de grɔmbul.
10 Jɔs lɛk we una ɔl dɔn gɛt gift, una yuz am fɔ wok fɔ una kɔmpin dɛn bikɔs una na fayn savant dɛn fɔ Gɔd in spɛshal gudnɛs* we i de sho difrɛn we dɛn.
11 If ɛnibɔdi de tɔk, lɛ i tɔk lɛk se i de tɔk Gɔd in mɛsej; if ɛnibɔdi de wok, lɛ i du am lɛk se i abop pan di trɛnk we Gɔd de gi; so dat Gɔd go gɛt di glori pan ɔltin tru Jizɔs Krays. Na in gɛt di glori ɛn di pawa sote go. Emɛn.
12 Di wan dɛn we a rili lɛk, una nɔ sɔprayz bikɔs ɔf di tɛst dɛn we de mit una we tan lɛk faya, lɛk se na sɔntin we una nɔ no bɔt de apin to una.
13 Bifo dat, una go de gladi bikɔs una de sɔfa lɛk Krays, so dat una go gladi ɛn gladi mɔ insay di tɛm we i go sho in glori.
14 If dɛn de tɛl una bad wɔd fɔ Krays in nem, una gɛt gladi-at, bikɔs di spirit we gɛt glori, dat na, Gɔd in spirit, de pan una.
15 Bɔt mek nɔn pan una nɔ sɔfa bikɔs i kil pɔsin ɔ tif ɔ du bad ɔ put mɔt pan ɔda pipul dɛn biznɛs.
16 Bɔt if ɛnibɔdi de sɔfa bikɔs in na Kristian, lɛ i nɔ shem, bɔt lɛ i kɔntinyu fɔ gi Gɔd glori we i gɛt dis nem.
17 Na di rayt tɛm dis fɔ mek di jɔjmɛnt stat na Gɔd in os. If i stat wit wi fɔs, aw i go tan lɛk fɔ di wan dɛn we nɔ de obe Gɔd in gud nyuz?
18 “Ɛn if pɔsin we de du wetin rayt fɔ tray tranga wan so dat i go sev, wetin go apin to pɔsin we nɔ lɛk Gɔd ɛn to di sina?”
19 So, lɛ di wan dɛn we de sɔfa bikɔs dɛn de du wetin Gɔd want kɔntinyu fɔ lɛf dɛnsɛf* na di Wan we mek ɔltin ɛn we fetful, in an ɛn kɔntinyu fɔ du gud.
Futnot
^ Ɔ “mekɔp una maynd.”
^ Dis na di plural fɔ di Grik wɔd asɛlgɛia. Rid Baybul Wɔd dɛn Minin.
^ Rid Baybul Wɔd dɛn Minin.
^ Ɔ “dɛn sol.”
