Pweng wo uh tuhkuh sin Jeova me, God luhn insewowo, suc luhngse sucu nuhkewa in insewowo. (Sie Timothy 1:11, BMK) El pa oraclah oakwuck nuh ke macruht. Macruht ma orek fal nuh ke ma sap luhn government uh yohk srihpac nuh ke insewowo luhn sucu se. Srihpac uh pa, ma inge sang kahsruh in oasr luhngse ac puhlakihnyen engan inmahsrlon pahpah, ninac ac tuhlihk. Mwet Christian uh enenuh in ahkos ma sap luhn acn uh ke orek pwepuh nuh ke macruht.—Riti Luke 2:1, 4, 5.

Meac nuhnak luhn God ke macruht? El luhngse macruht inmahsrlon mukul ac muhtwacn se in oan nwe tok. Jeova el luhngse mukul tuhma ac muhtwacn kiyac in oaru nuh sin sie sin sie. (Hebrew 13:4) El sruhnga divorce, kuh in sislah muhtwacn kuh mukul tuhma. (Malachi 2:16) Tuhsruhktuh el lwelah mwet Christian se in divorce ac sifwil pahyuck fin mwet se sahyac ah kosro.—Riti Matthew 19:3-6, 9.

Jeova el oraclah mukul ac muhtwacn eltahl in muh kahsruh sie sin sie ke ma kunacltahl ke moul in pahyuck. (Genesis 2:18) In oacna sie sifacn sucu, mukul tuhma el enenuh in sang mwe enenuh luhn sucu ac lotweltahl ke God. El enenuh in kihsackuhnuhlacng nuh sin muhtwacn kiyacl. Mukul tuhma ac muhtwacn kiyac eltahl enenuh in luhngse ac suhnakihn sie sin sie. Ke srihpen mukul ac muhtwacn nuhkewa sesuwohs, ma se ma yohk srihpac emeet nuh ke moul in pahyuck wowo se pa in nuhnak muhnahs nuh sin sie sin sie.—Riti Ephesus 4:31, 32; 5:22-25, 33; Sie Peter 3:7.

Fin oasr ma upac sikyak nuh ke moul in pahyuck lom an, wo komtacl kewa in tuhkweni kacfweacng in ahkkahlwemye luhngse nuh sin sie sin sie. (Sie Corinth 13:4, 5) Kahs luhn God uh tiac kacfwe siacnyacn se in fahsrelihk, mweyen tiac pa inge ma ac ahkwoye ma upac suc kwacna sikyak ke moul in pahyuck uh.—Riti Sie Corinth 7:10-13.

Jeova el luhngse komtacl in insewowo. El usot kahs in kahsruh suc wo emeet tuh komtacl in engankihn moul in fuhsr lomtacl. El luhngse komtacl in eis ma wo ke lahlmwetmwet ac etwacack luhn pahpah ac ninac kiyomtacl. (Colossae 3:20) Jeova el oacyacpac luhngse komtacl in puhla insewowo ke komtacl oruh ma luhngse lal ac fahsr tukun mwe srihkasrak lal Jesus.—Riti Ecclesiastes 11:9–12:1; Matthew 19:13-15; 21:15, 16.

Komtacl enenuh in kacfweacng in sang mwe enenuh luhn tuhlihk ke mongo, acn in muhta, ac nuknuk. (Sie Timothy 5:8) Tuhsruhktuh tuhlihk nuhtumtacl uh kuh in konwacack insewowo, komtacl fin lotweltahl in luhngse God ac in lutlut kacl. (Ephesus 6:4) Mwe srihkasrak lomtacl in ahkkahlwemye luhngse nuh sin God ac kuh in mokle insiacn tuhlihk nuhtumtacl an. Kahs in luti lomtacl fin fal nuh ke Kahs luhn God ac kuh in ekuhllah nuhnak luhn tuhlihk nuhtumtacl uh ke sie inkacnek wo.—Riti Deuteronomy 6:4-7; Soakas 22:6.

Tuhlihk uh puhlakihn insewowo ke pacl se kom ahkkweyacltahl ac kaksakuhnuhltahl. Eltahl enenuh pac mwe ahksuwohs ac kai. Kain in ahkpah inge kuh in karuhnguhnuhltahl liki ohiyac suc kuh in eslah insewowo laltahl. (Soakas 22:15) Tuhsruhktuh, kai uh enenuh in tiacna suhlallacl kuh upaclac.—Riti Colossae 3:21.

Mwet Loh luhn Jeova eltahl oraclah puk pucspucs suc kuh in kahsruh pahpah, ninac, ac tuhlihk. Puk inge nuhkewa oreklac fal nuh ke Bible.—Riti Psalm 19:7, 11.