Mughulhu mungyi e Biblia yikahulha Yesu mwa “Mughalha wa Nyamuhanga.” (Yoane 1:49) Ebinywe “Mughalha wa Nyamuhanga” bikakanganaya ngoku Nyamuhanga ya Muhangiki, kutse Enzuko y’engebe yosi, imwamune n’eya Yesu. (Esyonyimbo 36:9; Eribisulirwa 4:11) E Biblia siyiri kangiriraya yithi Nyamuhanga mwabutha omwana ngoku abandu bakabutha abaana.

 E Biblia kandi yikahulha abamalaika mwa “baghalha ba Nyamuhanga.” (Yobu 1:6) Kandi e Biblia yikabugha yithi omundu w’erimbere, Adamu, abya “mughalha wa Nyamuhanga.” (Luka 3:38) Aliwe, kundi Yesu abya kihangikwa kya Nyamuhanga eky’erimbere kandi n’iyo musa oyo Nyamuhanga ahangika iyuwene-wene, e Biblia yikahulha Yesu mwa Mughalha akambere ka Nyamuhanga.

•  Mbwino Yesu anabya ikere elhubulha athali abuthwa okwa kihugho?

•  Ni byahi ebya Yesu akolha athali asa okwa kihugho?

 Ee. Yesu abya kihangikwa ky’ekirimu elhubulha athali abuthwa ng’omundu w’omubiri okwa kihugho. Yesu iyuwene-wene mwabugha athi: ‘Nandaghalha erilhua elhubulha.’​—Yoane 6:38; 8:23.

 Nyamuhanga mwatsuka erihangika Yesu athali ahangika kindu kyosi-kyosi. E Biblia yikakanaya oku Yesu yithi:

•   “Kristo ni . . . kambere, oyulhabire ebyosi ebyahangikawa.”​—Abanya Kolosai 1:15.

•   Ya “nzuko y’erihangika lya Nyamuhanga.”​—Eribisulirwa 3:14.

 Yesu mwaberererya obuminyereri obuhambire ok’oyo “erihulhuka liwe lithulha kera oko mighulhu ya kera na kera.”​—Mika 5:2; Matayo 2:4-6.

 Aby’awithe ekitsumbi kinene elhubulha. Yesu mwakania okwa kitsumbi eki akasaba athi: “Thatha, wunyisikaye . . . omo lhukengerwa olho nabya nalho haghuma nawu ekihugho kithe kyahangikwa.”​—Yoane 17:5.

 Mwawathikya Thatha wiwe erihangika ebindi bindu byosi. Yesu mwakolha haghuma na Nyamuhanga “ng’omukoli mukulhu.” (Emisyo 8:30) E Biblia yikakanaya oku Yesu yithi: “Nyamuhanga mwahangika ebindu byosi omo byalha bya Kristo, ebiri omo lhubulha, n’ebiri okwa kihugho.”​—Abanya Kolosai 1:16.

 Nyamuhanga mwahangika ebindi bindu ebyosi erilhabira omu Yesu. Ebihangikwa ebi mwabya ebindi bihangikwa byosi by’ekirimu, kuthya n’ekyanya n’ebyosi ebirimu. (Eribisulirwa 5:11) Omo yindi nzira, erikolongana eri eryabya ahakathi-kathi ka Nyamuhanga na Yesu liri ng’erikabya ahakathi-kathi k’oyukathera epulani y’enyumba n’omuhimbi. Omutheri w’esyopulani akathera epulani y’enyumba; omuhimbi iniahindulhayo mwa nyumba yonyine-nyine.

 Mwakolha ng’Ekinywe. E Biblia yikabya yikakania oku Yesu iniakine elhubulha, yikamwahulhamo “Kinywe.” (Yoane 1:1) Ahathe erithika-thika, eki kikamanyisaya kithi Nyamuhanga abya akakolesya Yesu eriha ebindi bihangikwa by’ekirimu emyatsi n’obusondoli.

 Yesu kandi angabya imwakolha ng’Embuyi ya Nyamuhanga erikania n’abandu okwa kihugho. Nyamuhanga angabya imwaha Adamu na Eva b’obusondoli omw’irima lye Edeni, erilhabira omu Yesu, Ekinywe. (Enzuko 2:16, 17) Yesu angabya iyuwabya mumalaika oyuwasondolha Abaisraeli kera omo mbwarara kandi omulenge wiwe gho Baisraeli bangabya ibaghenderako.​—Eriluayo 23:20-23. a