Ль гора һʹәсабәке 80 сәләф щаһьлед Америкайе дӧа дькьн, ле жь ԝана тʹәне ниви һәр рʹож дӧа дькьн. Бешьк, гәләк жь ԝан дьхԝазьн бьзаньбьн: «Гәло дӧа тʹәне бона ԝе йәке йә, ԝәки дьле мәрьва һеса бә, йан һе зедә?»

•  Дӧа чь йә?

•  Гәло Хԝәде дӧа дьбьһе?

•  Әз дәрһәԛа чь дькарьм дӧа бькьм?

•  Щаһьлед дьн чь дьбежьн

 Дӧа әв һәйә хәбәрдана тʹәви Әʹфьрандар. Һәла бьфькьрә әв ԛәдьрәки чьԛас мәзьн ә! Йаһоԝа һәр алийава жь мәрьва ԛәԝитьр у бьльндтьр ә, ле әԝ «жь мә һәр кәси нә дур ә» (Кʹаред Шандийа 17:27). Кʹьтеба Пироз мә һелан дькә: «Хԝә ль Хԝәде бьгьрьн, Хԝәде жи ԝе хԝә ль ԝә бьгьрә» (Аԛуб 4:8).

 Тӧ ча дькари незики Хԝәде би?

•   Йа пешьн, бь сайа дӧа, чьмки ӧса тӧ тʹәви Хԝәде хәбәр дьди.

•   Йа дӧда, бь сайа һинбуна Кʹьтеба Пироз, чьмки ӧса Хԝәде тʹәви тә «хәбәр дьдә».

 Һәләԛәтийа ӧса, демәк дӧа у һинбуна Кʹьтеба Пироз, ԝе али тә бькә достийа хԝә тʹәви Хԝәде ԛәԝи бьки.

 «Хәбәрдана тʹәви Йаһоԝа, демәк тʹәви Йе Һәри Бьльнд, ԛәдьрәки лапи мәзьн ә бона мәрьва» (Щереми).

 «Чахе әз дӧада дьле хԝә Йаһоԝарʹа вәдькьм, әз дьһа незики ԝи дьбьм» (Миранда).

 Һәрге тӧ баԝәрийа хԝә Хԝәде тини у ԝирʹа дӧа дьки, дьбәкә диса жи тәрʹа һеса нинә баԝәр бьки, ԝәки әԝ дӧайед тә дьбьһе. Ле бь рʹасти Кʹьтеба Пироз дәрһәԛа Хԝәде ӧса дьбежә: «Тӧ кӧ дӧа дьбьһейи» (Зәбур 65:2). Әв ӧса жи һелан дькә «һʹәму хәмед хԝә бавежьнә сәр ԝи». Чьрʹа? «Чьмки әԝ бона ԝә хәм дькә» (1 Пәтрус 5:7).

 Бьфькьрә: Тӧ тʹьме ԝәʹдә дьвини, ԝәки тʹәви һәвалед хԝәйи незик хәбәр ди, ӧса нинә? Һәрге тӧ дьхԝази бьби досте Йаһоԝа, тʹьме тʹәви ԝи хәбәр дә у дӧада наве ԝи, Йаһоԝа, һьлдә (Зәбур 86:5-7; 88:9). Бь рʹасти Кʹьтеба Пироз мә һелан дькә «һәр гав дӧа бькьн» (1 Тʹесалоники 5:17).

 «Дӧа әв хәбәрдана ортʹа мьн у Баве мьни әʹзмана йә, кʹижанида әз дькарьм бь тʹәмами дьле хԝә вәкьм» (Мозес).

 «Әз тʹәви Йаһоԝа дәрһәԛа һʹәму тьшти һур бь һур хәбәр дьдьм, чаԝа кӧ мьне тʹәви дийа хԝә у һәвала хԝәйә незик хәбәр да» (Карин).

 Кʹьтеба Пироз дьбежә: «Хԝәстьна ԝә бьра бь дӧа-дьрозга, рʹазибунева тʹәвайи, Хԝәдева әʹйан бә» (Филипи 4:6).

 Гәло әв те һʹәсабе, ԝәки дӧада әм дькарьн дәрһәԛа чәтьнайед хԝә гьли кьн? Бәле, әм дькарьн! Кʹьтеба Пирозда те готьне: «Тӧ баре хԝә бьдә Хӧдан Әԝе һьлгьрә дәԝса тә» (Зәбур 55:22).

 Бәле, чахе Хԝәдерʹа дӧа дьки, тӧ гәрәке нә тʹәне дәрһәԛа проблемед хԝә гьли ки. Кәчʹькәк бь наве Шантел дьбежә: «Һәрге Йаһоԝарʹа тʹәне бона аликʹарийе дӧа дьки, әв ида достийа незик нинә. Бь тʹәхмина мьн пешийе гәрәке рʹазибуна хԝә Хԝәдерʹа бьдьмә кʹьфше у гәләк тьшт һәйә бона чь жи әз дькарьм рʹазибуна хԝә әʹйан кьм».

 Бьфькьрә: Тӧ бона чь дьхԝази рʹазибуна хԝә Хԝәдерʹа әʹйан ки? Дәрһәԛа кʹижан се тьшта тӧ дькари иро рʹазибуна хԝә Йаһоԝарʹа әʹйан ки?

 «Һәла һе бона кӧлиркәкә бьчʹук у бәдәԝ жи әм дькарьн рʹазибуна хԝә Йаһоԝарʹа бьдьнә кʹьфше» (Анита).

 «Бьфькьрә дәрһәԛа ԝан әʹфрина, бона кʹижана тӧ һʹәйр-һʹӧжмәкʹар дьмини, йан жи дәрһәԛа рʹезәкә жь Кʹьтеба Пироз, кʹижан кӧ гәләк дьле тә дьгьрә, у бона ԝан тьшта Йаһоԝарʹа шекьрдар бә» (Брайан).