Ча Дӧа Бькьн; Дӧайе Хӧдан Бьԝәкʹьлиньн?
Щаба Кʹьтеба Пироз
Дӧайе Хӧдан мәсәлә йә кӧ бьзаньбьн ча дӧа бькьн у дәрһәԛа чь дӧа бькьн. Шагьртед Иса жь Иса пьрсин, ԝәки әԝ ԝана һин кә дӧа бькьн. Һьнге Иса бь ве дӧакьрьне щаба ԝан да (Луԛа 11:1). Ле тʹәне Дӧайе Хӧдан нинә кӧ Хԝәде ԛәбул дькә. a Иса әԝ дӧа һишт сәва мәсәла ԝе йәке, кӧ Хԝәде дӧайед чь щурʹәйи дьбьһе.
Ве готареда
Дӧайе Хӧданда чь те готьне?
Дӧайе Хӧдан, кʹижан кӧ Мәтта 6:9-13-да ньвисар ә, щурʹә-щурʹә ԝәлгәрʹандьнед Кʹьтеба Пирозда мина һәв ньвисар ниньн. Дина хԝә бьдьнә ԝан дӧ мәсәла.
Ԝәлгәрʹандьна Кʹьтеба Пирозә жь Мьзгини: «Баве мәйи әʹзмана! Наве тә пироз бә, Пʹадшатийа тә бе, әʹмьре тә бә, чаԝа ль әʹзмен, ӧса жи ль сәр әʹрде. Нане мәйи рʹоже рʹож бь рʹож бьдә мә. Дәйнед мә бьбахшинә, чаԝа кӧ әм дьбахшиньнә дәйндаред хԝә. У мә нәбә щерʹьбандьне, ле мә жь йе хьраб хьлаз кә».
Ԝәлгәрʹандьна Инщил Мьзгини: «Баве мә йе ль әʹзмана, наве тә пироз бә. Бьла пʹадшатийа тә бе. Дахԝаза тә ԝәк ль әʹзмен, бьла ль сәр рʹуйе әʹрде жи бе щьһ. Нане мә йе рʹоже рʹож бь рʹож бьдә мә. У ль дәйнед мә бьбьһурә, ԝәк кӧ әм ль дәйндаред хԝә бьһуртьнә. У мә нәбә щерʹьбандьне, ле мә жь Йе Хьраб хьлаз бькә». b
Дӧайе Хӧдан чь те һʹәсабе?
Һинкьрьнед Иса ль сәр һʹиме Ньвисаред Пироз бун, ләма жи бь логики йә ԝәки пʹаред Кʹьтеба Пироз ԝе али мә бькьн, кӧ әм фәʹм бькьн ԝәки Дӧайе Хӧдан чь те һʹәсабе.
«Баве мәйи әʹзмана»
Әв сәрнав «Баве мә» лайиԛи Хԝәде йә, чьмки әԝи әм әʹфьрандьнә у әʹмьр дайә мә (Ишайа 64:8).
«Наве тә пироз бә»
Наве Хԝәде Йаһоԝа йә у гәрәке әԝи нави бь ԛәдьр бьдьнә хәбате, чьмки әԝ пироз ә. Әм наве Хԝәде пироз дькьн, гава дәрһәԛа һʹӧнӧред ԝи у ԛьрара ԝи мәрьварʹа гьли дькьн (Зәбур 83:18; Ишайа 6:3).
«Пʹадшатийа тә бе»
Пʹадшатийа Хԝәде әв һәйә сәрԝертийа сәр әʹзмана, кʹижанеда Иса йә Пʹадша. Иса һин дькьр ԝәки дӧа бькьн, кӧ Пʹадшатийа Хԝәде сәр тʹәмамийа дьнйайе сәрԝертийе бькә (Данийел 2:44; Әʹйанти 11:15).
«Әʹмьре тә бә, чаԝа ль әʹзмен, ӧса жи ль сәр әʹрде»
Чаԝа ль сәр әʹзмен зӧлми у мьрьн тʹӧнә, ԛьрара Хԝәде жи бона әʹрде әԝ ә ԝәки инсанәт һʹәта-һʹәтайе бехофийеда у әʹдьлайеда бьжи (Зәбур 37:11, 29).
«Нане мәйи рʹоже рʹож бь рʹож бьдә мә»
Ԝәʹде Исада хԝарьна сәрәкә нан бу. Әм гәрәке бир нәкьн ԝәки әʹмьре мә Әʹфьрандаре мәва гьредайи йә, чьмки һәр тьштед бона жийине әԝ дьдә мә (Кʹаред Шандийа 17:24, 25).
«Дәйнед мә бьбахшинә, чаԝа кӧ әм дьбахшиньнә дәйндаред хԝә»
Ве контекстеда хәбәра «дәйн» те һʹәсабе гӧнә (Луԛа 11:4). Һʹәму мәрьв гӧнәкʹар ьн у һʹәԝще бахшандьне нә. Ле һәрге әм дьхԝазьн Хԝәде бьбахшинә мә, әм гәрәке бьбахшиньнә ԝан, йед кӧ мьԛабьли мә гӧнә кьрьнә (Мәтта 6:14, 15).
«Мә нәбә щерʹьбандьне, ле мә жь йе хьраб хьлаз кә»
Йаһоԝа Хԝәде тʹӧ кәси хьрабийеда нащерʹьбинә (Аԛуб 1:13). Әм алийе Мире-щьнада тенә щерʹьбандьне, кʹижан кӧ Кʹьтеба Пирозда те навкьрьне «Йе Хьраб» у «Йе кӧ дьщерʹьбинә» (1 Йуһʹәнна 5:19; Мәтта 4:1-4). Әм чахе дькʹәвьнә щерʹьбандьна, әм жь Йаһоԝа һиви дькьн, ԝәки али мә бькә тьштәки хьраб нәкьн у ԝирʹа амьн бьминьн.
Гәло дӧакьрьн тʹәне әԝ ә, кӧ Дӧайе Хӧдан бьԝәкʹьлиньн?
Иса Дӧайе Хӧдан һишт ча мәсәлә. Әԝ гәрәке гьли пәй гьли нәйе ԝәкʹьландьне. Иса пешийа кӧ әв дӧа бьгота ӧса гот: «Гава кӧ һун дӧа дькьн, гьлийа диса у диса нәԝәкʹьлиньн» (Мәтта 6:7, ДТʹ). Чахе Иса дәрәщәкә дьнда әв Дӧайе Хӧдан гот, әԝи һьнә гьлийе дьн да хәбате (Луԛа 11:2-4).
Дӧайе лапи баш әԝ ә, чахе әм бь гьлийе хԝә фькьр у һәстед хԝә Хԝәдерʹа әʹйан дькьн (Зәбур 62:8).
Ча әм гәрәке дӧа бькьн?
Дӧайе Хӧдан мәсәләкә баш ә ԝе йәкеда, ԝәки бьзаньбьн чь щурʹәйи дӧа бькьн, ԝәки Хԝәде дӧайед мә бьбьһе. Дина хԝә бьде, кӧ ча рʹезед Кʹьтеба Пирозә дьн дәрһәԛа дӧа, әве йәке избат дькьн.
Тʹәне Хԝәдерʹа дӧа бькә
Рʹез: «Хԝәстьна ԝә бьра бь дӧа-дьрозга, рʹазибунева тʹәвайи, Хԝәдева әʹйан бә» (Филипи 4:6).
Чь те һʹәсабе: Әм гәрәке тʹәне Хԝәдерʹа дӧа бькьн, нә кӧ Мәрйәм, Иса йан жи кәсәки пирозрʹа. Чахе Иса гот «Баве мәйи әʹзмана», бь ԝе йәке әԝи дьхԝәст мә һин кә, ԝәки әм гәрәке тʹәне Йаһоԝа Хԝәдерʹа дӧа бькьн.
Дӧайед мә гәрәке ль гора ԛьрара Хԝәде бьн.
Рʹез: «Һәгәр әм тьштәки ль гора хԝәстьна ԝи же бьхԝазьн, әԝ дәнге мә дьбьһе» (1 Йуһʹәнна 5:14).
Чь те һʹәсабе: Әм дькарьн дәрһәԛа һәр тьшти чь кӧ ль гора ԛьрара Хԝәде йә, дӧа бькьн. Чахе Иса дӧада гот «бьра әʹмьре тә бә», бь ԝе йәке һин кьр, ԝәки ԛьрара Хԝәде чьԛас фәрз ә. Әм дькарьн бь һинбуна Кʹьтеба Пироз пебьһʹәсьн дәрһәԛа ԛьрара Хԝәде бона әʹрде у инсанәте.
Дәрһәԛа дәрдед хԝә дӧа бькә
Рʹез: «Тӧ баре хԝә бьдә Хӧдан Әԝе һьлгьрә дәԝса тә» (Зәбур 55:22).
Чь те һʹәсабе: Хԝәде бона мә хәм дькә. Иса Дӧайе Хӧданда дәрһәԛа һьнә тьштед шәхси жи һиви кьр. Демәк әм жи дькарьн бона һʹәԝщед хԝәйә физики дӧа бькьн у рʹебәрийе бьхԝазьн, гава сафикьрьнед фәрз дькьн. Әм ӧса жи дькарьн ԝәʹде чәтьнайа аликʹарийе у бахшандьне бона гӧна бьхԝазьн. c
a Мәсәлә чахе Иса у шагьртед ԝи щарәкә майин дӧа дькьрьн, ԝана гьли-готьнед дьн дьданә хәбате, кʹижан кӧ жь Дӧайе Хӧдан щӧдә дьбу (Луԛа 23:34; Филипи 1:9).
b Сәр зьмане Кӧрманщи Мьзгинида йа Института Ԝәлгәрʹандьна Кʹьтеба Пироз, Дӧайе Хӧдан ӧса хьлаз дьбә: «Чьмки пʹадшати, ԛәԝат у рʹумәт йе тә нә, һʹәта-һʹәтайе. Амин». Әв гьли-готьнед пәсьндайине ӧса жи Кʹьтебед Пирозә ԝәлгәрʹандьнед дьнда жи һәнә у тенә навкьрьне доксоложийа. Фәрһәнгәкеда «The Jerome Biblical Commentary» ӧса те готьне: «Доксоложийа . . . һʹәчʹи зәʹф [манускриптед] бь итʹбарда тʹӧнә нә».
c Һьнә мәрьв хԝә бона гӧнед хԝә ӧса нәһәԛ дькьн, кӧ дьфькьрьн ԝәки нәһежа нә Хԝәдерʹа дӧа бькьн у бахшандьне бьхԝазьн. Ле Йаһоԝа ԝан мәрьварʹа дьбежә: «Ньһа ԝәрен әм ль доза хԝә бьньһерʹьн. Гӧнәһед ԝә бь хуне сор жи бьбьн, ԝе ԝәк бәрфе сьпи бьбьн» (Ишайа 1:18, ИМ). Йаһоԝа тʹӧ щар пьшта хԝә надә ԝан кәса, йед кӧ бь дьл у щан тʹобә дькьн.
Дьбәкә Wәрʹа Һʹәwас бә
БЬРЩА QӘРӘWЬЛИЙЕ
Чьма Гәрәке Дӧа Бькьн?
Дьбәк тә дьфькьри, ԝәки Хԝәде дӧайе та набьһе. Ле тӧ тʹәне нини.
ҺИНКЬРЬНЕД КʹЬТЕБА ПИРОЗӘ СӘРӘКӘ
Гәло Хԝәде Һʹәму Дӧа Дьбьһе?
Ле чь һәрге мәрьв бь хԝәһʹьзийе дӧа дькә? Гәло Хԝәде ԝе бьбьһе дӧайе ԝи мәрьви, кʹижан кӧ тʹәви жьна хԝә нәрʹаст хԝә кʹьфш дькә у паше кʹәрәма жь Хԝәде дьхԝазә?
БЬРЩА QӘРӘWЬЛИЙЕ
Хԝәде Чьма Щаба Һʹәму Дӧа Надә?
Кʹьтеба Пироз әʹйан дькә, кӧ чаԝа дӧа бькьн ԝәки Хԝәде щаба дӧайед мә бьдә у щаба кʹижан дӧайе әԝ надә.
БЬРЩА QӘРӘWЬЛИЙЕ
«П′адшатийа Тә Бе»; Дӧа Кʹижан Кӧ Бь Милйона Мәрьв Дьԝәкʹьлиньн
Әм гәрәке щаба кʹижан пьрса бьстиньн дәрһәԛа Пʹадшатийа Хԝәде кӧ мәʹна ве дӧайе фәʹм бькьн?