Кʹе бун Нәфил?

ВЕХӘ

Кʹе бун Нәфил?

Щаба Кʹьтеба Пироз

Нәфил a һена Нӧһда дьжитьн, әԝана тәрʹьки у зӧлм бун. Бь рʹасти әԝ зарʹед мәләкед зӧлм бун, кʹижан кӧ пәйа бун сәр әʹрде у хԝәрʹа ԛиз стандьн.

Кʹьтеба Пироз дьбежә, ԝәки «зарʹед Хԝәде дитьн кӧ ԛизед мәрьвайе бәдәԝ ьн» (Дәстпебун 6:2). Әв лаԝед Хԝәде әʹфринед рʹӧһʹани бун, кʹижан кӧ мьԛабьли ԝи рʹабун. Әԝана ль әʹзмед «щийе хԝә шьһʹьтандьн», хԝә кьрьнә дьлԛе мәрьва у «жь ԝан кʹе кʹижан» ԛиз «бәгәм дькьр хԝәрʹа жьн дьстандьн» (Щьһуда 6; Дәстпебун 6:2).

Жь бо һәләԛәтийа мәләка тʹәви ԛизед мәрьвайи, зарʹед нәтʹәбийәти дьһатьнә буйине (Дәстпебун 6:4). Нәфил зәʹф тәрʹьки у зӧлм бун, рʹуйе кʹижанада әʹрд хьрабийева тʹьжи бьбу (Дәстпебун 6:13). Кʹьтеба Пирозда те готьне, ԝәки әԝ «мерхас бун, кӧ бәреда бь нав у дәнг бун» (Дәстпебун 6:4). Әԝана бь зӧлмийа хԝә әʹйан бун, у мәрьвед дьн жи чʹәʹв дьданә ԝан (Дәстпебун 6:5; Жьмар 13:33). b

Ньһерʹандьна нәрʹаст дәрһәԛа Нәфила

Ньһерʹандьна нәрʹаст: Нәфил һʹәта ньһа сәр әʹрде дьжин.

Рʹасти: Һена Нӧһда Йаһоԝа Селав рʹакьр у дьнйа хьраб кʹӧта кьр. Нәфил тʹәви һʹәму мәрьвед зӧлм ԛьрʹ бун. Тʹәне Нӧһ малбәта хԝәва сах ман, чьмки әԝана ль бәр чʹәʹве Хԝәде рʹаст бун (Дәстпебун 6:9; 7:12, 13, 23; 2 Пәтрус 2:5).

Ньһерʹандьна нәрʹаст: Бавед Нәфила меред мәрьвайи бун.

Рʹасти: Бавед ԝан «зарʹед Хԝәде» бун (Дәстпебун 6:2). Әв гьли-готьн Кʹьтеба Пирозда те хәбьтандьне сәр мәләка (Ибо 1:6; 2:1; 38:7). Ԝан мәләка дькарьбун хԝә бькьнә дьлԛе мәрьва (Дәстпебун 19:1-5; Йешу 5:13-15). Пәтрусе шанди дәрһәԛа ԝан ӧса гот: «Рʹӧһʹед кәледа ... йед кӧ ԝәхтәке нә гӧһдар бун, гава Хԝәде бь думька дьреж сәбьр дькьр» (1 Пәтрус 3:19, 20). Щьһуда кӧ йәк жь ньвискʹаред Кʹьтеба Пироз бу, дәрһәԛа ԝан мәләка гот, ԝәки әԝана «һʹӧкӧме хԝә хԝәй нәкьрьн, ле щийе хԝә шьһʹьтандьн» (Щьһуда 6).

Ньһерʹандьна нәрʹаст: Нәфил, мәләкед зӧлм бун.

Рʹасти: Чаԝа кӧ жь Дәстпебун 6:4 те кʹьфше, Нәфил мәләк нибун, әԝана зӧрʹәтед мәләка жь ԛизед мәрьвайи бун. Паши ве йәке, кӧ мәләка ԛизе мәрьвайи «кʹе кʹижан бәгәм дькьр хԝәрʹа жьн дьстандьн», Йаһоԝа гот, ԝәки 120 сал шунда әԝ ԝе дьнйа ԝанә зӧлм кʹӧта кә (Дәстпебун 6:1-3). Кʹьтеба Пироз дьбежә, ԝәки «һьнге» мәләкед кӧ хԝә кьрьбун дьлԛе мәрийа, «дәст давитьнә ԛизед мәрьвайе», у жь ԝана зарʹед ԛәԝи дьһатьнә буйине кӧ «бь нав у дәнг бун» (Дәстпебун 6:4).

a Хәбәра Ибранийә «Нәфил» дьԛәԝьмә те һʹәсабе «әԝед кӧ мәрьва әʹрде дьхьн». Кʹьтебәкеда «Wilson’s Old Testament Word Studies» те готьне, ԝәки әв хәбәр мәрьвед ӧса әʹйан дькә, йед кӧ «һʹьщуми сәр мәрийа дькьн, ԝана дьхьн у тʹалан дькьн».

b Ча те кʹьфше, щәʹсусед Исраеле, гьлийе кʹижана кӧ Жьмар 13:33-да ньвисар ә, чахе мәрьвед тәрʹьки дитьн, Нәфил кʹәтьнә бира ԝан, йед кӧ гәләк ԛьрʹна пешда дьжитьн (Дәстпебун 7:21-23).