Кʹома рʹебәрийе әԝ кʹомәкә бьчʹук ә жь Мәсиһийед рʹӧһʹанида щерʹьбанди, йед кӧ нав тʹәмамийа дьнйайе рʹебәрийе шьхӧлед Шәʹдед Йаһоԝа дькьн. Әԝ кʹом бона дӧ тьшта щабдар ә:

•   Әԝ щабдар ә бона һазьркьрьна бәрнама, кʹижан кӧ сәр һʹиме Кʹьтеба Пироз ьн, йед кӧ бь сайа әʹдәбйәта, щьвата у мәкʹтәбед Шәʹдед Йаһоԝа пек те (Луԛа 12:42).

•   Әԝ организә дькә шьхӧлед Шәʹдед Йаһоԝа нав тʹәмамийа дьнйайе, демәк рʹебәрийа шьхӧле бәлакьрьна мьзгинийе дькә у дина хԝә дьдә ве йәке, кӧ пʹәре ԛӧрбанкьри рʹаст бенә хәбьтандьне.

 Кʹома Рʹебәрийе чʹәʹв дьдә шанди у рʹуспийед Оршәлиме йед ԛьрʹна йәке, кʹижана кӧ сафикьрьнед фәрз дькьрьн бона һʹалхԝәшийа тʹәмамийа щьвата Мәсиһийа (Кʹаред Шандийа 15:2). Әндәмед Кʹома Рʹебәрийе жи мина ԝан меред амьн сәрокед тʹәшкиләта мә ниньн. Әԝана рʹебәрийе жь Кʹьтеба Пироз дьгәрʹьн у ԛәбул дькьн, ԝәки Йаһоԝа Иса Мәсиһ кʹьфш кьрийә ча сәре щьвате (1 Корьнтʹи 11:3; Әфәси 5:23).

 Әндәмед Кʹома Рʹебәрийе әԝ ьн: Кенет Кук, Гейщ Флигьл, Семуел Һӧрд, Щефри Щексон, Стивед Лет, Герит Лӧш, Марк Сандерсон, Девид Сплейн у Щефри Ԝиндер. Әԝана офиса мәйә сәрәкәда Ԝорԝикеда, демәк Нийу Йоркеда хьзмәт дькьн.

 Кʹома Рʹебәрийе шәш комите саз кьрьнә, кʹижан кӧ бона щурʹә-щурʹә шьхӧлед тʹәшкиләта мә щабдар ьн. Һәр әндәмәки Кʹома Рʹебәрийе, йәк йан чәнд комитейада хьзмәт дькьн.

•   Комитейа Координатора бона шьхӧлед ԛанунзанийе щабдар ә, ӧса жи дәрберʹа аликʹарийе дьдә Шәʹдед Йаһоԝа, йед кӧ рʹасти тʹәшԛәлед тʹәбийәте, пәйкʹәтьна у дәрәщед дьн тен.

•   Комитейа Кʹьфшкьрьна Әндәма хәм дькә бона ԝан шьхӧла, йед кӧ әндәмед Бәйтʹәлева тʹәвгьредайи нә.

•   Комитейа Нәшьркьрьне щабдар ә бона һазьркьрьна хԝарьна рʹӧһʹани у шандьна әʹдәбйәта. Ӧса жи щабдар ә бона авакьрьна щийе һʹәбандьне, офисед бона ԝәлгәрʹа, у филиала.

•   Комитейа Хьзмәтийе щабдар ә бона бәлакьрьна «Мьзгинийа Пʹадшатийе» (Мәтта 24:14).

•   Комитейа Һинкьрьне щабдар ә бона һазьркьрьна бәрнама рʹӧһʹани, кʹижан кӧ әм бь сайа щьвата, щурʹә-щурʹә мәкʹтәба у ӧса жи бь сайа аудио-видео ньвисандьна дьстиньн.

•   Комитейа Ньвискʹарийе щабдар ә бона һазьркьрьна хԝарьна рʹӧһʹани ча бь щурʹе нәшьркьри ӧса жи сәр малпәре. Әԝ ӧса жи рʹебәрийа шьхӧле ԝәлгәрʹа дькә.

 Хенщи ԝан тьшта, әндәмед Кʹома рʹебәрийе һәр һʹәфти дьщьвьн, сәва кӧ дәрһәԛа һʹәԝще тʹәшкиләте шеԝьр кьн. Сәр ԝан щьвина әԝана сәр һʹиме Ньвисаред Пироз шеԝьр дькьн у дьһельн ԝәки рʹӧһʹе пироз рʹебәрийа ԝан бькә, сәва бькарьбьн йәктийеда сафикьрьнед рʹаст бькьн (Кʹаред Шандийа 15:25).

 Әԝ аликʹарчи Мәсиһийед бь итʹбар ьн, кʹижан кӧ аликʹарийе дьдьн Комитейед Кʹома Рʹебәрийе (1 Корьнтʹи 4:2). Әԝана щерʹьбанди нә, ләма жи әв шьхӧле кӧ тʹәсмили ԝан дькьн, бь һостәти тиньн сери. Әԝана ӧса жи һәр һʹәфти тенә сәр ԝан щьвина, кʹижан кӧ әԝ комите дәрбаз дькьн. Рʹаст ә әԝ аликʹарчи дәԝса комите сафикьрьна накьн, ле ширәт у информасийа керһати дьдьнә ԝан бьра. Әԝана ӧса жи ньһерʹандьна хԝә дьбежьн, бь сайа чь жи ахьрийеда комите сафикьрьнед баш дькә. Хенщи ве йәке, әԝана дина хԝә дьдьне, кӧ әԝ сафикьрьн чь ахьри тиньн. Кʹома Рʹебәрийе дькарә ԝана кʹьфш кә, сәва кӧ әԝана нав тʹәмамийа дьнйайеда сәрледана хушк-бьра бькьн у сәр щьвинед һәрсали у ԝәʹде хьлазкьрьна мәкʹтәба Гиләде пе тʹема дәркʹәвьн.