Дьбә кӧ жь бо проблемед аборийева гьредайи, мәрʹа чәтьн ә әʹбура хԝә бькьн. Пандәмийа, тʹәшԛәлед тʹәбийәте, шәрʹ у пьрсед политикайева гьредайи, гәләк щар аборийе сьст дькьн. Чахе әм ньшкева хәбата хԝә ӧнда дькьн, әм дькʹәвьнә стресе. Ле ширәтед Кʹьтеба Пирозә билани дькарьн али мә бькьн, кӧ бькарьбьн пе пʹәре һьндьк жи әʹбура хԝә бькьн.

 Принсипа Кʹьтеба Пироз: «Һин бумә . . . йан һәбунеда бьм йан жи тʹӧнәбунеда» (Филипи 4:12).

 Һәрге тӧ ньһа һьндьк пʹәра дьстини, тӧ дькари һини һʹале хԝәйи тʹәзә би у әʹбура хԝә бьки. Чьԛас һе зу тӧ дәрәща хԝә ԛәбул ки у дәстпеки ль гора ԝан гӧһастьна бьжийи, һаԛас ԝе тәрʹа у малбәта тәрʹа һеса бә, әве чәтьнайе алт кьн.

 Пебьһʹәсә кӧ дәԝләт йан жи тʹәшкиләтед кӧ аликʹарийе дьдьн, чь щурʹәйи дькарьн али тә жи бькьн. Бь ләз һәрәкʹәт бькә, сәва кӧ әʹрзе тʹьжә ки у әве кʹомәке бьстини, һʹәта кӧ ԝәʹде ԝе кʹомәкдайине дәрбаз нәбуйә.

 Принсипа Кʹьтеба Пироз: «Бе ширәт мәрәм у тʹьвдир бәтал дьбьн, ле бь сайа гәләк ширәткʹара әԝ тенә сери» (Мәтʹәлок 15:22).

 Тʹәви һʹәвалзәԝащ у зарʹед хԝә, дәрһәԛа дәрәща хԝәйә тʹәзә хәбәр дьн. Хәбәрдана баш дькарә али һʹәму нәфәра бькә, кӧ фәʹм бькьн ԝәки чь гӧһастьна гәрәке бькьн у пьштгьрийа тә бькьн. Һәрге малбәтеда һʹәмушк пьштгьрийа һәв бькьн у пʹәра бь билани хәрщ кьн, һьнге ԝе бькарьбьн пе пʹәред һьндьк жи әʹбура хԝә бькьн.

 Принсипа Кʹьтеба Пироз: «Жь ԝә кʹижан ә, кӧ бьхԝазә бьльндщикә нобәдара чекә, пешийе рʹунәни нәдә бәр һʹәсеб, гәло ԛәԝата ԝийе бьгьһиже бинә сери йан на?» (Луԛа 14:28).

 Чахе пʹәре тә һьндьк ә, гәләк фәрз ә бьзаньби кӧ һʹәму пʹәре хԝә сәр чь хәрщ ки. Бәри пешьн хԝәрʹа бьньвисә, кӧ һәр мәһ тӧ чьԛас пʹәрә ԛазанч дьки. Паше ӧса жи бьньвисә, кӧ һәр мәһ, ԝә пʹәре хԝә сәр чь хәрщ дькьр. Хенщи ԝе йәке бир нәкә бона ԝан пʹәра, кʹижан кӧ һун дьхԝазьн сәва дәрәщед дьн кӧ ньшкева дькарьн пешда бен, хәрщ кьн.

 Бьщерʹьбинә: Чахе биущета хԝә һʹәсаб дьки, хәрщед бьчʹук бир нәкә. Дьбәкә тӧ гәләк әʹщебмайи бьмини, гава бьвини ԝәки чьԛас пʹәрә сәр тьштед бьчʹук хәрщ дьбьн. Мәсәлә, мерәк гәләк зәндәгьрти ма, чахе хәрщед хԝә һʹәсаб дькьр у дит, ԝәки һәр сал ԝәкә чәнд сәд долар тʹәне сәва бәнушт хәрщ дькә.

 Принсипа Кʹьтеба Пироз: «Кʹижан һәрә ԛәнщ ә, һун ԝе бьбьжерьн» (Филипи 1:10).

 Пʹәре кӧ ԛазанщ дьки у йе кӧ хәрщ дьки, һьмбәри һәв кә у бьфькьрә кʹижан хәрща тӧ дькари кем ки у чь дьбәкә ида нәкʹьри. Һәла бьфькьрә дәрһәԛа дәрәщед кӧ жере һатьнә дайине:

•   Транспорт. Һәрге чәнд әʹрәбед тә һәнә, дькари йәке бьфьроши? Ле һәрге әʹрәба тә йа бьһа йә, тӧ дькари дәԝса ԝе йәкә ӧса бькʹьри, кʹижан кӧ кем хәрщ дькә? Йан дьбә кӧ тӧ сафи ки пе транспорте йан жи пе бисиклете һәрʹи-бейи?

•   Ԝәʹдәдәрбазкьрьн. Тӧ дькари сәр чәндәки нәди хәбате антена пʹәрʹәти у ТВ пе кабеле? Дьбәкә тӧ бькарьби дәԝса ԝана тьштед әрʹзан бьди хәбате? Мәсәлә, дьбә кӧ тӧйе бькарьби кʹьтебед әләктроник, аудиокʹьтеба, йан жи филма, жь кʹьтебхане бе пʹәрʹә һьлди.

•   Хәрщед комунал. Тʹәви малбәте шеԝьр кә, кӧ һун ча дькарьн аве, токе у шәԝате кем хәрщ кьн. Һәрге һин бьн пәй хԝә тʹьме токе весиньн у ԝәʹде сәршуштьне дьреж бьн аведа нәминьн, әв тьштед бьчʹук жи дькарьн хәрще ԝә кем кьн.

•   Хԝарьн. Дәԝса кӧ ресторанада хԝарьне бьхԝьн, ԝе баш бә малда бьхԝьн. Пешда бьфькьрьн кӧ һуне чь һазьр кьн. Һәрге те стандьн хӧрәк щарәкерʹа зәʹфи бькʹьрʹьн у йед бәрмайи нәрʹежьн. Пешийа һәрʹи хӧрәк бькʹьри, хԝәрʹа бьньвисә чь тәрʹа лазьм ә, сәва кӧ тьштед нәлазьм нәкʹьри. Емиш у пʹьнщаред дәмсале бькʹьрә, чьмки әԝ дьһа әрʹзан ьн. Пʹәре хԝә сәр хԝарьна нәсахләм хәрщ нәкә. Дьбәкә тӧ дькари хԝәха һьнә тьшта бьчини.

•   Кʹьнщ. Пәй моде нәкʹәвә, һьнге хԝәрʹа кʹьнща бькʹьрʹә, чахе кʹьнщед тәйи кәвьн ида машийа нә. Хԝәрʹа хьлазийа дәмсале кʹьнща бькʹьрә чахе әрʹзан дькьн, йан жи дькʹанед кʹьнщед хԝәкьрида бькʹьрә. Һәрге те стандьн кʹьнща дәрва зьһа кьн, нә кӧ мәкʹинайа зьһакьрьнеда, сәва хәрщ кем бьн.

•   Хәрщед дьн. Пешийа кӧ тьштәки бькʹьрʹи, пьрса бьдә хԝә: «Һаԛас пʹәрʹе мьн һәйә, кӧ ви тьшти бькʹьрʹьм? Әв бь рʹасти мьнрʹа лазьм ә?» Тӧ дькари ләз нәкʹәви, кӧ һащәтед әләктроникә модерн йан жи әʹрәбе бькʹьрʹи? Ле тӧ дькари тьштед хԝәйә кӧ нади хәбате, йан жи тәрʹа нәлазьм ьн, бьфьрʹоши? Бь ве йәке тӧйе әʹмьре хԝә сьвьк ки у пʹәре хԝә зәʹф хәрщ нәки.

 Ширәт: Һәрге тӧ ида пʹәра һьндьки дьстини, әв мәщаләкә баш ә, ԝәки тʹәрка хәйсәтед хԝәйә хьраб бьди, мәсәлә щьхарәкʹьшандьн, ичʹкәвәхԝарьна зедә, у хӧмарлистьн. Гӧһастьнед ви щурʹәйи, нә кӧ тʹәне алийе аборийеда ԝе һʹале ԝә баш кьн, ле ӧса жи әʹмьре ԝә хԝәш кьн.

 Принсипа Кʹьтеба Пироз: «Хԝәзи ль рʹӧһʹфәԛира» (Мәтта 5:3).

 Дина хԝә бьдьне Кʹьтеба Пироз чь дьбежә: «Жь бәр кʹӧ билани ԝәк пʹәрә дьпарезьн: ле ԛимәта занәбуне у биланийе ԝе йәкеда нә, кӧ әԝ жийина ԝан хԝәйи дькә, кʹи кӧ әԝ ԛазанщ дькә» (Ԝаиз 7:12, ДТʹ). Биланийа ви щурʹәйи Кʹьтеба Пирозда нә, у гәләк мәрьв йед кӧ гӧһ дьдьнә ширәтед ԝе, һин бунә кӧ бь зедәйи бона пʹәра хәмгин нәбьн (Мәтта 6:31, 32).